MIKA
1 Bino by’ebinywa ebyo Yehova abwira Mika* we Moresheti, oko mughulu wa Yotamu, Ahazi, na Hezekia, abami be Yuda, kandi by’ebinywa ebyo alangira omo nzoli ebilebirye e Samaria ne Yerusalema.
2 “Inywe bandu bosi, muhulikirire!
Ekihugho n’ebyosi ebirimo mukyo, muteghe okutu,
Yehova Omukama Mukulu oko Bosi abashitake
Yehova abashitake iniane omo hekalu yiwe nyibuyirire.
3 Kundi Yehova anemulua omo mwanya wiwe;
Akendindaghala n’erilyata oko myanya y’endata y’ekihugho.
4 Ebitwa bikendiyeyuka akalyata kubyo,
N’emisya* ikendilabamo emighenyo
Ng’ekisese ekiri embere sy’omuliro,
Ng’amaghetse awalyutawa omo bwandaghala.
5 Ebyosi ebyo bikendisyabya busana n’amakosa wa Yakobo,
Busana n’amalolo w’Abaisraeli.
Nindi yo waleka Yakobo iniakola amakosa?
Samaria yo wataleka?
Nindi yo waleka e Yuda iyabya emyanya y’endata?
Yerusalema yutaleka?
6 Ngendiyira e Samaria mo kilundo ky’ebisambukalirya by’emoli,
Ngendimuyira mo ririma ry’eriheramo emizabibu;
Ngendisyaghusa* amabwe wiwe omo musya,
Kandi ngendisyahimbula omuyi oyo, esyofondasyo sisa syo sikendisyasighala.
7 Esyosanamu siwe syosi esibatsire sikendisyatsutsangwa,
N’ebihembo byosi ebyo abya akabana omo bumbalaka bwiwe* bikendisyahisibwa omo muliro.
Ngendisyatsandya esyosanamu siwe syosi.
Kundi omusahara w’obumbalaka bwiwe waleka iniayikuma-kumirasyo,
Neryo kandi sy’akendisyalihamo abandi bambalaka.”
8 Busana n’ekyo, ngendisyalira n’eribya omo bulighe;
Ngendisyaghendera ahisi kandi inine ndumbu.
Ngendisyalaka ng’emyondo,*
N’erilira ng’esyombuni.
9 Kundi ekironda kiwe sikyangalama;
Kyabiriyahika ne Yuda.
Ekihunzo kyabiriyitsatsanga n’eriyahika oko mulango w’abandu baghe, eriyahika e Yerusalema.
10 “Isimwatulaghanaya omwatsi oyo we Gati;
Isimwalira n’ahake.
Muyikumbaghalaye omo ribu e Bet-afra.*
11 Inywe bikalani* be Shafiri, musoke imune ndumbu kandi imwabirihemuka.
Abikalani be Zaanani sibetahuluka.
Ekiriro kikendibya e Bet-ezeli, syendisyabawatikya.
12 Kundi abikalani* be Maroti babya bakalindirira ekibuya,
Aliwe Yehova abiribandaghalirya ekibi oko mulango we Yerusalema.
13 Inywe bikalani* be Lakishi, mubohere omutoka oko syosabayiri.*
N’inywe mwaleka mwali we Sioni iniakola amalolo,
Kundi mubakusungamo amakosa wa Israeli.
14 Neryo ukendisyaha Moresheti-gati y’ebihembo by’erimulagha uti aghende yambo.
Amanyumba we Akzibu abya akateba abami be Israeli.
15 Inywe bikalani* be Maresha, ngendileta oyukasinga* y’ewenyu.
Olukengerwa lwa Israeli lukendisyayahika e Adulamu.
16 Muhale emitwe yenyu n’eritwa esyonzwiri sy’abana benyu abo mwanzire kutsibu.
Muhale emitwe yenyu, ibye ng’ey’erisamba.
Kundi babiribalusyako abana benyu n’eribatwala omo bunyewa.”
2 “Bulighe oko abakapanga erikola ebibi.
Abakasoha erikola ebibi ibane omo syongyingo syabo!
Bukabya bwabikya, ibaberereryabyo,
Kundi bane n’obutoki bw’erikolabyo.
2 Bakayitsutsa amalima w’abene n’eripuragho;
Bakayitsutsa n’amanyumba w’abene n’erimyagho;
Bakimaya oko mundu kw’enyumba yiwe omo bwibi,
Bakimaya oko mundu k’omwandu wiwe omo bwibi.
3 Busana n’ekyo, Yehova ati:
‘Ngateghekaniraya abandu aba b’obuhanya, obo mutendibalako.*
Simwendisyasyaghenda mukayiheka, kundi ni mughulu w’obuhanya.
4 Ekiro ekyo, abandu bakendisyabya bakababughako omusyo,
Kandi bakendisyalira kutsibu busana nenyu.
Bakendisyabugha bati: “Twamahwa!
Mwaha abandi bandu b’ekitaka ky’abandu betu.
Batahi tu akatulusaya kyoko!
Akaha amalima wetu w’abakaleghula.”
5 Omo ndeko ya Yehova, siwendisyabya n’omundu
Oyukapima ekihugho ky’omo kamba akaghabakyo.
6 “Muleke erihubirya!” banemuhubirya,
“Isibahubiraya emyatsi eyo;
Sitwendisyahemuka!’
7 Kihanda kya Yakobo, abandu banemubugha bati:
“Ekirimu kya Yehova kyabiribyamo epaku-paku?
Kyo kinalyakola ebi?”
Ebinywa byaghe sibiriletera abaluyirirene b’endundi?
8 Aliwe lino-lino, abandu baghe mubakabya nzighu.
Mumukalusaya oko lukimba kw’amapambo aghuwene kutsibu* abandu ibanalangire.
Mumukalusayagho oko bakaghenda ibanayilighire, ng’abakalua oko malwa.
9 Mumukatibita oko bakali b’omo bandu baghe balue omo manyumba wabo aghuwene;
Mumukalusaya oko bana babo k’olukengerwa kera na kera.
10 Muhangane, mughende, kundi ono si mwanya w’eriluhukiramo.
Habiribya eritsandibwa, eritsandibwa erikalire busana n’emyatsi eyiterire.
11 Omundu amabikwamirira erihunga n’amabehi, kandi amabiteba ati:
“Ngendibahubirya emyatsi eyilebirye edivai n’obwabu obukatamiraya,”
Oyo iyutolere erihubirya abandu aba!
12 Yakobo, oko kwenene, ngendisyahindania abandu baghu bosi;
Oko kwenene, ngendisyakuma-kuma Abaisraeli abasighala.
Ngendisyabahira omo bughuma, ng’esyombuli esiri omo luba,
Ng’esyombuli esiri omo bulisiryo bwasyo;
Mukendisyowika emilenge y’abandu.’
13 Oyukatobola ekitobo akendisyabya embere syabo;
Bakendisyatobola ekitobo, ibalaba omo mulango, n’erihulukira mugho.
Omwami wabo akendisyababera embere.
Na Yehova iniane embere syabo.”
3 Munabugha niti: “Kisi, muhulikirire, inywe bakulu b’omo kihanda kya Yakobo,
N’inywe bakomanda b’Abaisraeli!
Simwasi ngoko litolere imwaminya ekitunganene?
2 Ibwa mukapona ekyuwene, imwanza ekibi;
Mukalusaya oko bandu baghe kw’engobi n’eminyoku eyiri oko makuha wabo.
3 Mukalya n’eminyoku y’oko bandu baghe,
Kandi mukalusaya kubo kw’engobi,
Mukatsutsanga amakuha wabo n’eriponda-pondagho,
Ng’ebikahukawa omo nyungu,* ng’enyama eyikahukawa omo nyungu.
4 Oko mughulu oyo, bakendisyalakira Yehova bati abawatikaye,
Aliwe syendisyasubiryabo.
Oko mughulu oyo, akendisyababisa obusu bwiwe,
Busana n’ebibi byabo.
5 Bino byo Yehova akabugha oko baminyereri abakaheraya abandu baghe,
Abakabugha bati, ‘Hali obuholo!’ ibanemutakunya,*
Kandi ibwa ibanemubugha bati bakendilwa* n’oyutalyahira omo buno bwabo mw’ekindu:
6 ‘Mukendisyabya omo mwirimya ng’omo kiro; simwendisyalangira esyonzoli;
Mukendisyabya omo mwirimya musa-musa, simwendisyatoka n’erilaghula.
Eryuba rikendisyalengera oko baminyereri,
Eritungyi rikendisyabya mwirimya okw’ibo.
7 Abakalangira esyonzoli bakendisyahemuka,
N’abalaghuli bakendisyabunika mutima.
8 Aliwe ingye, ekirimu kya Yehova kyabirinisulyamo akaghala,
Kyabirinisulyamo eritunganene n’obutoki,
Nitoke erikangania Yakobo ekosa yiwe na Israeli erilolo riwe.
9 Kisi, muhulikirire omwatsi ono, inywe bakulu b’omo kihanda kya Yakobo
N’inywe bakomanda b’Abaisraeli,
Inywe muponire eritunganene kandi inywe mukahengemaya ebyosi ebilungukere,
10 Inywe mukahimba Sioni omo bwiti n’erihimba Yerusalema omo ritatunganene.
11 Abasondoli* babo bakaligha ekyutuliro bakatswera,
N’abahereri babo bakakangiriraya oko franga,
N’abiminyereri babo bakalaghulira oko franga.*
Aliwe bakayipara-para bati bayiketere Yehova, omw’ibugha bati:
“Yehova syali haghuma netu?
Sihali obuhanya obukendisyatuhikira.”
12 Neryo busana nenyu,
Sioni akendisyalimwa ng’eririma,
Yerusalema akendisyabya kilundo ky’ebisambukalirya,
N’ekitwa ky’Enyumba* kikendisyabya ng’emyanya y’endata eyiri omo musitu.*
4 Omo biro by’enduli,
Ekitwa ky’enyumba ya Yehova
Kikendisyahandwa ndeke-ndeke endata oko singyi y’ebitwa,
Kikendisyahirwa endata oko hitwa,
N’abandu bangyi bakendisyaya kukyo.
2 N’ebihanda bingyi bikendisyaya kukyo n’eribugha biti:
“Mwase, twerukire oko kitwa kya Yehova
Eyiri enyumba y’oMungu wa Yakobo.
Akenditukangirirya esyonzira siwe,
Netu tukendikwama esyonzira siwe.”
Kundi omughambo* akendisyalua e Sioni,
N’ekinywa kya Yehova kikendisyalua e Yerusalema.
3 Akendisyasoha emyatsi omo kati-kati k’ebihanda
N’erilungula emyatsi eyilebirye ebihanda by’ehali kandi ebiri n’amaka.
Bakendisyahesa emiyali yabo mw’isuka
Bakendisyahesa n’amatumo wabo mo bisara
Sihendisyabya ekihanda ekikalwa n’ekindi omo muyali,
Kandi sibendisyasyigha amalwa.
4 Obuli mundu akendisyikala omo ndina y’omuti wiwe w’emizabibu n’omo ndina y’omuti wiwe w’esyotini.
Sihendisyabya oyukabasaghisaya,
Kundi obuno bwa Yehova w’emilondo bwabiribugha.
5 Kundi obuli bandu bakendisyakwama oMungu* wabo,
Aliwe itwe, tukendisyakwama* Yehova oMungu wetu kera na kera.
6 “Ekiro ekyo,” Yehova atya,
“Ngendisyahindania abakatsukuda,
N’erikuma-kuma abapanza-panzawa,
Ngendisyakuma-kuma n’abo nakolera omo butsibu.
7 Ngendisyasigha abandu balebe b’oko bandu abakatsukuda,
N’ababya ibabirighuswa hali, ngendisyabayira mo kihanda ky’amaka;
Na Yehova akendisyabatabala oko Kitwa kye Sioni,
Eritsuka lino na kera na kera.
8 Aliwe iwe, akaleberyo k’esyonyama,
Akatwa ka mwali we Sioni,
Obutabali bw’erimbere* bukendisyabya bwaghu, inga, bukendisyabya bwaghu,
Obwami bwa mwali we Yerusalema.
9 Neryo lino, busanaki ukalaka?
Suwite omwami kwe,
Kutse oyukakuhana abirihola,
Kyo kyamaleka iwowa obulumi ng’obw’omukali oyunemubuta?
10 Mwali we Sioni, uyiminyongolaye n’erisimba,
Ng’omukali oyunemubuta,
Kundi lino ukendilua omo muyi n’eriyikala emoli.
Ukendiya hali eriyahika ne Babiloni,
N’eyo yo ukendisyasabulirwa;
Ighune eyo, Yehova akendisyakulusya omo byala by’esyonzighu syaghu.
11 Ebihanda bingyi bikendisyahindana n’erilwa naghu;
Bikendisyabugha biti, ‘Atsandibawe,
N’ameso wetu alangire ekikahikira Sioni.’
12 Aliwe sibasi amalengekania wa Yehova,
Sibasi emipango yiwe;
Kundi akendisyahindaniryabo oko kihumbiro ng’engano eyikalua okw’itwibwa eyitondekire mo milondo-milondo.
13 Mwali we Sioni, hangana, uhumbe engano;
Kundi ngendisyabindula amahembe waghu mo kyuma,
Kandi ngendisyabindula ebighera byaghu mo kwivre,*
Kandi ukendisyaponda-ponda abandu bangyi.
Ukendisyaha Yehova ebindu ebyo balyiba.
N’obuteke bwabo, ukendisyahabo Omukama w’ekwenene w’ekihugho kyosi.”
5 “Neryo lino, iwe mumbesa oyo bakalwa naye,
Unemuyisara-sara;
Babiritutimbako batoke erilwa netu.
Bakahunza omutsweri we Israeli oko matema omo fimbo.
2 Naghu, Betlehemu Efrata,
Iwe muke kutsibu omo maelfu* we Yuda,
Omw’iwe mukendisyalua oyukendisyabya mutabali omo Israeli omo mwanya waghe,
Oyo watsuka eribyaho kera, eritsuka omo biro bya kera.
3 Neryo akendisyabalekerania,
Erihika omughulu oyutolere eributa akendisyabuta.
N’abaghala babo abasighalira bakendisyasuba oko Baisraeli.
4 Akendisyahangana n’erilisya abandu biwe omo kaghala ka Yehova,
Omo bukulu bw’erina rya Yehova oMungu wiwe.
Kandi bakendisyikala buholo,
Kundi obukulu bwiwe bukendisyahika oko mipaka y’ekihugho.
5 Kandi akendisyaleta obuholo.
Omuasiria amabisyalwa n’ekihugho kyetu n’erilyatangira ehileberyo hyetu ehyo mundu ate angahikamo bweghu-bweghu,
Tukendisyamutumako abalisya 7 abakendisyalwa naye, inga abakulu* 8 abakendisyalua omo bandu.
6 Bakendisyalwa n’ekihugho* kye Asiria omo muyali,
N’erilwira n’ekihugho kya Nimrodi oko bwingiriro bwakyo.
Kandi akendisyatusabula omo byala by’Omuasiria,
Omughulu akendisyalwa n’ekihugho n’erilyatangira ekiharo kyetu.
7 Abandu ba Yakobo abakendisyasighalira bakendisyabya omo kati-kati k’abandu bangyi,
Bakendisyabya ng’ekimi ekikalua oko Yehova,
Bakendisyabya ng’embula nene eyikawa oko biti
Ebiteyiketera omundu,
Ebitelindirira kindu oko baghala b’abandu.
8 Abandu ba Yakobo abakendisyasighalira bakendisyabya omo kati-kati k’ebihanda,
Bakendisyabya omo kati-kati k’abandu bangyi,
Ng’esimba eyiri omo kati-kati k’esyonyama sy’emoli,
Ng’esimba eyikine nyilere* omo kati-kati k’esyombuli,
Eyikalaba, iyaghulukira oko mbuli, n’eritulangayo mo bihande-bihande;
Isihali oyo wangasabulasyo.
9 Ebyala bikendisyabya endata oko syonzighu syaghu,
N’esyonzighu syaghu syosi sikendisyatoghotibwa.”
10 “Ekiro ekyo,” Yehova atya,
“Ngendisyabughaho esyosabayiri* syaghu esiri omo kati-kati kaghu n’eritoghotya emitoka yaghu.
11 Ngendisyatsandya emiyi y’omo kihugho kyaghu
N’erihimbula emyanya yaghu yosi eyo mundu ate angahikamo bweghu-bweghu.
12 Ngendisyabughaho obuloyi bwaghu,*
Omo kati-kati kaghu simwendisyasighalira oyukalaghula.
13 Ngendisyatsandya esyosanamu syaghu esibatsire n’esyonduyi syaghu esiri omo kati-kati kaghu,
Siwendisyasyakukamira ebindu ebyo wakokokotaya.
14 Ngendisyakulanga emiti mibuyirire* eyiri omo kati-kati kaghu
N’eribughaho emiyi yaghu yosi.
15 Ebihanda ebyataniowa,
Ngendisyatuhuliryabyo omo kinigha n’omw’ihitana rinene.”
6 Kisi, muhulikirire ebyo Yehova akabugha.
Uhangane, utonde embere sy’ebitwa,
N’ehitwa hyowe omulenge waghu.
2 Inywe bitwa, muhulikirire Yehova akatonda,
Inywe syofondasyo esisikire sy’ekihugho,
Kundi Yehova anemutonda haghuma n’abandu biwe;
Akendishitaka Israeli:
3 “Bandu baghe, mungabakoleraki?
Nabiribaluhya niti?
Munibwire amakosa waghe.
4 Munabalusya omo kihugho kye Misri,
Munabakombola omo nyumba y’obukobe;
Munatuma Musa, Haruni, na Miriamu embere syenyu.
5 Bandu baghe, kisi mwibuke ebyo Balaki omwami we Moabu abya anzire erikola,
Mwibuke n’ebyo Balamu mughala wa Beori amusubiraya
Mwibuke ebyalaba eritsuka e Shitimu erihika e Gilgali
Ekyo kikendileka imwaminya emyatsi eyitunganene eyo Yehova akakola.”
6 Ngendihika embere sya Yehova ininawite okuki?
Ngendyunama embere sy’oMungu w’endata ininawite okuki?
Ngendyasa embere siwe ininawite oko mahere w’eryokererya,
N’ebyana by’esyonde eby’omwaka mughuma?
7 Yehova akenditsemera amaelfu w’esyombangale?
Akenditsemera amakumi w’amaelfu w’esyonyusi sy’amaghuta?
Ngendimuha akambere kaghe busana n’ekosa yaghe?
Ngendimuha omwana* waghe busana n’erilolo ryaghe?*
8 Iwe mundu, abirikubwira ekyuwene.
Yehova anzire iwakolaki?*
Ekyo anzire kisa ry’en’erikola ebitunganene,* eryanza obutaleghula,*
N’erilendera n’oMungu waghu ighunayasi lulengo!
9 Omulenge wa Yehova akabirikira omuyi;
Abawite amenge bakendisyubaha erina ryaghu.
Muhulikirire efimbo n’oyo wahira y’oho.
10 Omo nyumba y’ababi mukinabikire ebindu by’obughuli ebyo babana omo bubi?
Mukinabikire ne efa* eyitaghonere eyikita esyonye?
11 Nanganabya butsira kosa* ininawite oko kilo ekituwene,
Ininawite oko ngunza eyirimo amabwe w’eripimamo awakiba abandu?
12 Kundi abateke bamo baswiremo obutsururu,
N’abikalani bamo bakabugha amabehi;
Olulimi oluli omo buno bwabo ni lubehi.
13 “Busana n’ekyo, ngendikuhunza n’erikuhutalya;
Ngendikuyira mo matongo busana n’amalolo waghu.
14 Ukendisyalya, aliwe siwendisyughuta;
Enda yaghu ikendisyabya isiyirimo kindu.
Ukendisyasonda eribika ebindu ahuwene, aliwe siwendisyatoka eribikabyo,
Ebyo ukendisyabika, ngendisyahabyo esyonzighu syaghu.*
15 Ukendisyahera embuto, aliwe siwendisyahulula kindu.
Ukendisyalatanga emizeituni, aliwe siwendisyakolesya amaghuta awakendisyalua muyo.
Ukendisyakama edivai nyihya-nyihya, aliwe siwendisyanywa edivai.
16 Kundi mukakwama ebyalayiro bya Omri n’emibere yosi y’ekihanda kya Ahabu,
Kandi mukakwama erihano ryabo.
Ekyo kyo kikendisyaleka inabayira mo kindu ekikita obuba
N’eriyira abikalani bamo mo kindu ky’erisughundira;
N’abandu bakendisyabasekererya.”
7 Bulighe okw’ingye! Niri ng’omundu,
Oyukabya abyoha amatunda awakera oko mughulu w’ekipwa*
N’eribota-bota emizabibu eyiryasighala omw’irima,
Iniatasunga emizabibu y’erirya,
Iniatasunga n’etini y’erimbere-mbere eyo akwire engumbu.*
2 Omo kihugho simukiri omundu oyuteleghula;
Omo bandu simukiri omundu n’omughuma oyutunganene.
Abosi bakalimbaya batoke eryuta omusasi.
Obuli mughuma wa kubo akahigha mughala wabo omo butimba.
3 Ebyala byabo byasi ebibi;
Omukulu akasaba binene,
Omutsweri akasaba ekihembo,
Eseghu-seghu ikabugha ebyo yanzire eribana,*
Bakakola omo bughuma.*
4 Oyuwene kutsibu omw’ibo ali ng’amahwa,
Oyutunganene kutsibu omw’ibo ni mubi kulenga oluba lw’amahwa.
Ekiro ky’abateya baghu, ekiro ekyo ukendisyatonda, kikendisyasa.
Neryo bakendisyahandabuka.
5 Isiwayiketera mulikyenyu,
Isiwayiketera omwira wa hakuhi,
Ubye ighunayiteghirye omughulu ukakanaya n’oyukaghotsera oko kikuba kyaghu.
6 Kundi omughala akapokaya baba wiwe,
Na mwali inialwa na mama wiwe,
N’omwalyana akalwa na mabyala wiwe;
Esyonzighu sy’omundu bana bandu b’omo kihanda kiwe.
7 Aliwe ingye, ngendibya ininemulindirira Yehova.
Ngendilindirira oMungu oyukanisabula ininemuhanda omutima.
OMungu waghe akendisyaniowa.
8 Iwe nzighu* yaghe, isiwatsema busana n’ebyo ngalabamo.
Nomo nabiriwa ahisi, ngendisyahangana;
Nomo nikere omo mwirimya, Yehova akendisyabya kyakakala kyaghe.
9 Ngendivumilia ekinigha kinene kya Yehova,
Kundi nabirimukolera erilolo.
Ngendihanda omutima erihika omughulu akendinilwirako n’erileka ibanitswera omo ritunganene.
Akendisyanihulukirya eyiri ekyakakala;
Ngendisyalola oko ritunganene riwe.
10 N’enzighu yaghe nayo ikendisyalola kuryo,
Kandi ikendisyahemuka, eyabya ikabugha yiti:
“Yehova oMungu waghu ali hayi?”
Ameso waghe akendisyasamalira enzighu eyo.
Ikendisyalyatangwa ng’ebyondo ebiri omo syondaki.
11 Kikendisyabya kiro ky’erihimba esyombimbo syaghu sy’amabwe;
Ekiro ekyo, omupaka akendisyakakibwa.*
12 Ekiro ekyo, bakendisyasa ewaghu
Bakendisyalua e Asiria n’omo miyi ye Misri,
Bakendisyalua eritsuka e Misri eriyahika oko Lusi,*
Bakendisyalua oko ngetse eriyahika oko ngetse n’eritsuka oko kitwa eriyahika oko kitwa.
13 Ekihugho kikendisyabya matongo busana n’abikalani bamo,
Busana n’ebyo bakola.*
14 Ulisaye abandu baghu, omwandu waghu w’esyombuli, omo fimbo yaghu.
Oyo wabya ikere iyuwene omo musitu, omo kati-kati k’eririma ry’amatunda.
Balire akalyo ke Bashani ne Gileadi ng’omo biro bya kera.
15 “Ng’omo biro ebyo walua omo kihugho kye Misri,
Ngendisyamukangania emyatsi y’eriswekera.
16 Nomo ebihanda bine n’amaka manene, bikendisyalangira emyatsi eyo n’erihemuka
Bikendisyahira ebyala byabo oko buno;
Amatwi wabyo akendisyahumana ng’awabatsiha.
17 Bikendisyalyatsa olututu ng’enzoka;
Bikendisyalua omo myanya yabyo eyo mundu ate angahikamo bweghu-bweghu ng’esyonyama esikayikura sy’oko kihugho ibinemutitimana.
Bikendisyasa eyiri Yehova oMungu wetu ibine n’obuba bunene,
Kandi bikendisyakusagha.”
18 Ni Mungu wahi oyuli nga we.
Oyukaghanyira ekosa n’erighanyira erilolo ry’abandu* biwe abasighala?
Syendisyabika ekinigha kyo kera na kera,
Kundi akatsemera olwanzo oluteleghula.
19 Akendisyasyatughanyira; akendisyasinga* amakosa wetu.
Ukendisyaghusa amalolo wabo wosi omo mitobero y’engetse.
20 Ukendisyakolera Yakobo omo butaleghula,
Ukendisyakolera Abrahamu omo lwanzo oluteleghula,
Ngoko walipira abotata-kulu wetu eritsuka kera.
Ni kikuhi ky’erina Mikaeli (erikamaanisaya “nindi yuli ng’oMungu?”) kutse ky’erina Mikaya (erikamaanisaya “nindi yuli nga Yehova?”)
Kutse “N’amabanda.”
Kinywa kinywa, “Ngendisyuta.”
Kutse “ebyaleka iniayighulya.”
Kutse “ng’eminengele.” Ni muhanda w’embwa y’emoli.
Kutse “omo nyumba ya Afra.”
Kinywa kwa kinywa, “mwikalani mukali.”
Kinywa kwa kinywa, “omwikalani mukali.”
Kinywa kwa kinywa, “mwikalani mukali.”
Kutse “syofarasi; syoshevale.”
Kinywa kwa kinywa, “mwikalani mukali.”
Kutse “oyukendibimyako ebindu byenyu.”
Kinywa kwa kinywa, “mutendilusyamo esyongoto syenyu.”
Kutse alinga, “Mumukalusaya olukimba n’amapambo aghuwene kutsibu.”
Kutse “Ng’enyungu eyiriko obuno bunene.”
Kutse alinga, “ibanawite eky’eritakunya.”
Kinywa kwa kinywa, “ibanemuyira amalwa mo mabuyirire.”
Kutse “moustache; amasharubu.”
Kutse “bakendisyaswika obuno bwabo.”
Kinywa kwa kinywa, “Emitwe.”
Kutse “feza.”
Kutse “N’ekitwa ekiriko ehekalu.”
Kutse “ng’ekiharo ky’oko kitwa ekiriko emiti.”
Kutse “amakangirirya; obusondoli.”
Kinywa kwa kinywa, “bakendisyalendera omo rina ry’oMungu.”
Kinywa kwa kinywa, “tukendisyalendera omo rina rya.”
Kutse “bwa kera.”
Kutse “mulinga.”
Kutse “bitunga.”
Kutse “abasondoli.”
Kinywa kwa kinywa, “Bakendisyalisya ekihugho.”
Kutse “Ng’esimba nyilere eyiswireko obweya omo bikya.”
Kutse “esyofarasi; esyoshevale.”
Kinywa kwa kinywa, “bw’ebyala byaghu.”
Ulebaye Amaana w’ebinywa.
Kutse “eritunda ry’omubiri.”
Kutse “ry’enafsi yaghe.”
Kutse “akakusabaki?”
Kutse “ry’en’eribya mundu w’ekwenene.”
Kutse “eribya n’olukogho n’eritendileghula omughulu ukakanganaya olwanzo.” Kinywa kwa kinywa, “eryanza olwanzo oluteleghula.”
Ulebaye Endomeko B14.
Kutse “n’emibere eyuwene.”
Kinywa kwa kinywa, “omuyali.”
Kutse “w’omwisi munene.”
Kutse “eyo enafsi yiwe yikwire engumbu.”
Kutse “ebyo enafsi yiwe yanzire iyabana.”
Kinywa kwa kinywa, “Bakalukakyo kughuma.”
Omo Kiebrania, “enzighu” eyikahulawa hano ni y’obukali.
Kutse alinga, “omupaka akendisyabya hali.”
Ni bugha ambu, Olusi lwe Efrati.
Kinywa kwa kinywa, “Busana n’amatunda w’emikolere yabo.”
Kinywa kwa kinywa, “ry’omwandu.”
Kutse “akendisyalyatangira; akendisyatabala.”