Esyonyimbo
118 Muhe Yehova y’ewasingya kusangwa ni mubuya;
Olwanzo lwiwe oluteleghula ni lwa kera na kera.
2 Lino Israeli abughe ati:
“Olwanzo lwiwe oluteleghula ni lwa kera na kera.”
3 Lino ab’enyumba ya Haruni babughe bati:
“Olwanzo lwiwe oluteleghula ni lwa kera na kera.”
4 Lino abakubaha Yehova babughe bati:
“Olwanzo lwiwe oluteleghula ni lwa kera na kera.”
6 Yehova ali haghuma naghe; sinendyubaha.
Omundu anganikolaki?
7 Yehova ali haghuma naghe, ni muwatikya* waghe;
Ngendisyalangira abaniponire bakakindwa.
8 Kyuwene eriyira Yehova mo busayiro
Omo mwanya w’eriyiketera abandu.
9 Kyuwene eriyira Yehova mo busayiro
Omo mwanya w’eriyiketera abanya-mwami.
10 Ebihanda byosi mubyanitimbako,
Aliwe omo rina lya Yehova,
Munahighabyo.
11 Mubyanitimbako, inga, mubyanitimbako oko mbande syosi,
Aliwe omo rina lya Yehova
Munahighabyo.
12 Mubyanitimbako ng’esyonzuki,
Aliwe mubyalima luba ng’omuliro owakaka omo kisaka ky’amahwa.
Omo rina lya Yehova,
Munahighabyo.
13 Munakunwa* kutsibu nangawa ahisi,
Aliwe Yehova mwaniwatikya.
14 Yah ni buwamo bwaghe n’amaka waghe,
Kandi abiribya mulamo waghe.
15 Omulenge w’obutseme n’ow’omulamo*
Ali omo mahema w’abatunganene.
Ebyala by’amali bya Yehova binemukangania amaka wabyo.
16 Ebyala by’amali bya Yehova binemuyihamya;
Ebyala by’amali bya Yehova binemukangania obutoki bwabyo.
17 Sinendihola, iyehe, ngendibyaho,
Nitoke eritulaghania emibiiri ya Yah.
18 Yah mwanikunga kutsibu,
Aliwe mwatanihira omo byala by’oluholo.
19 Munikingulire esyongyo sy’eritunganene;
Ngendingira musyo n’eripipa Yah.
20 Olu ni lukyo lwa Yehova
Abatunganene bakendisyingira mulo.
21 Ngendikupipa kusangwa muwanisubirya
Kandi muwabya mulamo waghe.
22 Eribwe eryo abahimbi baghana
Ryabiribya ribwe rikulu ry’oko ngonde.*
23 Omwatsi oyu akalua oko Yehova;
Ni w’eriswekera omo meso wetu.
24 Eki kye kiro ekyo Yehova abiriteghekania;
Tukenditsema n’eritsanga omo kiro ekyo.
25 Kisi, Yehova, tukakusaba, utulamaye!
Yehova, kisi, utuwatikaye erikinda!
26 Omuyisa ali oko oyukasa omo rina lya Yehova;
Tukabasunzira emiyisa itune omo nyumba ya Yehova.
27 Yehova ni Mungu;
Akatuha ekyakakala.
Imunawite oko mitahi omo byala byenyu,
Mwingire omo mukololo w’ekiro kikulu erihika oko mahembe w’ekiherero.
28 Uli Mungu waghe, naghe ngendikupipa
Mungu waghe, ngendikuhalamba.
29 Muhe Yehova y’ewasingya, kusangwa ni mubuya;
Olwanzo lwiwe oluteleghula ni lwa kera na kera.