Isaya
5 Kisi, muleke nyimbire omwanze waghe
Olwimbo olulebirye omwanze waghe n’eririma liwe ly’emizabibu.
Omwanze waghe abya awite eririma ly’emizabibu oko katwa akaliko embolewa.*
2 Mwatakulalyo amalusyamo amabwe.
Mwahera mulyo mw’omuliki w’omuzabibu oghuwenenga ow’erangyi y’omusasi.
Mwahimba enyumba nyiri-nyiri omo kati-kati kalyo,
Kandi mwahira mulyo mw’ekikamiro ekyo abatsa omo ribwe.
Neryo mwabya akalindirira ati likendisyahetya emizabibu,
Aliwe muryabya likahetya emizabibu eyituwene.
3 “Neryo lino, inywe bikalani be Yerusalema,
Nenyu inywe balume be Yuda,
Ngabasaba musohe omo kati-kati kaghe
N’eririma lyaghe ry’emizabibu.
4 Ni kindi kyahi ekyo nangakolire
Busana n’eririma lyaghe ly’emizabibu
Ekyo nite nakola?
Kusangwa omughulu nabya ngalindirira
Niti likendihetya emizabibu
Muritahetya emizabibu mitya-mitya kwehi?
5 Neryo lino, muleke nibabwire
Ekyo ngendikolera eririma lyaghe ly’emizabibu:
Ngendihimbula oluba lwalyo,
Nalyo iryahisibwa omo muliro
Ngendihimbula oluhimbo lwalyo lw’amabwe,
Nalyo iryalyatangirirwa.
6 Ngendiyiralyo mo kitaka ekyabirisighanibwa;
Siryendisyasyakolerwa kutse erilimirwa.
Likendisunira iryabyamo amahwa n’ebiti,
Kandi ngendilayira ebitu niti isibyawisaya kulyo kw’embula yosi-yosi.
7 Kusangwa enyumba ya Israeli ni ririma ly’emizabibu lya Yehova w’emilondo;
Abandu be Yuda lye ririma* eryo abya anzire kutsibu.
Abya akalindirira obulingirirania,
Nikwa mulebaye! muhatabya obulingirirania;
Mwabya akalindirira eritunganene,
Nikwa mulebaye! emilake y’obulighe.
8 Obulighe oko abakatondekanaya amanyumba oko wandi
N’abakongera eririma oko rindi
Erihika oko kika ihabya isihakiri omwanya
Neryo imwikala inywibene omo kihugho!
9 Yehova w’emilondo abirilapira* omo matwi waghe
Ngoko amanyumba mangyi, nomo ane manene-manene kandi awaghambire,
Akendisyabya kindu ekikubahaya,
Inyabya bihuma.
10 Kusangwa amahektare 10* akendisyerya akapimo kaghuma kasa k’ebati*
N’embuto eyoswire omo kapimo kaghuma ke omeri* ikendisyerya e efa* nguma nyisa.
11 Obulighe oko abakabuka omo tututu bakayanywa obwabu
Abakasiba omo bwabu erihika oko mwirimya w’erigholo erihika omughulu edivai ikendibaghungya.*
12 Oko syofete syabo bakabya n’enanga,* n’ekyombo ky’omuziki eky’esinga,
Akakeleya, enyabulere, n’edivai;
Aliwe sibaliyiteghereraya ekyo Yehova akakola,
Kandi sibalilangira emibiiri y’ebyala biwe.
13 Neryo busana n’ekyo abandu baghe bakendisyaya omo bunyewa
Busana n’eribula obwenge;
Abalume babo b’olukengerwa bakendisyakwa enzala,
N’abandu babo bosi bakendisyuma omo nyota.
14 Neryo Eyisinda* yabiriyikakya,*
Kandi yabiritanda obuno bwayo butsira nduli;
N’olukengerwa lwe Yerusalema* n’ebikumula byayo by’abandu abakabughaya olukanda, n’abandu bayo abakayitsangura,
Kwenene bakendisyandaghalira muyo.
15 N’omundu akendisyunama,
Omundu akendisyakehibwa,
N’ameso w’oyukayiheka akendisyakehibwa;
16 Yehova w’emilondo akendisyahalambwa omw’itswera* liwe.
OMungu w’ekwenene, Omubuyirire, akendisyayiyira mo mubuyirire erilabira eritunganene.
17 N’ebyana by’esyombuli bikendisyalya ebiti nga bikalyabyo omo lulisiryo lwabyo;
N’abikalani abasira ehandi bakendisyalira omo myanya eyabirisighala matongo ey’esyonyama esikalya ndeke,
18 Obulighe oko bakakura olubanza* lwabo omo bikoba by’amatebo
N’erilolo lyabo omo bikoba by’engurubani.*
19 Abakabugha bati: “Muleke anguhaye omubiiri wiwe;
Muleke ase luba tutoke erilangiragho.
Muleke erisonda* ly’Omubuyirire we Israeli rikoleke
Tutoke eriminyalyo!”
20 Obulighe oko bakabugha bati ekibuya ni kibi n’ekibi ni kibuya,
Abakahira omwirimya omo mwanya w’ekyakakala n’ekyakakala omo mwanya w’omwirimya,
Abakahira obukalihe omo mwanya w’obusi n’obusi omo mwanya w’obukalihe.
21 Obulighe oko bakayilangira mo b’amenge
N’abakayilangira mo b’obwenge!
22 Obulighe oko bawite akaghala k’erinywa edivai
N’oko balume abasi ndeke eritulungania obwabu.
23 Abakalusaya oko mubi kw’olubanza busana n’ekyutuliro
N’abakaghanira omutunganene y’obulingirirania!
24 Neryo ngoko ekirimi ky’omuliro kikanahisaya ebiti ebyumire
Kandi ngoko ebiti ebyumire bikanayilinga omo birimi by’omuliro,
Emirihi yabo ikendisyahonda,
N’omusanga wabo akendisyayitsa-tsanga ng’olututu,
Kusangwa mubaghana erikwama emighambo* ya Yehova w’emilondo
Kandi mubapokya ekinywa ky’Omubuyirire wa Israeli.
25 Busana n’ekyo erihitana lya Yehova likaghulumira oko bandu biwe,
Naye akendisyakakya ebyala biwe n’erihunzabo.
Ebitwa bikendisyalabamo omusiki,
N’ebinda byabo bikendisyabya ng’omutsafu omo syondaki.
Busana n’ebyosi ebi, erihitana liwe siririryumbya,
Nikwa ebyala biwe bikinasumbire busana n’erihunza.
26 Abirihangania ekiminyikalo* busana n’ekihanda ky’ehali;
Abirisughundirabo batoke eryasa erilua oko nduli-nduli sy’ekihugho;
Neryo mulebaye! Banemwasa bakatibita.
27 Sihali n’omughuma wa kubo oyuluhire kutse oyukatwikala.
Sihali oyukayitsingirako kutse eriyato.
Emikaba eyiri omo mbindi syabo siyilegha-leghire,
Kutse esyokamba sy’oko biryato byabo sisitwikire.
28 Emisoha yabo yosi inaghusungulire,
N’amata wabo wosi anakakirye.*
Ebighera by’esyosabayiri syabo biri ng’amabwe w’omutwero,
N’ebiringo by’oko syongurubani* syabo biri ng’erihunga.
Bakendisyaruruma n’erihamba ekyo bakahigha
Kandi bakendisyahekakyo isihali oyo wangabalyakyo.
30 Oko kiro ekyo bakendisyarurumira kukyo
Eriruruma ng’engetse.
Omundu wosi-wosi oyukendisyalangira ekihugho, akendisyalangira omwirimya owakubahaya;
Nibya n’ekyakakala kyabiribya mwirimya busana n’ebitu.