Ebaruha oko Abanya Roma
2 Mbuli wangabyandi, sighuwite eky’eriyihambulisaniamo wamabibya ukatswera abandi, busana n’erikola emyatsi eyo naghu ukanakola. Omughulu ukatswera abandi ukabya ighukakanganaya ngoko naghu utolere eribana amalipizi. 2 Aliwe, tunasi ngoko omughulu oMungu akatswera abandu abakakola emyatsi eyiring’eyo, akatswerabo omo kwenene.
3 Ukabya watswera abandu abakakola emyatsi eyo naghu ukanakola, ukalengekanaya uti naghu oMungu syendisyakutswera? 4 Siwasi ngoko akakukanganaya olukogho lunene, erikughanyira, n’erihanda omutima? Sighulangire ngoko, kundi oMungu awite omutima mubuya, akasonda erikuwatikya utoke eribindula omutima waghu? 5 Aliwe, omughulu ukabyamo erighundu, n’erighana eribindula omutima waghu, oMungu akendisyakuha amalipizi ekiro kiwe ky’erihitana kyahika. Ekyo kikendisyabya omughulu oMungu akendisyatswera abandu omo ritunganene. 6 Akendisyahemba kutse eriha obuli mundu amalipizi erikwamana n’emyatsi eyakola. 7 Abateleka erikola ebyuwene, akendisyabaha engebe ya kera na kera. Abandu abo, bakasonda olukengerwa, erisikibwa embere sy’oMungu, n’engebe ya kera na kera. 8 Aliwe, oMungu akendisyahitana n’eriha amalipizi abandu abanzire obuhaka n’abakaghana ekwenene. 9 Obuli mundu,* angabya Muyahudi kutse Mugiriki, oyukakola ebibi akendisyaghalwa. 10 Aliwe, obuli mundu oyukakola ebyuwene, oMungu akendisyamuha olukengerwa, erisikibwa, n’obuholo, eritsuka oko Muyahudi n’Omugiriki kutya. 11 OMungu syalimo akasololo.
12 Abosi abakola amalolo isihalihabya Emighambo ya Musa bakendisyahola nomo habya isihalihabya Emighambo. Aliwe, abosi abakola amalolo ihamabibya Emighambo bakendisyatswerwa erikwamana n’Emighambo eyo. 13 OMungu syalilangira omundu mo mutunganene busana n’eryowa Emighambo risa. Aliwe, oyukakola ebyo emighambo ikabugha oyo musa yo Mungu akalangiramo mutunganene. 14 Kusangwa abate Bayahudi sibawite Emighambo. Aliwe, omughulu emitima yabo ikabakuna erikola ebiri omo mighambo, ekyo kikakanganaya ngoko emighambo eyo yiri omo mitima yabo. 15 Bakakanganaya ngoko ebiri omo Mighambo bihandikire omo mitima yabo. N’obunya-mutima* bwabo bukakanganaya ngoko ni kwenene. Amalengekania wabo akabatsongera kutse iniabimira. 16 Emyatsi ko yikendisyabya yitya omughulu erilabira Kristo Yesu, oMungu akendisyatswera emyatsi eyo abandu bakakola omo bubiso-biso. Omwatsi oyo nagho ali omo ngulu mbuya eyo ngatulaghanaya.
17 Iwe ukatayahulamo Muyahudi, ukayiketera emighambo, n’eriyiheka busana n’oMungu waghu. 18 Unasi eby’oMungu anzire kandi ukaligha emyatsi eyuwene kundi wabirikangiriribwa Emighambo. 19 Iwe wikirirye ngoko wanganasondola endimetime n’erikolerya abali omo mwirimya. 20 Ukalengekanaya uti wanganakunga omukiru, n’erikangirirya abana kundi wabiryowa n’eriminya ekwenene eyiri omo Mighambo. 21 Aliwe iwe ukakangiriraya abandi, busanaki sulitsuka eriyikangirirya? Wanganakangirirya abandi uti “Isimwiba,” iwe ighunemwiba? 22 Wanganabwira abandi uti “Isimwakola obusingiri,” aliwe iwe ighunemukolabo? Wanganabugha uti uponire esyosanamu, aliwe ighunemwiba ebindu ebiri omo syohekalu? 23 Ukayihalamba uti wasi emighambo y’oMungu, neryo busanaki ukahemula oMungu omwitaruka oko Mighambo yiwe? 24 Kyo kikaleka Amasako iniabugha ati: “Abandu omo kihugho banemubugha muhanda oko rina ry’oMungu busana n’emyatsi eyo mukakola.”
25 Eribanibwa rikabya ry’omughaso omundu amakwama ebiri omo Mighambo. Omundu amabula erikwama ebiri omo Mighambo, akabya ng’oyutewatabanibwa. 26 Aliwe, omundu oyutabanibwe amakwama ebiri omo Mighambo, ukalengekanaya uti oMungu isyendimulangira ng’omundu oyubanibwe? 27 Wabirikangiriribwa omwatsi w’eribanibwa kandi wabirikangiriribwa Emighambo, aliwe sulikwamayo. Neryo, omughulu omundu oyutabanibwe akakwama ebiri omo mighambo, akabya iniakakanganaya ngoko uli w’amakosa. 28 Eribya Muyahudi w’ekwenene siririlangirika ehihya. N’eribanibwa ry’ekwenene siririlangirika oko mubiri musa. 29 Obuyahudi bw’ekwenene bukabya omo mutima, kandi Omuyahudi w’ekwenene akabanibawa omo mutima erilabira ekirimu kibuyirire. Syalibya w’ekwenene busana n’erikwama ebiri omo Mighambo. OMungu yukapipa omundu oyo, butsira abandu.