Ebaruha oko Abanya Roma
10 Baghala betu, ekyo nanzire kandi ekyo ngasaba kutsibu kya kino: Abandu be Israeli basabulawe. 2 Nanganabugha niti bakakolera oMungu yo kutsibu, aliwe sibasi ndeke-ndeke ebyo oMungu anzire ibakola. 3 Kundi sibasi ebyo oMungu akalangiramo bitunganene, bakayihiriraho emighambo yabo. Busana n’ekyo, mubatasikya emighambo y’oMungu eyikakanganaya ekitunganene nga kyo kyahi. 4 Erilabira Kristo, Emighambo muyahika oko nduli. Neryo lino, oyukamwikiriraya akalangirawamo mutunganene.
5 Musa mwakangania ngoko omundu angalangirwamo mutunganene busana n’erikwama Emighambo omughulu abugha ati: “Oyukakola emyatsi eyi akendisyabyaho busana nayo.” 6 Aliwe kandi, Amasako abuyirire akakanganaya ngoko erikirirya ryo rikaleka omundu inialangirwamo mutunganene. Akabugha ati: “Isiwayibwira omo mutima waghu uti, ‘Nindi y’ukendisambira elubula?’ ni bugha ambu, eriyenda Kristo n’erimusubya oko kihugho, 7 Kutse, ‘Nindi y’ukendindaghalira omo kyuna kiri-kiri?’ ni bugha ambu, eriyalubukya Kristo.” 8 Aliwe, Amasako akabugha atiki? Akabugha ati: “Ekinywa sikiri hali okw’iwe, kiri omo buno bwaghu n’omo mutima waghu.” Ekyo kyo “kinywa” ky’erikirirya ekyo tukatulaghanaya. 9 Kundi wamabibugha embere sy’abandu uti Yesu ni Mukama n’erikirirya omo mutima waghu ngoko oMungu mwamulubukya, iwukendisyasabulwa. 10 Kusangwa ebyo wikirirye omo mutima waghu byo bikakanganaya ng’utunganene, kutse iyehe. Aliwe, eribwira abandi okw’ebyo wikirirye rikendisyaleka iwasabulwa.
11 Kusangwa Amasako akabugha ati: “Sihali n’omundu n’omughuma oyumwikirirye oyukendisyahemuka.” 12 Sihakiri Omuyahudi n’Omugiriki, itwe bosi tuli n’Omukama mughuma. Akawatikaya kutsibu abosi abakamulakira. 13 Kusangwa “obuli mundu oyukabirikira erina rya Yehova* akendisyasabulwa.” 14 Aliwe, bakendisyabirikira ryo bati isibalibatamwikirirya? Kandi bakendisyamwikirirya bati isibalibatamuminya? Kandi bakendisyamuminya bati isihali omundu oyo wangabakangirirya? 15 Kandi bakendisyakangirirya bati isihali oyukabatuma? Kiri ngoko Amasako akabugha ati: “Ebisando by’abakatulaghanaya engulu mbuya y’emyatsi eyuwene, byuwene kutsibu.”
16 Mubatowa engulu mbuya kusangwa Isaya akabugha ati: “Yehova,* nindi yo wabirikirirya omwatsi ogho twabugha?” 17 Kundi ebyo omundu akowa byo bikaleka inyikirirya. N’omundu akowa ihalyabya oyukakangiriraya oko Kristo. 18 Aliwe, ngabulaya nitya busana ne Israeli: Mubanabana akanya k’eryowa? Inga! Omulenge wabo mowika omo kihugho kyosi. N’ebyo babya bakatulaghania mubyahika oko bandu kw’ehosi-hosi. 19 Kandi ngatasyabulaya: Abaisraeli mubanowa, kutse iyehe? Musa yo watsuka eribugha ati: “Nasyaleka imwahitana busana n’abandu b’ebindi bihanda. Kandi ngendisyaleka imwahitana busana n’ekihanda ekitawite amenge.” 20 Na Isaya mwabugha n’obutubaha ati: “Abatabya bakanisonda-sonda bo banibana, n’ababya isibaniasi bo baniminya. Munabanika omo kati-kati k’abandu abatabya bakanisonda-sonda. Munayikangania omo kati-kati k’abandu ababya isibaniasi.” 21 Aliwe, mwabugha busana ne Israeli ati: “Obuli kiro, ngalemba-lemba abandu abatyowa n’abalimo erighundu niti banisubire.”