Amosi
8 Bino byo Yehova Omukama Mukulu oko Bosi anikanganaya: Munalangira ekitiri* ekirimo amatunda awakera oko mughulu w’ekipwa.* 2 Neryo mwanibulya ati: “Amosi, wamalangiraki?” Munamusubrirya niti: “Namalangira ekitiri ekirimo amatunda awakera oko mughulu w’ekipwa.”* Neryo Yehova mwanibwira ati: “Enduli yamabihika oko bandu baghe Abaisraeli, sinendisyasyabaghanyira. 3 ‘Ekiro ekyo esyonyimbo esikimbawa oko hekalu sikendisyabinduka mo kiriro,’ Yehova Omukama Mukulu oko Bosi atya. ‘Hakendisyabya ebinda binene ebyabirighuswa ehosi-hosi. Isihowika omulenge wosi-wosi!’
4 Muhulikirire kino, inywe mukalyatanga abera
Inywe mukabugha omo kihugho mw’abolo.
5 Inywe mukabugha muti, ‘Ekiro kikulu ky’omughenda muhya-muhya kikendisyahwa mughulu wahi tutoke erighulya engano yetu,
N’esabato ikendisyahwa mughulu wahi tutoke erighulya engano yetu?
Neryo itwakolesya e efa* nge kutsibu
N’eshekeli* eyilitohire kutsibu,
N’eriba oyukaghula omo kilo ky’amabehi;
6 Neryo itwaghula oyutawite oko kindu omo feza*
N’erighula omwera oko biryato,*
N’erighulya engano eyituwene.’
7 Yehova abirilapa omo lukengerwa lwa Yakobo ati:
‘Sinendisyibirirwa n’ahake ebyosi ebyo wakola.
8 Busana n’ekyo, ekihugho kikendisyatitimana,
N’abikalani bamo bosi bakendisyabya omo kiriro.
Ekihugho kyosi kikendisyayisumba ng’Olusi lwe Nile,
Kikendisyayisumba n’erikima ng’Olusi lwe Nile lwe Misri.’
9 ‘Ekiro ekyo,’ Yehova Omukama Mukulu oko Bosi ati:
‘Ngendisyaghotserya eryuba omo ritungyi rya pe,
Kandi ngendisyaleta omo kihugho m’omwirima omo ritungyi rya pe.
10 Ngendisyabindula ebiro bikulu byenyu mo kiriro
N’esyonyimbo syenyu syosi mo syonyimbo sy’ekiriro.
Ngendisyahira esyongyimba sy’esaki* omo syombindi syosi
Ngendisyayira n’emitwe yosi mo syombala.
Ekyo ngendisyabalolyako kikendisyabya ng’ekiriro ky’oyulyaholerawa n’ekyusa kiwe,
N’enduli y’ekiro ekyo ikendisyakaliha.’
11 ‘Muhulikire! Ebiro binemwasa,’ Yehova Omukama Mukulu oko Bosi atya,
‘Omo biro ebyo, ngendisyatuma omo kihugho mw’enzala,
Siyendisyabya nzala y’omukati kutse enyota y’amaghetse,
Aliwe yikendisyabya nzala n’enyota y’eryowa ebinywa bya Yehova.
12 Bakendisyaghenda bakatsinga-tsinga erilua oko ngetse eyi erihika oko yindi
N’erilua oko luhande lw’endata bakaya oko luhande lw’eyo ryuba rikasira.
Bakendisyaghenda eyi n’eyi bakasondya ekinywa kya Yehova, aliwe sibendisyabanakyo.
13 Ekiro ekyo, ababikira babuya bakendisyalekula,
N’abalwana bakendisyalekula busana n’enyota;
14 Abakalapa omo kosa ye Samaria n’eribugha bati:
“Oko kwenene-kwenene ngoko omungu waghu Dani aliho!”
Kandi “oko kwenene-kwenene ngoko hali enzira eyikaya e Beeri-sheba”
Bakendisyawa ahisi kandi sibendisyasyahangana.’”