Hosea
14 “Israeli, subira Yehova oMungu waghu,
Kundi mughukatwikala busana n’ekosa yaghu.
2 Musubire Yehova, n’erimubwira muti: ‘Kisi, ghanyira ekosa yetu kandi ulighe ekyuwene,
Kandi tukendikupipa omo minywa yetu,
Ebinywa byetu by’erikupipa bibye ng’esyonume sy’esyonde esikine nyilere* esyo tukakuherera.
3 Asiria syendisyatusabula.
Sitwendisyasambira oko syosabayiri,*
Kandi sitwendisyasyabugha tuti, “Mungu wetu!” tukabwira ebindu ebyo tulyakokotaya,
Kundi n’iwe ukaghanyira omwana oyutawite baba.’*
4 Ngendisyalamya erileghula ryabo.
Ngendisyanzabo omw’anza ryaghe,
Kundi sinikibahiteneko.
5 Oko Israeli, ngendisyabya ng’ekimi;
Akendisyasako amawa ng’eriwa ry’elise*
Kandi akendisyahanda emilihi ng’emiti ye Lebanoni.
6 Emitahi yiwe yikendisyayisanza,
Obubuya bwiwe bukendisyabya ng’obubuya bw’omuti w’omuzeituni.
N’ekikumbo kiwe kikendisyabya ng’ekikumbo kye Lebanoni.
7 Bakendisyatasyikala omo kitsutsu kiwe.
Bakendisyalasya engano, kandi bakendisyalasa ng’omuti w’omuzabibu.
Bakendisyakumayira ng’edivai ye Lebanoni.
8 Efraimu akendisyabugha ati, ‘Ngenditasyayira esyosanamu esi syo niti?’
Ngendisyasubirya n’erimuteya.
Ngendisyabya ng’omuti w’ekilaghu owaboghire.
Kundi n’ingye ngendisyakuha amatunda.”
9 Nindi yuli n’amenge? Owe emyatsi eyo.
Nindi yuli n’obwenge? Aminye emyatsi eyo.
Kundi esyonzira sya Yehova silungukere,
Abatunganene bakendilaba musyo;
Aliwe abakakola amalolo bakenditwikala musyo.