Yona
1 Yehova mwakania na Yona* mughala wa Amitai. Mwamubwira ati: 2 “Hangana, uye e Ninawi, omuyi munene, uyabwire abandu be Ninawi uti ngendibaha amalipizi, kundi nabirilangira obubi bwabo.”
3 Aliwe Yona mwahangana n’eritibita e Tarsisi, amaya hali oko Yehova. Mwandaghalira e Yopa, amasunga obwato obukaya e Tarsisi. Mwaliha esyofranga sy’etike, amasambira omo bwato, neryo amaghenda nabo e Tarsisi, hali oko Yehova.
4 Neryo Yehova mwalabya oko ngetse kw’ekihunga kinene. Engetse muyalabako ekihunga kinene erihika oko kika obwato bwamasonda eritsutsangika. 5 Abakakolera omo bwato mubasagha kutsibu; obuli mughuma wa kubo mwatsuka erilakira omungu wiwe ati amuwatikaye. Mubatsuka n’erighusa ebindu ebyabya omo bwato omo ngetse kusudi bwanguhirire. Aliwe Yona abya iniabirindaghalira omo kitswe ky’emwisi-mwisi ky’obwato, abya iniabiriyilambika n’eriyato kutsibu. 6 Oyukaghendaya obwato mwaseghera hakuhi na Yona, amamubwira ati: “Ukaghotsera busanaki? Hangana, ulakire omungu waghu! Kwa muhwa oMungu w’ekwenene anganalangira ebyo tunemulabamo, neryo iniatuwatikya tukasyahola.”
7 Neryo mubabwirana bati: “Mwase, tukole obukanga tutoke eriminya oyukaleka itwahikirwa n’obuhanya obu nga nindi.” Mubakola obukanga, neryo obukanga bwamatoghera oko Yona. 8 Mubamubwira bati: “Kisi tubwire, nindi yukaleka obuhanya obu ibwatuhikira? Ukakola mubiri ki, kandi ukaluahi? Uli w’omo kihugho kyahi, kandi uli w’omo kihanda kyahi?”
9 Mwasubirya ati: “Niri Muebrania, kandi ngaramaya* Yehova oMungu w’elubula, oyo wahangyika engetse n’ekitaka ekyumire.”
10 Mwabya abibugha atya, abalume abo mubatasyasagha kutsibu. Mubamubulya bati: “Ulyakolaki?” (Abalume abo mubafumbula ngoko Yona akatibita hali oko Yehova, kundi Yona yo wababwira atya.) 11 Neryo mubamubulya bati: “Tukukolereki kusudi engetse yitulere?” Kundi engetse yabya iko yinemulola embere erighunga. 12 Mwabasubirya ati: “Munisumbe n’erinighusa omo ngetse, neryo engetse ikenditulera; kundi ninasi ngoko n’ingye ngaleka ekihunga kinene eki ikyabahikira.” 13 Abalume abo mubayikasa erisubya obwato bw’oko kitaka ekyumire,* aliwe mubatatoka, kundi engetse yabya iko yinemulola embere erighunga oko syombande syosi.
14 Enyuma sy’aho, abalume abo mubalakira Yehova bati: “Kisi Yehova, isitwahola busana n’omulume* oyu! Isiwatuhirako omusasi owate n’ekosa, kundi Yehova, mughukakola ngoko wanzire.” 15 Neryo mubasumba Yona, bamamughusa omo ngetse, n’engetse muyatulera. 16 Enyuma sy’aho, abalume abo mubasagha Yehova yo kutsibu; mubaherera Yehova y’obuhere kandi mubayilagha erimukolera emyatsi milebe.
17 Neryo Yehova mwatuma esamaki nene yimere Yona. Yona mwabugha omo nda y’esamaki mw’ebiro bisatu.