Esomo 6

Obwami bw’oMungu niki?

Obwikalo bw’obwami buli hayi? (1)

Omwami wabo nindi? (2)

Hane abandi abakasyathabala haghuma naye? Byamabya bithya, ni bangahi? (3)

Ni kiminyisyoki ekikanganirye ko thuli omo biro by’endulya? (4)

Obwami bw’oMungu bukasyakolera abandu bo kihi? (5-7)

1. Omughulu abya oko kihugho, Yesu mw’akangirirya abigha biwe erisaba obwami bw’oMungu. Obwami ni buthabali obusondolibwe n’omwami. Obwami bw’oMungu ni buthabali obuthe ng’awandi ko nahake. Lino, bwabirisingibwa omo lubula kandi bukisiya hake ibwathabala oko kihugho. Bukasyasikaya erina ly’oMungu, kutse, eriyira lyo mo libuyirire. Bukasyaleka erisonda ly’oMungu iryakoleka omo kihugho ngoko likakoleka omo lubula.​—Matayo 6:9, 10.

2. OMungu mw’alagha athi Yesu akasyabya mwami w’obwami buwe. (Luka 1:30-33) Omughulu Yesu abya oko kihugho, mw’akangania kw’akasyabia omwami w’olukogho, oyuthunganene, kandi oyubererere. Omughulu asuba elubula, mw’athalwa akayasinga mw’omwami w’obwami bw’oMungu. (Abaebrania 10:12, 13) Oko 1914, Yehova mw’aha Yesu y’obusike obw’amulaghanira. Erilwa aho, Yesu athabere mw’omwami oyusingire omo lubula.​—Danieli 7:13, 14.

3. Kandi Yehova mw’asombola omo kihugho mw’abalume n’abakali abatheleghula bathoke erikala elubula. Bakasyathabala mo bami, batsweri, kandi bahereri b’abandu haghuma na Yesu. (Luka 22:28-30; Eribisulirwa 5:9, 10) Yesu mw’ahula abakasyathabala haghuma naye mo “kihyo kike.” Emighanzo yabo ni 144 ,000.​—Luka 12:32; Eribisulirwa 14:1-3.

4. Abere anabisinga, mwaghusa Sitani n’abamalaika biwe babi erilwa elubula eribakolya oko kihugho. Kilekire emyatsi iyatsanda kutsibu omo kihugho eritsuka oko 1914. (Eribisulirwa 12:9, 12) Amalwa, esyonzala, esyondwala, n’erikanyirira ely’eriyikolesya ebithathunganene​—ebyosi ebyo ni kitswe kyoko “kiminyisyo” ekikakanganaya ko Yesu anemuthabala kandi n’omughulu mubi ono ali omo biro by’endulya.​—Matayo 24:3, 7, 8, 12; Luka 21:10, 11; 2 Timoteo 3:1-5.

5. Hakisiya hake Yesu iniakatswera abandu. Akasyaghaba abandu ng’oko mulisya akaghaba esyombuli n’esyombene. “Esyombuli” b’abakasyayikanganaya mo bandu biwe abathereghula. Bakasyahabawa engebe y’erikotha oko kihugho. “Esyombene” b’abakasyabya ibabirighana obwami bw’oMungu. (Matayo 25:31-34, 46) Hakisiya hake Yesu iniakathoghothaya abasosekanibawe n’esyombene. (2 Abanya Tesalonike 1:6-9) Wamabya unasondire eribya mughuma w’oko “syombuli” sya Yesu, litholere iwahulikirira engulu y’obwami n’erikola ebyo ukigha.​—Matayo 24:14.

6. Lino ekihugho kighabene mo mahanga mangi. Obuli ihanga liwithe obwami bwalyo. Ebihanda bibeghere erilwa n’ebindi bihanda. Alibo, obwami bw’oMungu bukasyalusaya h’amami w’abandu. Neryo, bukasyathabala mw’obuthabali bughuma busa oko kihugho kyosi. (Danieli 2:44) Neryo sihendisyasyabya amalwa, obusindwa, n’olutsatsuho. Abandu bosi bakasyabya baghuma n’erikala omo buholo n’omo bughuma.​—Mika 4:3, 4.

7. Omo mughulu oyo ow’obuthabali bwa Yesu bw’ebirimo 1 000, abandu abathereghula bakasyahika okw’ibererera, n’ekihugho kyosi kikasyabya paradiso. Oko nduli y’ebirimo 1 000, Yesu akasyabya iniamabikola ebyosi ebyo Mungu amusaba. Neryo akasyasubuliraya thatha wuwe y’obwami. (1 Abanya Korinto 15:24) Ekyangaleka naghu uthakanirya abanwani baghu n’abathunga baghu b’emyathi y’obwami bw’oMungu niki kwehi?

[Efoto oko bukurasa 13]

Omo bwami bwa Yesu, sihendisyasyabya eriponana n’akasoholo