NAHUMU
1 Ebinywa ebilebirye Ninawi. Ekitabu ky’enzoli ya Nahumu* Omuelkoshi:
2 Yehova ni Mungu oyukanza iniaramibwa iye musa kandi oyukatuhulaya;
Yehova akatuhulaya kandi ane tayari erikangania ekinigha kiwe.
Yehova akayituhuliraya oko syonzighu siwe,
Kandi akabikira esyonzighu siwe sy’ekinigha.
3 Yehova syalihitana luba kandi ali n’akaghala kanene,
Aliwe Yehova syendisyabula eriha amalipizi abatolere erihabwagho.
Enzira yiwe yiri omo rihunga erikatsandaya n’omo kihunga kinene,
N’ebitu byo lututu lw’oko bisando biwe.
4 Akahayira engetse n’eryumyayo;
Akumaya esyonyusi syosi.
E Bashani ne Karmerli yabirihonga,
N’amawa we Lebanoni abirihonga.
5 Abirileka ebitwa ibyatitimana,
N’ehitwa ihyayeyuka.
Ekihugho kikendisyayisumba busana n’obusu bwiwe,
Ekitaka n’ebyosi ebiri kukyo nabyo bikendisyayisumba.
6 Nindi yo wangimana embere sy’ekinigha kiwe kinene?
Nindi yo wangayihanda oko kihuhania ky’ekinigha kiwe?
Ekinigha kiwe kinene kikendisyutibwa ng’omuliro,
N’esyonguka* sikendisyatulangika busana naye.
7 Yehova uwene; ni mwanya w’eribisamamo omo kiro ky’obuhanya.
Akabya inianalangire* abakamuyira mo busayiro.
8 Akendisyatoghotya olosi omwanya wiwe* omw’ibwagha ry’amaghetse,
N’omwirimya akendisyakwamirira esyonzighu siwe.
9 Mukendisohera Yehova yo ki?
Anemutoghotya olosi.
Obuhanya sibwendisyasa engendo y’akabiri.
10 Baluka-lukene ng’amahwa,
Kandi bali ng’abandu abalyatamira obwabu;*
Aliwe bakendisyahya ng’ebiti ebyumire.
11 Omw’iwe mukendisyasira omundu oyukendisyasohera Yehova y’emyatsi eyituwene,
Oyukateka amahano awatawite mughaso.
12 Yehova ati:
“Nomo banabya n’akaghala kanene kandi ini bangyi,
Bakendisyakondwa n’erihwaho.*
Nabirikwaghalya,* aliwe sinendisyasyakwaghalya.
13 Kandi ngendisyatwa omuketo wiwe owali okw’iwe,
Ngendisyatwa n’eminyororo yaghu mo bihande bibiri.
14 Yehova abirikubughako* ati,
‘Erina ryaghu rikendisyahweraho.
Ngendisyatoghotya esyosanamu esibatsire n’esyosanamu sy’emetale eyiryayeyukibwa esiri omo nyumba* y’emiungu yaghu.
Ngendisyakutakulira eyisinda, kundi ukita esyonye.’
15 Mulebaye! Oko bitwa kune ebisando by’oyukaleta engulu mbuya,
Oyukatulaghanaya obuholo.
Yuda, ukole ebiro byaghu bikulu, uberereraye ebyo wayilagha,
Kundi omundu oyutawite mughaso syendisyasyalaba ewaghu ekiro n’ekighuma.
Akendisyatoghotibwa.”
2 Oyukapanza-panza anemusyalwa naghu.*
Muteghaye esyombimbo,
Muteghaye enzira.
Muyiteghekanaye* n’ehira akaghala kenyu kosi ko haghuma.
2 Kundi Yehova akendisyasubulirya Yakobo y’olukengerwa lwiwe,
Akendisyasubulirya Israeli y’olukengerwa lwiwe,
Kundi abatsandya babiribatsandya;
Babiritsandya ebitahi byabo.
3 Esyongabo sy’abalume biwe b’amaka syabirihirwako erangyi y’omusasi,
Abasuda biwe bambite esyongyimba sy’erangyi y’omusasi.
Ebyuma by’oko mitoka yiwe y’amalwa bikaka ng’omuliro
Ekiro akayiteghekanaya oko malwa,
Kandi bakatsinga-tsingaya amatumo wabo w’emiti y’ekilaghu omo nzira eyikasaghisaya.
4 Emitoka y’amalwa ikatibita lusire-sire omo syondaki,
Ikatibita eyi n’eyi omo myanya y’abandu bosi.
Ikakoleraya ng’ehiti ehiriko ekirimi* n’eripalya ng’obutuku.
5 Akendisyabirikira abasuda biwe bakulu-bakulu.
Bakendisyalola embere bakatwikala.
Bakatibitira eyiri oluhimbo lw’omuyi;
Bakahiraho ekikakiryo.
6 Emilango y’esyonyusi ikendisyakingulwa,
N’enyumba y’omwami ikendisyatera.*
7 Babirisoha ambu: Babirimuyira ndumbu.
Anemutwalwa, n’abakobe biwe b’obukali banemusimba;
Banemusimba ng’ehilikuku; banemuyibanda-banda oko kikuba.*
8 Ninawi atula iniali ng’ekiriba ky’amaghetse,
Aliwe lino banemutibita.
“Mwimane! Mwimane!”
Aliwe sihali oyukakeba.
9 Mupure efeza,* mupure ehoro!
Ebindu by’obughuli sibyendisyahwa.
Aswiremo ebindu by’obughuli by’emihanda yosi.
10 Omuyi syakirimo kindu, abiribya matongo, abiritoghotibwa!
Emitima yabo yabiriyeyuka busana n’obuba, amaru wabo anemutitimana, esyombindi syabo sinemutitimana;
N’obusu bwabo bwabiritumba.
11 Ekyuna ky’esyosimba kiri hayi, oho esyosimba esikine silere* sikalira,
Oho esimba ikahulukira iyine n’ekyana kyayo,
Isihali oyukasaghisayasyo?
12 Esimba muyatulangira ebyana byayo by’esyonyama esitosire,
N’erinyolera esyosimba syayo sy’obukali sy’esyonyama.
Iyikabya iyinemusulya omo byuna byayo mw’esyonyama,
N’eryusulya omo byuna byayo mw’esyonyama esyo iryatulanga.
13 “Ngendilwa naghu,” Yehova w’emilondo atya,
“Ngendihisya emitoka yiwe y’amalwa n’eriyirayo mo muki,
N’omuyali akendisyamera esyosimba syaghu esikine silere.*
Ngendisyabughaho esyonyama esyo ukahamba oko kihugho,
N’omulenge w’abatumwa baghu syendisyasyowika.”
3 Bulighe oko muyi owakuta omusasi!
Owosi aswiremo amabehi n’obwibi.
Syalyatabula erihamba enyama!
2 Efimbo yinemukena n’ebiringo binemuleta efuyo,
Esabayiri* yinemutibita kutsibu n’omutoka anemudunda.
3 Oyukaghendaya esabayiri* ane oko sabayiri, hali omuyali owakaka, n’eritumo erikangabasenie,
Hali obutaghanzika bw’abandu abalyakwa, n’ebilundo by’ebinda:
Obutaghanzika bw’ebinda.
Abandu banemutwikala oko binda.
4 Ni busana n’obumbalaka bunene bw’omumbalaka,
Atsemesirye kandi ni mubuya, ni ngongotera omo buloyi,
Akategha ebitunga omo bumbalaka bwiwe n’eritegha ebihanda omo buloyi bwiwe.
5 “Ngendilwa naghu,”* Yehova w’emilondo atya,
“Ngendisumbira ekitswe ky’eyikwa ky’eropo yaghu endata oko busu bwaghu,
Ngendileka ebihanda ibyalangira obusoni bwaghu,
Ngendileka n’amami inialangira ngoko wabirihemuka.
6 Ngendikughusako omutsafu
N’erikuyira mo mundu oyupokibwe;
Ngendikuhemula embere sy’ameso w’abandu.
7 Obuli mundu oyukendisyabya akakulangira akendisyabya akakusagha n’eribugha ati:
‘Ninawi abiritoghotibwa!
Nindi yukendimukwira obulighe?’
Ngendisunga hayi h’abandu abakendimukirania?
8 Ukalengekanaya uti ulengire No-amoni,* oyo wabya ikere hakuhi n’emighende y’Olusi lwe Nile?
Amaghetse abya iniamutimbireko;
Engetse yo yabya buteke bwiwe kandi engetse yo yabya luhimbo lwiwe.
9 Ekihugho kye Etiopia n’ekye Misri byo byabya bikamuha akaghala kanene.
Puti n’Abalibia bo babya bakakuwatikya.
10 Nomo byanabya bitya, naye mwatwalwa omo bunyewa;
Mwaya omo bunyewa.
Abana biwe nabo mubatulangirwa mo bihande-bihande oko buli ngonde* y’enzira.*
Mubakola obukanga batoke erighaba esyoseghu-seghu siwe,
N’abalume biwe bosi b’omughaso mubabohwa omo minyororo.*
11 Naghu, ukendisyatamira;
Ukendisyayayibisa.
Ukendisyarondya obusayiro ukasagha enzighu.
12 Esyombimbo syaghu syosi siri ng’emiti y’esyotini eyiriko amatunda w’erimbere-mbere awerire;
Bamabitsingya-tsingya emiti eyo, esyotini sikatoghera omo buno bw’abakalyasyo.
13 Lebaya! Abasuda abali omo kati-kati kaghu bali ng’abakali.
Emilango y’omo kihugho kyaghu yikendisyabya iyinakingulire esyonzighu syaghu sitoke eringiramo.
Omuliro akendisyatimya ebikale by’oko milango yaghu.
14 Utehe amaghetse awakendikuwatikya omughulu esyonzighu sikendikutimbako!
Uwataye esyombimbo syaghu.
Undaghalire omo byondo n’erilyata omo ribumba;
Uhambirire ekindu ky’erikokotyamo esyombiriki.
15 Nibya n’eyo, omuliro akendisyakutimiryayo.
Omuyali akendisyakubughaho.
Akendisyakumera ngoko esyongyike esikine silere sikamera.
Uyiyire mo bangyi ng’esyongyike esikine silere!
Inga, uyiyire mo bangyi ng’esyongyike!
16 Wabiriyira abakomersa baghu mo banene kulenga esyongununu sy’elubula.
Engyike eyikine nyilere yikayanulaya n’erighuluka.
17 Abateya baghu bali ng’engyike,
Abasuda baghu bakulu-bakulu bali ng’ekikuto ky’esyongyike.
Ekiro ky’embeho, bakikala omo maluba w’esyonyama awahimbire omo mabwe,
Aliwe eryuba rikabya ryabikola, ibaghuluka;
Sihalibya oyukaminya eyo bali.
18 Mwami we Asiria, abalisya baghu banemuyitsingirako;
Esyoseghu-seghu syaghu sikasighala omo manyumba wasyo.
Abandu baghu babiripanza-panzirwa oko bitwa,
Sihali oyukabakuma-kumira haghuma.
19 Sihali oyukendisyakutulerya obuhanya bwakuhikira.
Ekironda kyaghu sikyangalama.
Abosi abakendisyowa oko ngulu yaghu bakendisyabanda oko byala;
Kundi hane oyo wataghalawa busana n’obutsibu bwaghu obutehwa?”
Ni bugha ambu “mukirania.”
Kutse “N’ebibwe.”
Kutse “Atsomene.” Kinywa kwa kinywa, “Anasi.”
Ni bugha ambu, Ninawi.
Kutse “obwabu obukalua omo ngano.”
Kutse alinga, “kandi akendisyalaba.”
Ni bugha ambu, Yuda.
Ni bugha ambu, Asiria.
Kutse “hekalu.”
Ni bugha ambu, Ninawi.
Kinywa kwa kinywa, “Mukalakalaye esyombindi syenyu.”
Kutse “ng’ebisosomole.”
Kutse “ikendisyayeyuka.”
Kinywa kwa kinywa, “mitima.”
Ni kindu ky’obughuli ekikalua omo kitaka.
Kutse “esyosimba silere esiswireko obweya omo bikya.”
Kutse “esyosimba syaghu silere esiswireko obweya omo bikya.”
Kutse “Efarasi; Eshevale.”
Kutse “efarasi; eshevale.”
Ni bugha ambu, Ninawi.
Ni bugha ambu, Tebesi.
Kutse “sonda; coin.”
Kinywa kwa kinywa, “oko mutwe w’esyonzira syosi.”
Kutse “mahulula.”