Yeremia
37 Omwami Zedekia mughala wa Yosia mwatsuka eritabala omo mwanya wa Konia* mughala wa Yehoyakimu, kundi omwami Nebukadneza* we Babiloni mwamuyira mo mwami w’ekihugho kye Yuda. 2 Aliwe iye, abaghombe biwe, n’abandu b’omo kihugho mubatahulikirira ebinywa ebyo Yehova abugha erilabira omuminyereri Yeremia.
3 Nikwa omwami Zedekia mwatuma Yehukali mughala wa Shelemia, na Zefania mughala w’omuhereri Maaseya ati bayabwire omuminyereri Yeremia bati: “Kisi, utusabire oko Yehova, oMungu wetu.” 4 Oko mughulu oyo, Yeremia abya inianemulaba-laba bwiranda omo kati-kati k’abandu, kundi abya isyalyahirwa omo muliki. 5 Aliwe abasuda ba Farao babya ibabirilua e Misri. Abakaldayo ababya ibaritimba oko muyi we Yerusalema batoke erilwa nagho mubabya babyowa omwatsi oyo, mubalua e Yerusalema. 6 Neryo Yehova mwakania n’omuminyereri Yeremia, amamubwira ati: 7 “Yehova, oMungu we Israeli, ati, ‘Bino byo utolere iwabwira omwami we Yuda, oyulyakutuma okw’ingye ati unibulaye obusondoli: “Hulikirira! Abasuda ba Farao abakasyakuwatikaya bakendisuba omo kihugho kyabo, kye Misri. 8 N’Abakaldayo bakenditasyasa n’erilwa n’omuyi ono. Bakendihambagho n’eritimyagho omo muliro.” 9 Yehova ati: “Isimwayiteba omw’ibugha muti, ‘Oko kwenene, Abakaldayo bakendilua omo kiharo kyetu,’ kundi sibendighenda. 10 Nomo mwangita abasuda bosi b’Abakaldayo abakalwa nenyu kandi nomo hangasighala abalyahutala basa, abalyahutala abo ibakendihangana, ibakendilua omo mahema wabo, n’erisyatimya omuyi ono omo muliro.”’”
11 Abasuda Bakaldayo mubabya babilua hakuhi ne Yerusalema busana n’erisagha abasuda ba Farao, 12 Yeremia mwasonda erilua e Yerusalema, amaya omo kiharo kya Benyamini, kusudi ahabawe ekihande ekyo abya atolere erihabwayo omo kati-kati k’abandu. 13 Aliwe omuminyereri Yeremia mwabya abihika oko Lukyo lwa Benyamini, omukulu w’abateya mwamuhamba. Omukulu oyo abya iniakahulawa mo Iriya mughala wa Shelemia, mughala wa Hanania. Mwabwira Yeremia ati: “Ukatswa! Neryo ukasonda eriyayighunga n’Abakaldayo!” 14 Aliwe Yeremia mwamubwira ati: “Ekyo si kwenene! Si bugha ambu ngatswa nitoke eriyayighunga n’Abakaldayo.” Aliwe mwatamuhulikirira. Neryo Iriya mwahamba Yeremia, amamutwala eyiri abakulu. 15 Abakulu babya ibabirihitana oko Yeremia ko kutsibu, neryo mubamuhunza n’erimubohera omo nyumba y’omusekretere Yehonatani, eyo babya ibabiriyira mo ngomo. 16 Mubahira Yeremia omo ngomo y’omo kitaka,* omo kighuma ky’oko byumba ebyo olutwe lwabyo luyilingire. Mwabughamo biro bingyi.
17 Kiro kighuma, omwami Zedekia mwabugha ati bayende Yeremia. Omwami mwamubulirya amabulyo omo nyumba yiwe omo bubiso-biso. Mwamubulya ati, “Yehova mwakanabugha kinywa?” Yeremia mwamusubirya ati, “Ehee!” Neryo kandi Yeremia mwabugha ati, “Ukendihirwa omo byala by’omwami we Babiloni!”
18 Kandi Yeremia mwabwira omwami Zedekia ati: “Mungakukolera erilolo ryahi, iwe, abaghombe baghu, n’abandu aba, ekiryaleka iwanihira omo ngomo? 19 Abaminyereri benyu bali hayi, abababwira bati, ‘Omwami we Babiloni syendisyalwa nenyu kandi syendisyalwa n’ekihugho kino’? 20 Neryo lino, iwe mukama waghe kandi mwami waghe, kisi hulikirira. Kisi, unikanganaye olukogho. Isiwanisubaya omo nyumba y’omusekretere Yehonatani, kundi ingendiholerayo.” 21 Neryo omwami Zedekia mwabugha ati Yeremia aboherawe omo Kibugha ky’Abateya. Obuli kiro, ibakaha Yeremia omukati w’omuviringo owabya akalua omo ndaki y’abakahuka emikati, erihika omughulu emikati yosi yahwa omo muyi. Neryo Yeremia mwasighala omo Kibugha ky’Abateya.