Ebaruha oko Abaebrania

6 Neryo lino, kundi twabirilaba oko makangirirya w’erimbere awalebirye Kristo, tuyikase eribya abandu abakulire. Situsubire amakangirya w’erimbere, ni bugha ambu eritasyigha ngoko ritolere itwabindula omutima n’erileka emyatsi eyitawite mughaso, erikirirya oMungu, 2 amakangirirya awalebirye emihanda mbiriri-mbiriri y’olubatiso, erihira oko bandu kw’ebyala, erilubuka ry’abaholi, n’eritswera ry’oMungu rya kera na kera. 3 N’ekyo kyo tunemwendikola, oMungu amatulighira.

4 Oko kwenene, abosi ababirikoleribwa n’ababirighonza oko kihembo kya bule ekikalua elubula, ababirihabwa ekirimu kibuyirire, 5 ababirighonza ekinywa kyuwene ky’oMungu, n’emyatsi y’obutoki eyikendisyabya omo kihugho ekikasa,* 6 aliwe ababiritera, sikyangatokekana eritasyabawatikya batoke eribindula omutima, kusangwa ibibene-bene bakatasyakongomerera Omughala w’oMungu y’oko muti n’erimuhemula embere sy’abandu. 7 Kundi ekitaka kikabya ikinemubana emiyisa y’oMungu omughulu kikanywa amaghetse w’embula awakabya inianemutoghongera kukyo, neryo ikyalasya ebiti ebikendiwatikya abakalimakyo. 8 Aliwe, kyamabilasya amahwa n’emisaki-saki, ikikendighanwa kandi ikikisiya ikyatakirwa, n’oko nduli ikikendisyatimibwa.

9 Aliwe nomo tunemubugha tutya, twikirirye ngoko inywe, banzwa betu, mune omo hali eyuwene eyikatwala oko mulamo. 10 OMungu si mundu mubi, neryo syendisyibirirwa ebyo mukakola n’olwanzo olo mwakanganaya busana n’erina riwe omw’ikolera ababuyirire n’eritendileka eribakolera. 11 Aliwe, twanzire obuli mughuma w’okw’inywe iniabya n’omuhwa mughumerera. Ekyo kikendibawatikya eribya n’amaha awasikire erihika oko nduli. 12 Simubye baghata, aliwe mukwame emibere y’abandu abo busana n’erikirirya n’erihanda omutima, bakabana ebyo Mungu abalagha.

13 Omughulu oMungu alagha eritsumula Abrahamu, mwalapa omo rina riwe, kundi isihali omukulu okw’iye. 14 Mwabugha ati: “Oko kwenene, ngendikutsumula, n’erikanyirirya olubuto lwaghu.” 15 Neryo Abrahamu abere abihanda omutima, mwabana ekyo Mungu amulagha. 16 Abandu bakalapa omo rina ry’omundu mukulu okw’ibo, n’ebinywa byabo by’erilapa bikabughaho obuhaka bosi-bosi kundi ekyo kikakanganaya ndeke-ndeke ngoko ebyo balyabugha ni kwenene. 17 Kutya, omughulu oMungu ayisogha erikangania ndeke-ndeke abakendisyalya omwandu erikwamana n’ebyo oMungu abirilagha, ngoko ebyo anzire ibyabya sibyendisyabinduka, mwalapa atoke erikangania ngoko ekyo alyalagha ni kwenene. 18 Mwakola atya kusudi omo myatsi ibiri eyitebinduka, omo myatsi eyo sikyangatokekana oMungu iniabugha amabehi, itwe twabirisaghira oko Mungu tutoke erihamba ndeke amaha wetu kundi twabirisikibwa mutima. 19 Tuwite amaha ayo awali ng’enanga* eyikasikaya engebe* yetu. Amaha aya ni w’ekwenene, asikire, kandi akingira enyuma sy’erido, 20 aho Yesu ingira n’eritukingulira enzira. Neryo abiribya muhereri mukulu wa kera na kera nga Melkisedeki.