Eryibuka Ebihano
8 “Litolere iwakwama emighambo yosi eyo ngakubwira munabwire, utoke eribyaho mughulu muli, erikanyirira, eringira, n’erimya ekihugho ekyo Yehova alapa eriha abotata-kulu waghu. 2 Wibuke enzira nyiri eyo Yehova oMungu waghu akulabayamo omo myaka 40 eyi omo mbwarara. Mwakola atya erikukangirirya ngoko litolere iwayikehya, kandi mwakola atya atoke erikulengako, kusudi aminye ebiri omo mutima waghu, n’eriminya nga unemwendisyakwama emighambo yiwe, kutse iyehe. 3 Neryo mwakukangirirya ngoko litolere iwayikehya, kandi mwaleka enzala ikupike, kandi mwakuha amana, akalyo oko watabya wasi n’oko abotata-kulu baghu batabya basi, kusudi uminye ngoko omundu syalibyaho busana n’akalyo kasa, aliwe omundu akabyaho busana n’obuli kinywa ekikalua omo buno bwa Yehova. 4 Esyongyimba esyo wabya ukambala musitakula, n’ebisando byaghu mubitabimba-bimba omo myaka 40 eyo. 5 Unasi ndeke-ndeke omo mutima waghu ngoko Yehova oMungu waghu abya akakukunga, ngoko mundu akakunga omwana wiwe.
6 “Neryo utolere iwakwama emighambo ya Yehova oMungu waghu omw’ilendera omo nzira siwe n’erimusagha. 7 Kundi Yehova oMungu waghu akakutwala omo kihugho ekyuwene, ekihugho ekirimo esyonyusi, esyongununuko, n’esyonunga, esikasenda omo ribanda n’omo kiharo ky’ebitwa, 8 ekihugho ekikeramo engano n’ekisusu, emizabibu, esyotini, n’amakomamanga, ekihugho ekirimo amaghuta w’emizeituni n’obuki, 9 ekihugho ekitendisyabulamo akalyo, kandi ekihugho ekitendisyabulamo kindu, ekihugho ekirimo amabwe awalimo ekyuma, ekihugho ekirimo ebitwa ebyo mukendisyabya mukatakulamo ekwivre.*
10 “Ukendisyabya wabirya n’eryughuta, litolere iwasyapipa Yehova oMungu waghu busana n’ekihugho ekyuwene ekyo abirikuha. 11 Uyiteghaye, isiwasyabirirawa Yehova oMungu waghu omw’itendikwama emighambo yiwe, ebihano biwe, n’ebyalayiro biwe ebyo ngakuha munabwire. 12 Ukendisyabya wabirya, eryughuta, n’erihimba amanyumba aghuwene n’eriikala mugho, 13 esyonde syaghu, esyombuli syaghu, n’esyombene syaghu sikendisyabya syabikanyirira, n’omughulu ukendisyabya n’efeza* nene n’ehoro nene, n’ebindu bingyi ebyo buli muhanda, 14 uyikase omutima waghu isyasyabyamo erighundu, n’erileka iwibirirwa Yehova oMungu waghu, oyo wakulusaya omo kihugho kye Misri, omo nyumba y’obukobe, 15 oyo wakulabaya omo mbwarara nene kandi eyikasaghisaya, eyirimo ekitaka ekyumire n’ekitemo maghetse, omuli esyonzoka esirimo esumu n’esyonge. Mwalusya amaghetse w’omo ribwe eribasire 16 kandi mwakulisya amana omo mbwarara, agho abotata-kulu waghu bataminya, atoke erikukangirirya ngoko litolere iwayikehya kandi atoke erikulengako utoke erisyabana endundi omo biro ebikasa. 17 Wamabisyayibwira omo mutima waghu uti, ‘Akaghala kaghe n’obutoki bw’ebyala byaghe byo biryaleka inayira oko bindu ebi,’ 18 wibuke ngoko Yehova oMungu waghu yulyakuha akaghala akalyaleka iwayira oko bindu ebyo. Mwakuhako busana n’erisikya endaghane eyo akola n’abotata-kulu waghu, ngoko biri munabwire.
19 “Mwamabisyibirirwa Yehova oMungu wenyu n’erikwama eyindi miungu, mwamabisyakolerayo n’erikukamirayo, ngababwira munabwire ngoko imukendisyahwaho. 20 Imukendisyahwaho ng’ebihanda ebyo Yehova anemutoghotya embere syenyu, kundi isimwetahulikirira omulenge wa Yehova oMungu wenyu.