Yeremia
10 Inywe bandu be Israeli, muhulikirire ebinywa ebyo Yehova abiribugha busana nenyu. 2 Yehova ati:
“Isimwakola ng’abandu b’ebihanda,
Kandi isimwasagha busana n’ebiminyikalo by’elubula
Kundi bikaleka ebihanda ibyasagha.
3 Kusangwa ebyo bandu babeghere erikola ni bule.
Omufundi akakonda omuti w’omo musitu,
Neryo iniakokotyamo esanamu omo kyombo kiwe.*
4 Bakapambayo omo feza* n’omo horo.
Bakakongomereramo emisumari omo hama yikasyatera.
5 Yiri ng’erihereko eriri omo ririma ry’esyokokombre, siyangabugha;
Yikahekawa, kundi siyangatoka erighenda.
Isiwasaghayo, kundi siyangakuhutalya,
Kandi siyangakola ekindu kyosi-kyosi ekyuwene.”
6 Yehova, sihali oyuli nga we.
Uli mukulu, n’erina ryaghu ni rikulu kandi riri n’obutoki.
7 Nindi yutewangakusagha, iwe Mwami w’ebihanda, kundi ko litolere ritya.
Kundi omo bandu bosi b’amenge b’omo bihanda n’omo mami wabo wosi,
Simuli n’omundu n’omughuma oyuli nga we.
8 Abosi ni bakiru kandi sibelengekanaya.
Eriligha uti omuti akukangiriraye, aho niyitalukako!
9 Ebinzanza by’efeza* bikalusibawa e Tarshishi, n’ehoro ikalusibawa e Ufazi,
Ebyo omufundi n’omuhesi bakakolesaya.
Esyongyimba sy’esyosanamu sikokotibwe omo syouzi sy’erangyi ye ble* n’omo bweya bw’erangyi y’olubono-bono.*
Esyosanamu syosi esyo syakokotibawa n’abafundi.
10 Aliwe Yehova, iye y’oMungu w’ekwenene.
Ni Mungu oyuliho kandi ni Mwami wa kera na kera.
Ekihugho kikendisyalabamo musiki busana n’erihitana riwe rinene,
Sihali ekihanda ekikendisyavumilia erihitana riwe.
11* Ukendibabwira uti:
“Emiungu eyatahangyika olubula n’ekihugho
Ikendihwa oko kihugho n’eyikwa w’olubula luno.”
12 Iye yo wabumba ekihugho omo kaghala kiwe,
Iye yo wahiraho ekitaka ekikerako akalyo omo menge wiwe
Kandi iye yo wasanza olubula omo bwenge bwiwe.
13 Omughulu akowisaya omulenge wiwe,
Amaghetse awali elubula akaghunga,
Kandi oMungu akaleka ebitu* ibyeruka bikalua oko mipaka y’ekihugho.
Akaleka ihabya amapalyo embula ikawa,*
Kandi akalusaya erihunga ry’omo madepo wiwe.
14 Obuli mundu akakola lukiru-kiru kandi butsira bwenge,
Obuli muhesi akendisyahemuka busana n’esanamu eyo alyabatsa,
Kundi esanamu yiwe y’emetale eyo balyayeyukaya ni mabehi,
Kandi esyosanamu esyo sisirimo kirimu.*
15 Esyosanamu esyo ni bule, ni bindu ebitolere erisekereribwa.
Sikendisyahwaho omughulu ekiro ky’eritswerasyo kikendisyahika.
16 Oyuli mwandu wa Yakobo syali ng’ebindu ebyo,
Kundi iye yo wahangyika ebindu byosi,
Na Israeli y’omutso w’omwandu wiwe.
Yehova w’emilondo ryo rina riwe.
17 Utole omughanda waghu owali ahisi,
Iwe mukali oyo babiritimbako batoke erilwa naghu!
18 Kundi Yehova ati:
“Lero ngendighusa abikalani b’ehihya w’ekihugho,*
Kandi ngendileka ibahikirwa n’obuhanya.”
19 Bulighe okw’ingye, kundi nabiribunika!
Ekironda kyaghe sikyangalama.
Naghe munabugha niti: “Ni kwenene, obo b’obukoni bwaghe, nitolere inayiyinia busana n’obukoni obo.
20 Ehema yaghe yabiritsandibwa, n’esyokamba syosi sy’ehema yaghe syabiritwibwa.
Abana baghe babirinisigha, sibakiri hano.
Sihakiri oyo wangimania ehema yaghe kutse erimania ebitambara by’ehema yaghe.
21 Kundi abalisya babiriyiwata lukiru-kiru,
Kandi sibetabulya Yehova y’obusondoli.
Ekyo kyo kiryaleka ibatakola n’amenge.
N’esyonyama syabo syosi syabiripanzwa-panzwa.”
22 Hulikirira! Engulu yinemwasa!
Efuyo nene yinemwasira omo kihugho ky’oko luhande lw’endata,
Busana n’eriyira emiyi ye Yuda mo matongo, mo bwikalo bw’emyondo.*
23 Yehova, ninasi ndeke ngoko omundu syawite obutoki bw’eriyisondola.
Omundu oyukaghenda syawite n’obutoki bw’erisondola ebika biwe.
24 Yehova, unihengemule erikwamana n’ebitunganene.
Aliwe isiwanihengemula omw’ihitana ryaghu, ukasyanibughaho.
25 Utulire ekinigha kyaghu oko bihanda ebitekutsomana
N’oko bitunga ebitebirikira erina ryaghu.
Kundi babiritomera Yakobo,
Babirimutomera erihika oko kika ky’erimubughaho.
Kandi babiriyira ekihugho kiwe mo matongo.