Watchtower EKIBIKIRO KY'EBITABU EKIRI OKO ENTERNETE
Akaleberyo k'Omuteya
EKIBIKIRO KY'EBITABU EKIRI OKO ENTERNETE
Kinande
  • EBIBLIA
  • EBITABU
  • MIHINDANO
  • Abanya Roma 7
  • EBiblia—Embindula y’ekihugho kihya-kihya

Sihali evideo yosi-yosi oko syo ulyasombola.

Muhakabya ebiteghendeka omuwulu w'erikimya evideo.

Emyatsi eyiri omo kitabu ky’Abanya Roma

      • Eky’erileberyako ekikakanganaya ngoko situkisabirwe erikwama Emighambo (1-6)

      • Emighambo yo yikaleka itwaminya erilolo (7-12)

      • Erilwa n’erilolo (13-25)

  • EBiblia—Embindula y’ekihugho kihya-kihya
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
EBiblia—Embindula y’ekihugho kihya-kihya
Abanya Roma 7:1-25

Ebaruha oko Abanya Roma

7 Baghala betu, ngakanaya nenyu kundi mwasi emighambo. Simwasi ngoko omundu akasabawa erikwama emighambo omughulu akineho? 2 Eky’erileberyako, erikwamana n’emighambo, omukali akabya iniakinasibwe kw’alungire n’omulume wiwe, omulume wiwe amabya iniakineho. Aliwe, omulume wiwe amabihola, akabya isyangatasyakwama emighambo y’omulume wiwe. 3 Amabilunga n’oghundi mulume omulume wiwe iniakineho, iniamakola obusingiri. Aliwe, omulume wiwe amabihola, syangatasyakwama emighambo y’omulume wiwe. Neryo amabilunga n’oghundi mulume, isyatakola obusingiri.

4 Nibya baghala betu, omubiri wa Kristo abiritubohola. Situkisabirwe erikwama Emighambo ya Musa. Ekyo kyabya kitya, mutoke eribya abandu b’oghundi mundu oyo oMungu alubukaya. Lino ritolere itwakola ebikatsemesaya oMungu. 5 Omughulu twabyatukakwama esyongumbu nyibi sy’omubiri wetu, emighambo muyaleka itwaminya esyongumbu nyibi esyabya omo mibiri yetu. Esyongumbu esyo syangatukolirye oko luholo lusa. 6 Aliwe lino, kundi situkisabirwe erikwama emighambo, situkikwama ekyabya kikatuboha. Lino tukakolera oMungu omo nzira nyihya-nyihya erilabira ekirimu, butsira omo nzira ya kera y’erikwama emighambo eyihandikire.

7 Neryo, tukasonda eribugha tuti emighambo siyuwene? Iyehe! Ngahatabya emighambo, sinangaminyire erilolo nga niki. Ng’eky’erileberyako, sinangaminyire ngoko eriyitsutsa ebindu by’abandi ni kibi omughambo ng’atabugha ati: “Isiwayitsutsa ebindu bya bene.” 8 Aliwe busana n’ekyalayiro ekyo, erilolo mulyasunga akanya k’erileka inabya ngayitsutsa obuli kindu. Ngahatabya omughambo oyo, ngambe erilolo siryangakola kindu. 9 Oko kwenene, nabyaho embere habye Emighambo. Aliwe, habere habya emighambo, n’erilolo ryamabyaho. Neryo munahola. 10 Kandi omughambo owanganiwatikirye eribana engebe, akanitwala oko luholo! 11 Erilolo muryakolesya ekyalayiro ekyo erinitebya n’eriniita. 12 Nomo bine bitya, omughambo igho abuyirire n’ekyalayiro kibuyirire, kitunganene, kandi kyuwene.

13 Ekyo ni bugha ambu ekindu ekyuwene kyo kyaleka inahola? Iyehe! Erilolo ryo ryaleka inahola. Emighambo yuwene. Aliwe, Emighambo yabirikangania ngoko erilolo ryo ryaleka inahola. Neryo ekyalayiro mukyakangania ngoko erilolo ni kindu kibi kutsibu. 14 Tunasi ngoko Emighambo yalua oko Mungu erilabira ekirimu kiwe. Aliwe, n’ingye nitsandire, niri mundu w’omubiri. Munaghulibwa omo bukobe bw’erikola amalolo. 15 Sinasi ndeke ekikaleka inakola ebyo ngakola. Omo mwanya w’erikola ebyo nanzire erikola, ngakola ebyo niponire. 16 Ninalighire ngoko Emighambo yuwene, aliwe nikinakola emyatsi eyo nitanzire erikola. 17 Kwesi, s’ingye ngakola emyatsi mibi eyi. Aliwe, ry’erilolo eriri emwisi syaghe. 18 Ninasi ngoko emwisi syaghe simuli n’ekindu kibuya n’ekighuma, n’ibugha ambu, omo mubiri waghe w’amalolo. Nomo ngabya ininanzire erikola ekyuwene, sinditoka erikolakyo. 19 Sindikola emyatsi eyuwene eyo nanzire erikola. Aliwe ngakola emyatsi eyituwene eyo nitanzire erikola. 20 Kwesi, namakola emyatsi eyo nitanzire erikola, s’ingye ngakolayo. Erilolo eriri omwisi syaghe ryo rikakolayo.

21 Nabirilangira ngoko omwatsi ono ni w’ekwenene okw’ingye: Omughulu nganza erikola ekyuwene, ekibi kikabya ikine emwisi syaghe. 22 Oko kwenene, omo mutima waghe nanzire omughambo w’oMungu. 23 Aliwe, ngalangira omo mubiri waghe oghundi mughambo owakalwa n’omughambo owakasondola obwenge bwaghe. Kandi omughambo oyo akaniyiramo mukobe w’omughambo w’erilolo owali omo mubiri waghe. 24 Ingye muhanya! Nindi yukendisyanilusya omo mubiri owakanitwala oko luholo? 25 Ngasima oMungu kundi akanisabula erilabira Yesu Kristo Omukama wetu. Neryo omo bwenge bwaghe, niri mukobe w’omughambo w’oMungu. Aliwe, omo mubiri waghe niri mukobe w’omughambo w’erilolo.

Ebichapo bye Kinande (1999-2025)
Ulwako
Ingira
  • Kinande
  • Ghaba
  • Ebyo wanzire
  • Copyright © 2025 Watch Tower Bible and Tract Society of Pennsylvania
  • Eby'erighenderako eby'erikolesya
  • Eribika esiri
  • Paramètres de confidentialité
  • JW.ORG
  • Ingira
Ghaba