Ebaruha oko Yakobo
5 Muhulikirire, inywe bateke, mulire n’eribya omo bulighe busana n’ebitsibu ebikendibahikira. 2 Obuteke bwenyu bwabirihonda, n’esyongyimba syenyu syabirilibwa n’omuswa. 3 Ehoro yenyu n’efeza* yenyu byabiribyako amakenge, n’amakenge ayo akendisyakangania ekosa yenyu, kandi akendisyalya emibiri yenyu. Ebyo mwatunda bikendisyabya ng’omuliro omo biro by’enduli. 4 Omusahara ogho mwataha abahingyi ababaghesera amalima wenyu akabya inianemulira, n’ekiriro ky’abaghesa kyabirihika omo matwi wa Yehova* w’emilondo y’abasuda. 5 Mumwaishi luteke-teke oko kihugho, kandi mwabya mukakola ekyosi-kyosi ekyo mwanzire. Mukanenehaya emitima yenyu erihika oko kiro ky’erikerwa. 6 Mwabiritswera, mwabiriita oyutunganene, kyo kikaleka inialwa nenyu.
7 Neryo baghala betu, muhande omutima erihika oko mughulu w’eribyaho ry’Omukama. Omulimi akalindirira ebyalya byere. Akalindirira embula y’erimbere n’embula y’omwiso. 8 Nenyu kutya, muhande omutima, musikaye emitima yenyu, kundi eribyaho ry’Omukama riri hakuhi.
9 Baghala betu, simubye mukayilungumula* oghundi oko ghundi, mukasyatswerwa kutsibu. Omutsweri animene oko mulango. 10 Baghala betu, oko mwatsi w’eriyiyinia omo maligho n’erihanda omutima, mukwame eky’erileberyako ky’abaminyereri ababya bakabugha ebinywa bya Yehova.* 11 Abayiyinaya, tukabalangiramo bandu abatsemire.* Mwabiryowa ngoko Yobu ayiyinaya kandi mwabiryowa ebyo Yehova* amukolera enyuma sy’aho. Kandi mumwalangira ngoko Yehova* ali n’olwanzo lunene,* kandi akaghanyira.
12 Kutsibu-tsibu, baghala betu, muleke erilapa omo rina ry’olubula kutse ry’ekihugho, kutse ry’ekindi kindu kyosi-kyosi. Aliwe, ekinywa kyenyu “Inga” kibye inga, n’ekinywa kyenyu “Iyehe,” kibye iyehe, mukasyahabwa amalipizi.
13 Omw’inywe mune oyuli omo maligho? Abye akasaba. Omw’inywe mune oyutsemire? Imbe esyonyimbo. 14 Omw’inywe mune oyulwere? Abirikire abasyakulu b’endeko, nabo bamusabire n’erimuhirako amaghuta omo rina rya Yehova.* 15 N’omusabe owakasabawa n’obwikirirya akendilamya oyulwere,* na Yehova* akendimuhangania. Kandi amabya imwakakola amalolo, iniakendighanyirwa.
16 Neryo mubye mukaghungama amalolo wenyu oghundi oko ghundi butsir’ibisa, n’eribya mukasabirana, mutoke erilamibwa. Omusabe w’omutunganene awite akaghala. 17 Eliya abya mundu oyo wabya akayowa nga twe. Aliwe, omughulu asaba kutsibu ati embula isiyawa, muyitawa oko kihugho omo myaka isatu n’emisi ndatu (6). 18 Kandi mwasaba, n’olubula mulwaluamo embula, n’ebyalya mubyera oko kihugho.
19 Baghala betu, omw’inywe mwamabya omundu oyukaya hali n’ekwenene, neryo ihabya oyukamusubaya muyo, 20 muminye ngoko oyulyasubaya omukoli w’amalolo omo nzira eyo alyaherako, akendimusabula* omo luholo kandi akendisyaswika amalolo mangyi.