Ebaruha y’erimbere oko Abanya Tesalonika
2 Baghala betu, inyw’ibene-bene munasi ndeke-ndeke ngoko itwe erihika ewenyu muryabya n’endundi. 2 Kundi nomo mutwatsuka eryaghalwa* n’erighonerwa e Filipi, ngoko mwasi, oMungu mwatuwatikya erikola omo butubaha tutoke eribahubirya engulu mbuya y’oMungu nomo twabya tukaghalibwa kutsibu. 3 Neryo erihano eryo tukabaha sirilwire omo mwatsi w’amabehi kutse omo mwatsi owaterire, kutse omo mwatsi owate w’ekwenene. 4 Aliwe, kundi oMungu mwalangira ngoko tutolere erihabwa omubiiri w’erihubirya engulu mbuya, situlihubirayayo busana n’eritsemesya abandu, aliwe busana n’eritsemesya oMungu, oyukalebaya ebiri omo mutima.
5 Oko kwenene, munasi ngoko sitwabya tukabugha n’ahake ebinywa by’ekisehya. Kandi sitwabya tukayiwata nga tuli bandu abuwene mutoke erituha oko bindu byenyu. OMungu anasi ekyo! 6 Kandi mututarondya olukengerwa lw’abandu. Mututakola tutya okw’inywe kutse oko bandi bandu. Twangabere omuheke owalitohire okw’inywe kundi tuli bakwenda ba Kristo. 7 Aliwe, mutwabya tukabakolera omo mutima molo, ng’omumama oyukanyonyesaya abana biwe n’erisughabo omo lwanzo. 8 Neryo kundi twabya tubanzire kutsibu, sitwabya tukasonda eribahubirya engulu mbuya risa. Aliwe, twabya twanzire eriyiherera* busana nenyu, kundi twabya tubanzire kutsibu.
9 Baghala betu, munibukire omubiiri w’eritwa olunza ogho twabya tukakola n’enduhi yetu. Omughulu twabya tukabahubirya engulu mbuya y’oMungu, itukakola omo kiro n’omwitungyi kusudi situbye omuheke owalitohire oko mundu wosi-wosi. 10 Munasi ekyo, n’oMungu naye anasikyo, ngoko mututaleghula, twabya tukabakolera omo ritunganene, kandi sitwabya n’ekosa embere syenyu inywe mwikirirye. 11 Munasi ndeke-ndeke ngoko itukabya itunemukunga, erikirania, n’erihana obuli mughuma w’okw’inywe, ngoko baba akakolera abana biwe, 12 mutoke eriyighendya ngoko oMungu anzire, oyo wababirikira mutoke eribya omo Bwami bwiwe n’eribana olukengerwa lwiwe.
13 Busana n’ekyo, kandi tukabya itunemusima oMungu, kundi omughulu mwowa ekinywa ky’oMungu ekyo twabahubiraya, mumwatalighakyo ng’ekinywa ky’abandu. Aliwe, mumwalighakyo ngoko kiri kwenene-kwenene, ni bugha ambu, ekinywa ky’oMungu ekikakola emwisi syenyu, inywe mwikirirye. 14 Baghala betu, mwabirikwama emibere y’abali omo syondeko sy’oMungu esiri omo bughuma na Kristo Yesu esye Yudea, kundi nenyu mwabiryaghalibwa n’abakalani balikyenyu ngoko baghala betu be Yudea nabo baghalibawa n’Abayahudi. 15 Abayahudi nibya bo bita Omukama Yesu n’abaminyereri, kandi mubatwaghalya. Abandu abo sibalitsemesaya oMungu, n’ekindi sibalirondaya endundi y’abandu bosi, 16 kundi bakasonda eritukakirya erihubirya abandu b’ebihanda engulu mbuya eyangaleka ibasabuka. Omw’ikola batya, bakabya ibanemukanyirirya amalolo wabo. Aliwe oko nduli, oMungu akendisyahitana n’eribaha amalipizi.
17 Baghala betu, omughulu abandu batukasa erilua ewenyu* omo katambi kake, kibiri-biri butsira omo mutima, mutwayikasa eritasyabalolako* kundi twabya tubakwire olukando. 18 Busana n’ekyo, mutwanza eryasa ewenyu. Ingye Paulo, munasonda eryasa, butsira ngendo nguma, aliwe kabiri. Nikwa Sitani mwatukingira enzira. 19 Amaha wetu, obutseme bwetu, kutse embita yetu, ebikaleka itwayihalamba embere sy’Omukama Yesu omughulu w’eribyaho riwe niki? Simwasi ngoko n’inywe? 20 Oko kwenene, muli lukengerwa lwetu n’obutseme bwetu.