Ezekieli

36 “Naghu mughala w’omundu, ubughe obuminyereri obulebirye ebitwa bya Israeli. Ubughe uti, ‘Inywe bitwa bya Israeli, muhulikirire ekinywa kya Yehova. 2 Yehova Omukama Mukulu oko Bosi ati: “Esyonzighu syabirikubughako siti, ‘Ehee! Nibya n’emyanya y’endata eya kera yabiribya yetu!’”’

3 “Neryo ubughe obuminyereri n’eribugha uti, ‘Yehova Omukama Mukulu oko Bosi ati: “Kundi babirikuyira mo matongo n‘erilwa naghu oko mbande syosi, ubye kindu ky’abasaka omo bihanda kandi kundi abandu ko banemukubughako n’erikulegha, 4 neryo inywe bitwa bya Israeli muhulikirire ekinywa kya Yehova Omukama Mukulu oko Bosi! Bino byo Yehova Omukama Mukulu oko Bosi akabwira ebitwa n’ehitwa, ehyusi n’emisya, ebisambukalirya ebyayirawa mo matongo, n’emiyi eyasighanibawa, eyo abasaka omo bihanda ebitimbire kuyo babirinyeghamo ebindu n’erisekereryayo; 5 Yehova Omukama Mukulu oko Bosi akabwirabo ati: ‘Omo muhwa waghe owakaka ng’omuliro ngendisyabugha oko basaka b’ebihanda n’oko Edomu yosi, abo omo kaghonero kanene kandi ibanatsemire kutsibu bakabugha bati ekihugho kyaghe ni kyabo, busana n’eriyimirya ebilisiryo bya mukyo n’erinyegha ebindu bya mukyo.’”’

6 “Neryo ubughe obuminyereri obulebirye ekihugho kya Israeli, n’eribwira ebitwa n’ehitwa, ehyusi n’emisya uti, ‘Yehova Omukama Mukululu oko Bosi ati: “Mulebaye! Omo muhwa waghe n’omo buhitane bwaghe, ngendibugha, kusangwa ebihanda byabiribahemulikania.”’

7 “Neryo Yehova Omukama Mukulu oko bosi ati: “Ingyuwene-wene ngasumba ebyala byaghe omw’ilahirya ngoko ebihanda ebibatimbireko bikendisyaheka erihemuka lyabyo. 8 Nikwa inywe bitwa bya Israeli, mukendisyalasako amatahi n’erihetya amatunda busana n’abandu baghe Abaisraeli, kusangwa bakisiya ibasubula. 9 Kusangwa indi haghuma nenyu, kandi ngendisyabatsomana, nenyu mukendisyalimwa n’eriherwako embuto. 10 Ngendisyakanyirirya abandu benyu—ekihanda kyosi kya Israeli, ekyosi—n’emiyi ikendisyikalwamo n’ebihuma bikendisyasyahimbwa. 11 Oko kwenene, ngendisyakanyirirya abandu benyu n’ebihangulo byenyu; mukendisyabya bangyi n’ebihangulo byenyu bikendisyakanyirira. Kandi ngendisyaleka imwikalwamo nga kera, kandi ngendisyaleka imwabya ndeke kwilaba kera; nenyu mukendisyaminya ngoko indi Yehova. 12 Ngendisyaleka abandu baghe—Abaisraeli—ibalendera oko mutaka wenyu, kandi bakendisyabasighalya. Mukendisyabya mwandu wabo, kandi simwendisyasyababughako abana.’”

13 “Yehova Omukama Mukulu oko Bosi ati: ‘Kundi banemubabughako bati, “Uli kihugho ekikamera abandu kandi ukabugha abana b’ebihanda byaghu,”’ 14 ‘neryo siwendisyasyamera abandu kutse eribugha abana b’ebihanda byaghu,’ Yehova Omukama Mukulu oko Bosi atya.” 15 ‘Sinendisyasyaleka ebihanda bikakutsuma, kutse erileka ebitunga by’abandu bikakusekererye, naghu siwendisyasyatwikalya ebihanda byaghu,’ Yehova Omukama Mukulu oko Bosi atya.

16 Kandi ekinywa kya Yehova mukyanihikako kiti: 17 “Mughala w’omundu, omughulu abandu b’ekihanda kya Israeli babya bikere omo kihugho kyabo, mubatsandyakyo omo mighendere yabo n’omo mikolere yabo. Emighendere yabo yabya okw’ingye ng’obutsandirya bw’omukali bw’ebiro biwe by’omwisi.* 18 Neryo munutulira kubo kw’erihitana lyaghe busana n’omusasi ogho buta oko kihugho kandi busana n’erileka ekihugho ikyabya ekiterire omo syosanamu syabo esikita nye.* 19 Neryo munapanza-panzirabo omo bihanda n’eritsatsangabo omo bihugho. Munatswerabo erikwamana n’emighendere yabo n’emikolere yabo. 20 Aliwe babere bahika omo bihanda ebyo, abandu mubatsandya erina lyaghe eribuyirire omw’ibugha kubo bati, ‘Aba ni bandu ba Yehova, aliwe mubakaswa erilua omo kihugho kiwe.’ 21 N’eryo ngendikola omwatsi mulebe busana n’erina lyaghe eribuyirire, eryo abandu b’enyumba ya Israeli babiritsandya omo bihanda ebyo babiriyamo.”

22 “Busana n’ekyo, ubwire abandu b’enyumba ya Israeli uti, ‘Yehova Omukama Mukulu oko Bosi ati: Inywe bandu b’enyumba ya Israeli, sindikola busana nenyu, aliwe busana n’erina lyaghe eribuyirire eryo mwabiritsandya omo bihanda ebyo mwabiriyamo.”’ 23 ‘Kwenene-kwenene, ngendisyayira erina lyaghe rikulu mo ribuyirire, eryabiritsandibwa omo bihanda, eryo mwatsandaya omo kati-kati kabyo; n’ebihanda bikendisyaminya ngoko indi Yehova, omughulu ngendisyayiyira mo mubuyirire omo kati-kati kenyu embere sy’ameso wabo,’ Yehova Omukama Mukulu oko Bosi atya. 24 Ngendibalusya omo bihanda n’eritasyabakuma-kuma erilua omo bihugho byosi, n’eribaleta omo kihugho kyenyu. 25 Ngendisyabatsa-tsangako amaghetse, neryo mukendisyera. Ngendisyaberya oko butsandirya bwenyu bwosi n’oko syosanamu syenyu esikita nye. 26 Ngendisyabaha omutima muhya-muhya n’eribahiramo ekirimu kihya-kihya. Ngendisyalusya omo mibiri yenyu mw’omutima w’eribwe neryo inabaha omutima w’omunyoku.* 27 Ngendisyabahiramo ekirimu kyaghe, kandi ngendisyaleka imwakwama ebighenderwako byaghe, nenyu mukendisyakwama n’erisikya ebyalayiro byaghe. 28 Neryo ngendisyabikalya omo kihugho ekyo naha abotata-kulu wenyu, nenyu mukendisyabya bandu baghe naghe inabya Mungu wenyu.’

29 “‘Ngendisyabalamya oko butsandirya bwenyu bwosi n’erilayira enafaka niti yere n’eribya nyingyi, kandi sinendisyabaletako enzala. 30 Ngendisyaleka emiti iyahetya kutsibu n’erileka amalima inyerya kutsibu, neryo simwendisyasyahemuka embere sy’ebihanda busana n’enzala. 31 Mukendisyibuka emighendere yenyu mibi n’emikolere yenyu eyituwene, neryo mukendisyayikwa esyonye busana n’olubanza* lwenyu na busana n’emikolere yenyu eyikita nye. 32 Aliwe muminye kino: Sindikola eki busana nenyu,’ Yehova Omukama Mukulu oko Bosi atya. Omo mwanya w’ekyo, muhemuke n’erikuta-kuta busana n’emikolere yenyu, inywe bandu b’enyumba ya Israeli.’

33 “Yehova Omukama Mukulu oko Bosi ati: ‘Ekiro ngendisyaberya oko lubanza* lwenyu, ngendisyaleka emiyi iyikalwamo n’ebihuma ibyatasyahimbwa. 34 Ekihugho ekyabya kima, ekyayirawa mo matongo obuli mulabi atoke erilangirakyo, kikendisyasyalimwa. 35 N’abandu bakendisyabugha bati: “Ekihugho ekyabya kima kyabiribya ng’eririma lye Edeni, n’emiyi eyabya bisambukalirya n’amatongo n’ebihuma, lino ni myanya eyikongotere kandi eyikerwemo.” 36 Ebihanda ebikendisyasaka eribatimbako bikendisyaminya ngoko ingyuwene-wene, ingye Yehova, nabiritasyahimba ekyasambulawa n’erihera embuto omo ekyabya kima. Ingyuwene-wene, ingye Yehova, nabiribugha, kandi nabirikolakyo.’

37 “Yehova Omukama Mukulu oko Bosi ati: ‘Ngendisyaleka abandu b’enyumba ya Israeli banisabe nibakolere eki: Ngendisyakanyirirya abandu babo n’ebihangulo byabo. 38 Ng’ekihangulo ky’ababuyirire, ng’ekihangulo kye Yerusalema omughulu w’ebiro byayo bikulu, emiyi eyabya bisambukalirya ikendisyusulamo ebihangulo by’ebitunga by’abandu; nabo bakendisyaminya ngoko indi Yehova.’”