Engulu mbuya niki?

1. Engulu eyikalwa ew’oMungu ni yahi?

OMungu anzire abandu ibabana obutseme oko kihugho. Mwahangika ekihugho n’ebyosi ebiriko kundi anzire abandu. Hakisiya hake inyakolera abandu ebyuwene omo kihugho kyosi. Akendisyabughaho ebikaleka abandu ibaghalwa.​—Usome Yeremia 29:11.

Sihali obutabali obwabiritoka eribughaho amalwa, amakoni, kutse oluholo. Aliwe hane engulu mbuya. Hakisiya hake, oMungu inyalusyaho amatabali w’abandu, n’erihiraho obutabali bwiwe. Abakendisyabya omo butabali bwiwe bakendisyabana obuholo n’obuyingo obuwene.​—Usome Isaya 25:8; 33:24; Danieli 2:44.

2. Busanaki engulu mbuya yitolere lino?

Eriaghalwa likendisyahwa omughulu oMungu akendisyalusya ababi oko kihugho. (Zefania 2:3) Akendisyabalusya oko kihugho mughulu wahi? EKinywa ky’oMungu mukyakania embere oko bindu bibi ebikakoleka lino. Ebibi ebikakoleka lino bikakanganaya ngoko hakisiya hake oMungu inyakola ngoko abugha.​—Usome 2 Timoteo 3:1-5.

3. Litolere itwakola ki?

Litolere itw’igha eBiblia, eKinywa ky’oMungu, tutoke erimuminya. EBiblia yiri ng’ebaruha erilwa oko tata w’olwanzo. Yikatubwira ngoko twangabana engebe eyuwene lino, kandi ngoko twangabana engebe y’erikota omo biro ebikasa. Kwenene, abandi banganapona bakakulangira uk’igha eBiblia. Aliwe, eki isikyaleka itwaleka erigha, kusangwa itukenditala oko miyisa mibuya eyikasa.​—Usome Emisyo 29:25; Eribisulirwa 14:6, 7.