Ezekieli
22 Kandi ekinywa kya Yehova mukyanihikako kiti: 2 “Iwe mughala w’omundu, unayiteghikire eribugha omulaghe w’eritswera* omuyi owaliko olubanza* lw’omusasi n’eriminyisyagho esyonye syagho syosi? 3 Ukendibugha uti, ‘Yehova Omukama Mukulu oko Bosi ati; “Iwe muyi owoswiremo eryuta omusasi, omuyi ogho endambi yagho inemwasa, omuyi owakakokotaya esyosanamu* esikita nye busana n’eriyitsandya. 4 Omusasi ogho wabiryuta abirileka iwabyako olubanza, n’eyosanamu syahgu esikita nye syabirileka iwabya oyuterire. Wabiryanguhya enduli y’ebiro byaghu n’enduli y’emyaka yaghu yabirihika. Busana n’ekyo, ngendikuyira mo kindu ekyo ebihanda bikatsuma n’ekindu ekyo ebihugho byosi bikasekereraya. 5 Ebihugho ebiri hakuhi naghu n’eby’ehali okw’iwe, bikendisyakusekererya, iwe uwite erina eriterire, kandi oyo woswiremo eribulungana. 6 Lebaya! Obuli mughuma w’oko bakulu be Israeli akakolesaya ehamuli yiwe eryuta omusasi. 7 Ewaghu, abandu bakaghonera abo baba wabo n’abo mama wabo. Bakaghalaya omubunga, ibanubya n’omwana oyutawite ise,* n’erinubya omukwa-kali.”’”
8 “‘Mukapona emyanya yaghe eyibuyirire kandi mukatsandaya esyosabato syaghe. 9 Ewaghu yiri abakalegha abandi bakalandamirira eryuta omusasi. Ewaghu bakalirayo amahere oko bitwa n’erikolayo emyatsi eyikit’isoni. 10 Ewaghu yiri abatekenga engyingo ya baba wabo,* kandi yiri abakaghotsera n’abakali abali omo butsandirya bw’ebiro byabo by’omwisi.* 11 Ewaghu, omundu akakola eby’esoyonye n’omukali wa mulikyabo, n’oghundi akatsandaya omwalyana wiwe omo myatsi y’esyonye, n’oghundi inyatsandya mwali wabo, mwali wa baba wiwe. 12 Ewaghu bakimaya ekyutuliro busana n’eryuta omusasi. Ukabweka iwahirako endundi kandi ukanza eryughutira oko bandi. Kandi ukiba oko bahimbani baghu kw’esyofranga. Kwenene, wabirinibirirwa kutsibu,’ Yehova Omukama Mukulu oko Bosi atya.
13 Neryo lebaya! Ngabanda oko byala busana n’esyonye sy’endundi eyite y’ekwenene eyo wabiribana na busana n’emikolere y’eryuta omusassi eyiri ewaghu. 14 Unemwendihanda omutima n’ebyala byaghu binemwendibya ibinasikire erihika oko kiro ngendiyira eky’erikola busana naghu? Ingye Yehova, ingyuwene-wene nabiribugha kandi ngendiyira eky’erikola. 15 Ngendikupanza-panzira omo bihanda n’erikupanza-panzira omo bihugho, kandi ngendibughaho obutsandirya bwaghu. 16 Kandi ukendihemulwa embere sy’ebihanda, neryo ukendiminya ngoko indi Yehova.’”
17 Neryo kandi ekinywa kya Yehova mukyanihikako kiti: 18 “Mughala w’omundu, enyumba ya Israeli yabiribya okw’ingye ng’omutsafu owakalusibawa omo ritale,* abosi bali ng’ekwivre* n’ebati n’ekyuma n’erisasi* ebiri omo muliro munene. Babiribya mutsafu owakalua omo feza.*
19 “Neryo okw’ekyo, Yehova Omukama Mukulu oko Bosi ati: ‘Kundi inywe bosi mwabiribya ng’omutsafu, ngabakuma-kumira haghuma omo Yerusalema. 20 Ngoko efeza* n’ekwivre* n’ekyuma n’erisasi* n’ebati bikanahindanibawa haghuma omo tanuru,* eribuhirwako omuliro n’eriyeyukibwa, nenyu ko ngendisyabahindania haghuma nitya omw’ihitana lyaghe n’omw’ikarama lyaghe. Kandi ngendisyababuhirira n’eribayeyukya. 21 Ngendisyabahindania haghuma n’eribabuhirako omuliro w’erihitana lyaghe, nenyu mukendisyayeyukira omo muyi. 22 Ngoko efeza ikanayeyukira omo tanuru,* nenyu mukendisyayeyukira mugho; nenyu mukendisyaminya ngoko ingye Yehova, nabiributulirako erihitana lyaghe.’”
23 Kandi ekinywa kya Yehova mukyanihikako kiti: 24 “Mughala w’omundu, ubwire omuyi oyo uti, ‘Uli kitaka ekitendisyeribwa kutse eriwako embula oko kiro ky’erihitana erikalire. 25 Ewaghu, abaminyereri baghu babiriya embita ng’endale* eyikatulanga enyama. Banemutomera abandu.* Banemunyegha obuteke n’ebindu by’obughuli. Babiriyira abandu bangyi abali omo muyi mo bakwa-kali. 26 Abahereri baghu babiriketa emighambo yaghe, kandi ko banemutsandaya emyanya yaghe eyibuyirire. Sibakyasi erighabula ekibuyirire n’ekitabuyirire, bakataluka n’eriminyikalya ekiterire n’eky’erire. Kandi bakaghana erikenga esyosabato syaghe, naghe ngahemulawa omo kati-kati kabo. 27 Abanya-mwami abali omo muyi bali ng’esyombwa sy’omoli* esikatulanga enyama y’obuhiyi; bakuta omusasi n’eriita abandu* bakasonda endundi eyite y’ekwenene. 28 Nikwa abaminyereri baghu babirihaka oko mikolere yabo kw’embemba. Bakalangira esyonzoli sy’amabehi n’erilaghula eby’amabehi; ibabugha bati: “Yehova Omukama Mukulu oko Bosi mwakabugha ati,” nibya Yehova isyetabugha. 29 Abandu b’omo kihugho babirinyegha n’eribya barahi, kandi babiryaghalya abali omo bwagha n’esyonzama, bakiiba omubunga n’erimughanira obulingirirania.’
30 “‘Naghe nabya ngasondya omo kati-kati kabo mo mundu oyo wangakokotya ahasambukere omo luhimbo lw’amabwe, kutse eriimana embere syaghe ahali ekyuna ekiri omo luhimbo busana n’erilwira oko kihugho, neryo ikyabya isikyangatasyaheribwa. Nikwa mundasunga n’omughuma. 31 Neryo ngendyutulira kubo kw’erihitana lyaghe, inatoghotyabo omo muliro w’erikarama lyaghe. Ebikaluira omo syonzira syabo, ngendisyaletabyo oko mitwe yabo,’ Yehova, Omukama Mukulu oko Bosi atya.”