Ekyaghanda Kikulu kikakola kiti munabwire?

Omo mughulu wa bakwenda, abalume bake, ni bughambu, ‘abakwenda n’abasyakulu be Yerusalema,’ bo babya omo kyaghanda kikulu ekyabya kikatwa emyatsi mikulu eyilebirye Abakristo bosi abahirweko amaghuta. (Emibiri 15:2) Ibakatwa omwatsi babilebya ebyo Mahandiko akabugha n’erileka ekirimu ky’oMungu kibasondole. (Emibiri 15:25) Emyatsi ko yine yitya na munabwire.

OMungu anemubakolesya erikola erisonda liwe. Abaghala betu abali omo Kyaghanda Kikulu banzire kutsibu Ekinywa ky’oMungu, kandi bawite obwenge bunene omwitwa emyatsi eyilebirye edini yetu n’omubiri wetu ngangakolwa ati. Bakahindana kaghuma oko yenga erikania ebyo balikyetu omo kihugho kyosi bayiteyire. Ngoko byabya omughulu w’abakwenda, bakatuha obusondoli obuseghemere eBiblia omwilabira esyobaruha, abalebererya abakabunga, n’esindi nzira. Eki kikaleka abandu b’oMungu ibabya n’amalengekania n’emikolere mighuma. (Emibiri 16:4, 5) Ekyaghanda Kikulu kikimanira omubiri ow’eriteghekania akalyo k’obunyamutima, kikahira omw’abosi m’omuhwa w’erihira omubiri w’erihubiria Obwami w’embere, kandi kikalebereraya omubiri w’erisombola baghala betu abakakola omo syondeko.

Kikakwama obusondoli bw’ekirimu ky’oMungu. Ekyaghanda Kikulu kikakwama obusondoli bwa Yehova, Omutabali we Kihugho Kyosi, na Yesu, Omutwe w’endeko. (1 Abanya Korinto 11:3; Abanya Efeso 5:23) Abali omo kyaghanda eki sibaliyilangira mo bakulu b’abandu b’oMungu. Ibo, haghuma n’abandi Bakristo abahirweko amaghuta “bakakwama Ekyana ky’Embuli [Yesu] ehosi kikaya.” (Eribisulirwa 14:4) Ekyaghanda Kikulu kikasima omughulu tukahirakyo omo misabe yetu.

• Ni bahi ababya omo kyaghanda kikulu omo mughulu w’abakwenda?

• Ekyaghanda Kikulu munabwire kikasondekanaya kiti obusondoli bw’oMungu?