Emisyo
6 Mughala waghe, wamabya imughukaligha uti ukendilihira omulikyenyu y’edeni,
Wamabya imughukaha ebyala* by’omundu oyo utasi,
2 Wamabya iwabirihambwa omo kitegho busana n’ebyo ulyalagha,
Wamabya iwabirihambwa omo binywa ebyo ulyabugha,
3 Mughala waghe, kino kyo ukole utoke eriyilusyamo,
Kundi wabiritoghera omo byala by’omulikyenyu:
Uyasungane n’omulikyenyu,
Uyikehaye n’erimulemba-lemba kutsibu.
4 Isiwaleka ameso waghu akayato,
N’ebikoheryo byaghu bikayitsingirako.
5 Uyilusayemo ng’engabi eyikayilusaya omo byala by’omuhiyi,
Ng’akanyunyu akakayilusaya omo byala by’oyukategha ehinyunyu.
6 Iwe mughata, uyalebaye esyombali;
Ulebaye ngoko sikayiwata, neryo ubye n’amenge.
7 Nomo sitawite omukomanda, omukulu, kutse omusondoli,
8 Sikateghekanaya akalyo kasyo omughulu w’ekipwa,*
Sikakuma-kuma akalyo kasyo omughulu w’erighesa.
9 Iwe mughata, ukendibya ighunaghotsere erihika mughulu wahi?
Ukendibuka mughulu wahi?
10 Ughotsere hike, uyitsingireko hake
Ulinge ebyala byo hake ukaluhuka,
11 Neryo obwera bwaghu bukendyasa ng’omwibi,
N’eribulirwa ryaghu rikendyasa ng’omulume oyuli n’ebindu by’amalwa.
12 Omundu bule kandi omubi akaya eyi n’eyi akabugha amabehi;
13 Akakohaya, akasata-sataya ebisando biwe, inianemukangania omo minwe yiwe.
14 Omutima wiwe anzire erikola ebibi;
Obuli ndambi akabya inianemupanga erikola obubi, kandi akabya inianemuhira omo bandu mw’eritendihulikirirana.
15 Busana n’ekyo, obuhanya bwiwe bukendisyahika kitsumbukirania;
Akendisyatsutsangika omo katambi kake, isihakiri amaha w’erisyalama.
16 Hali emyatsi 6 eyo Yehova aponire,
Inga, emyatsi 7 eyo aponire:*
17 Ameso awali n’emiyiheko, olulimi olukabugha amabehi, n’ebyala ebikuta omusasi w’omundu oyute n’ekosa,
18 Omutima owakapanga erikola emyatsi mibi, ebisando ebyanguhire eriyakola ekibi,
19 Omwimiri* mubehi oyukabugha amabehi w’obuli ndambi,*
N’oyukahira eritendihulikirirana omo baghala.
20 Mughala waghe, usikaye emighambo ya baba waghu,
Isiwaleka erikwama amahano* wa mama waghu.
21 Uboherebyo oko mutima waghu mughulu wosi;
Uboherebyo oko ngoto yaghu.
22 Bikendikusondola omughulu ukalendera;
Bikendikuteya omughulu ukaghotsera;
Kandi bikendikania naghu* omughulu ukabuka.
23 Kundi omughambo ni tala,
Ekyalayiro ni kyakakala,
N’ebinywa by’erikunga ni nzira y’engebe.
24 Bikendikuteya oko mukali mubi,
Bikendikuteya ukasyatebwa n’ehinywa ehisihire hy’omukali mutya-mutya.*
25 Isiwayitsutsa obubuya bwiwe omo mutima waghu,
Isiwaleka akakakuhamba omo meso wiwe awakabonga,
26 Kundi omulume akahika oko kika ky’eribula ekihande ky’omukati busana n’omumbalaka,
Kandi amabya ini mukali oyutahibwe, akaleka omundu iniaherya engebe yiwe.
27 Omundu anganalunda omuliro w’oko kikuba, neryo esyongyimba siwe isitahya?
28 Kutse omundu anganalyata oko makala awaliko omuliro neryo ebisando biwe ibitahya?
29 Kobine bitya n’oko mundu oyukaghotsera n’omukali w’omulikyabo;
Oyukamutulako syendisyabula erihabwa amalipizi.
30 Abandu sibalitsweba omwibi
Amabya inialiba busana n’eritulerya enzala yiwe.
31 Aliwe bamabimuhamba,
Iniakendiliha ngendo 7 ebyo alyiba;
Iniakenditeka ebindu byosi by’obughuli by’omo nyumba yiwe.
32 Omundu oyukakola obusingiri n’omukali syawite obwenge;*
Oyukakola ekyo akayitsandiraya engebe* yiwe.
33 Ebironda n’erihemuka by’anemwendisyabana,
N’erihemuka riwe siryendisyahwa.
34 Kundi obumbanda bukaleka omulume iniahitana kutsibu;
Syendisyakwa obulighe omughulu akendisyayituhulirya.
35 Syendisyaligha embanulo yosi-yosi;
Nomo wangamuha ekihembo kingahi, syendisyatulera.