Yeremia
31 “Oko mughulu oyo,” Yehova atya, “ngendisyabya Mungu w’ebihanda byosi bye Israeli, nabo bakendisyabya abandu baghe.”
2 Yehova ati:
“Abandu ababala oko muyali mubakanganibwa olukogho omo mbwarara
Omughulu Israeli abya akaya omo mwanya wiwe w’eriluhukiramo.”
3 Yehova mwanihulukira erilua hali n’eribugha ati:
“Munakwanza omo lwanzo lwa kera na kera.
Kyo kyaleka inakuleta okw’ingye omo lwanzo oluteleghula.*
4 Kandi ngenditasyakuhimba, neryo ukenditasyahimbwa.
Iwe mubikira we Israeli, ukenditasyimya ehighoma hyaghu
N’erihuluka ukasata n’obutseme.*
5 Kandi ukendisyahera amalima waghu w’emizabibu omo bitwa bye Samaria
Abakahera bakendisyahera n’eritsemera amatunda w’omo malima wabo.
6 Kundi ekiro kinemwasa omughulu abateya abali omo bitwa bye Efraimu bakendisyabugha omo mulenge muli bati:
‘Muhangane! Twirukire e Sioni, eyiri Yehova oMungu wetu.’”
7 Kundi Yehova ati:
“Mwimbire Yakobo n’obutseme.
Mwimbe n’obutseme, kundi muli endata oko bihanda byosi.
Mutulaghanaye omwatsi oyo; mupipe oMungu n’eribugha muti,
‘Yehova, sabula abandu baghu, abalyasighalira abe Israeli.’
8 Ngendibalusya omo kihugho ky’oko luhande lw’endata.
Ngendikuma-kumabo ngalusyabo omo biharo by’ehali-hali by’ekihugho.
Bakendisyabyamo esyondime-time n’ebirema.
Bakendisyabyamo omukali mukule n’omukali oyunemubuta, abosi haghuma.
Bakendisyabya kitunga kinene omughulu bakendisyasuba hano.
9 Bakendisyasa bakalira.
Ngendisyasondolabo omughulu bakendisyabya bakanilemba-lemba bati nibakanganaye olukogho.
Ngendisyatwalabo eyiri esyongunuko sy’amaghetse.*
Ngendisyalabyabo omo nzira eyitemo bikwangwa eyo batebangatwikalamo.
Kundi ingye Baba wa Israeli, na Efraimu ko kambere kaghe.”
10 Muhulikirire ekinywa kya Yehova, inywe bihanda,
Mutulaghanayekyo omo bisanga* ebiri hali.
“Oyo wapanza-panza Israeli akendisyamukuma-kuma.
Akendisyamuteya ngoko omulisya akateghaya esyonyama siwe.
11 Kundi Yehova akendisyakombola Yakobo
Kandi akendisyamulusya omo byala by’oyuwite akaghala kumulenga.
12 Bakendisyasa n’erighusa emilenge y’obutseme oko singyi ye Sioni
N’obusu bwabo bukendisyabya ibunatsemire busana n’obubuya bwa Yehova,*
Busana n’engano, edivai nyihya-nyihya, n’amaghuta,
Kandi busana n’ebyana by’esyombuli n’ebyana by’esyonde.
Bakendisyabya* ng’eririma erikabya irinemubana amaghetse,
Kandi sibendisyasyaleghetsana n’ahake.”
13 “Oko mughulu oyo, omubikira akendisyasata n’obutseme,
N’abalwana n’abasyakulu kutya, abosi haghuma.
Ngendisyabindula ekiriro kyabo mo butseme.
Ngendisyakiraniabo n’eribaha obutseme omo mwanya w’obulighe.
14 Ngendisyughutya abahereri* omo kalyo* kangyi.
N’abandu baghe bakendisyughuta obubuya bwaghe,” Yehova atya.
15 “Yehova ati:
‘Omo muyi we Rama munemwowika omulenge, ekiriro, n’ekiriro kinene:
Rakeli anemulira abana biwe.
Abirighana erikiranibwa kundi abana biwe babirihola.
Kundi sibakiriho.’”
16 Yehova ati:
‘“Uleke erilira n’ameso waghu isyaluamo emisonia,
Kundi ukendisyahembwa busana n’omubiiri waghu,’ Yehova atya.
‘Bakendisyalua omo kihugho ky’enzighu yabo.’
17 ‘Wanganayiketera ngoko emyatsi yikendisyuwana omo biro ebikasa,’ Yehova atya.
‘Abana baghu bekendisyasuba omo kiharo kyaghu.’”
18 “Oko kwenene, nabiryowa Efraimu akasimba,
‘Wabirinikunga, naghe nabirikungwa,
Ng’ende eyikine nyilere eyiteyatabegheribwa.
Unisubaye okw’iwe, neryo ngendilw’inasuba okw’iwe,
Kundi uli Yehova oMungu waghe.
19 Kundi munabya nabikusubira, munayowa muhanda busana n’ebibi ebyo nakola.
Mubabya babinikangania ekyo niryakola, munahunza ekihinga kyaghe omo bulighe.
Munakwa esisoni kandi munahemuka.
Kundi ingakwa esisoni busana n’amalolo ogho nakola omo bulwana bwaghe.’”
20 “Efraimu si mwana waghe w’omughaso, omwana waghe mwanzwa?
Kundi omughulu ngamukunga, ngabya ininamwibukire.
Kyo kikaleka inahangya-hangya* omughulu ngamulengekanayako.
Oko kwenene, ngedisyamukwira obulighe,” Yehova atya.
21 “Uyihirireho ebiminyikalo by’omo nzira,
Kandi wimanaye esyonduyi esikakanganaya ah’erilolera.
Uyiteghereraye enzira nene, eyo utolere iwalabamo.
Iwe mubikira we Israeli, subula, usube omo miyi yaghu eno.
22 Iwe mumbesa oyukaleghula, erihika mughulu wahi ukendisyabya ighunemutika-tika?
Kundi Yehova abirihangyikira oko kihugho kw’ekindu kihya-kihya:
Omukali akendisyarondya omulume yo kutsibu.”
23 Yehova w’emilondo, oMungu we Israeli, ati: “Omughulu ngendisyasyakuma-kuma abanyewa babo, kandi abandu bakendisyabugha ebinywa ebi omo kiharo kye Yuda n’omo miyi ye Yuda: ‘Yehova akutsumule, iwe bwikalo obutunganene, iwe kitwa kibuyirire!’ 24 Abandu be Yuda n’abosi bomo miyi ye Yuda, abakulima, n’abalisya, abosi bakendisyikalayo haghuma. 25 Kundi ngendisyughutya abosi abaluhire* n’erikalya-kalya abosi abaleghetsene.”*
26 Neryo mungabuka n’erikingula ameso waghe. Ehighotseri hyaghe muhikasiha.
27 “Muhulikirire! Ebiro binemwasa,” Yehova atya. “Omo biro ebyo, ngendisyahera omo kihanda kye Israeli n’ekihanda kye Yuda mw’embuto* y’omundu n’embuto y’esyonyama.”
28 “Ngoko nabasamalira nitoke erikulanga, eriterya, erihimbula, eritsandya, n’erihutalya, kutya ngendisyabasamalira nitoke eribahimba n’eribahera,” Yehova atya. 29 “Omo biro ebyo, sibendisyasyabugha bati, ‘Abobaba mubakalya ebikuke by’emizabibu, aliwe ameno w’abana wabirigheghera.’* 30 Aliwe obuli mundu akendisyahola busana n’ekosa yiwe-yiwe. Oyukendisyalya ebikuke by’emizabibu yo meno wiwe akendisyagheghera.”
31 “Muhulikirire! Ebiro binemwasa,” Yehova atya. “Oko mughulu oyo, ngendisyakola endaghane nyihya-nyihya n’abandu be Israeli n’abe Yuda. 32 Endaghane eyo siyendisyabya ng’endaghane eyo nakola n’abotata-kulu wabo, ekiro nabahamba oko byala ngabalusya omo kihugho kye Misri, ‘endaghane yaghe eyo batasikaya, nomo n’ingye nabya mukama wabo w’ekwenene.’ Yehova atya.”
33 “Kundi eno y’endaghane eyo ngendisyakola n’abandu be Israeli ebiro ebyo byabilaba: Ngendisyahira emighambo yaghe emwisi syabo, kandi ngendisyahandikayo omo mutima wabo. Ngendisyabya Mungu wabo, nabo bakendisyabya bandu baghe,” Yehova atya.
34 “Sihali oyukendisyasyakangirirya omulikyabo kutse mughala wabo ati, ‘Litolere iwamaminya Yehova!’ kundi abosi bakendisyaniminya eritsuka oko mulere erihika oko mukulu wa mubo,’ Yehova atya. “Ngendisyaghanyira ekosa yabo, kandi sinendisyasyibuka erilolo ryabo.”
35 Yehova, oyukatuha eryuba ritoke eritukolerya omw’itungyi,
Oyukahiriraho omughenda n’esyongununu by’emighambo* bitoke erikolerya omo kiro,
Oyukaghungaya engetse n’eridunga ebisunda byayo,
Oyukahulawa mo Yehova w’emilondo, ati:
36 “‘Hamabisyabya ekiro emighambo eyo iyitakwamwa,’ Yehova atya,
‘Abana ba Israeli isibendisyasyabya kihanda embere syaghe.’”
37 Yehova ati: “‘Olubula lwamabya ilwanganatoka eripimwa ilune endata, n’esyofondasyo sy’ekighugho ekiri eyikwa syamabya isyanganatoka eritsopolibwa, ni bugha ambu inanganalekerania abandu bosi be Israeli busana n’ebyosi ebyo balyakola,’ Yehova atya.”
38 “Muhulikirire! Ebiro binemwasa,” Yehova atya, “omughulu abandu bakendisyahimbira Yehova y’omuyi eritsuka oko Kaleberyo ka Hananeli eriyahika oko Lukyo lw’Engonde.* 39 Ekamba y’eripimamo yikendisyalw’iyaluayo n’eriyahika oko katwa ke Garebu, kandi ikendisyatimba n’erilolera e Goa. 40 Omusya* wosi w’ebinda n’eribu* n’amalima wosi eriyahika omo Musya we Kidroni, n’eriyahika oko ngonde y’Olukyo lw’Esabayiri* oluli ebwanga bw’eyo ryuba rikasira, bikendisyabya ekindu ekibuyirire embere sya Yehova. Sikyendisyasyakulwa kutse erihimbulwa.”