Rahabu aby’ikirirye Yehova

Terilengekania itune omo muyi we Yeriko. Omuyi ono ali omo kihugho kye Kanana, ekirimo abandu abat’ikirirye Yehova. Yabya mukali oyukahulawamo Rahabu.

Iniakine mumbesa mulere, Rahabu mwowa ngoko Musa mwaghaba e Ngetse y’Engula (Bahari Nyekundu), kandi ngoko Yehova alusaya Abaisraeli be Misiri. Kandi mwowa ngoko Yehova mwakinda esyonziwu syabo. Lero Abaisraeli bali hakuhi ne Yeriko!

Kiro kighuma omw’igholo-gholo, Abaisraeli babiri mubayalebererya bubiso-biso omuyi we Yeriko. Bamingira omo nyumba ya Rahabu. Amabwirabo ati b’ingire bikale. Omo kiro, omwami we Yeriko mwaminya ngoko abalingyi (abapelelezi) babirihika omo muyi kandi ngoko bali omo nyumba ya Rahabu. Neryo omwami mwatuma abalume ati: “muyabahambe.” Rahabu mwabisa abalingyi ababiri omo lutwe lw’enyumba yiwe, n’eribwira abalume abo mwami atuma ati: ‘Abalingyi banalwe hano, aliwe babirilaba. Mwamabikwamirirabo lino, imwanganahambabo!’ Unasi ekyaleka Rahabu iniabisa abalingyi?— Kundi aby’ikirirye Yehova, kandi abya inianasi ngoko Yehova akendiha Abaisraeli ekihugho kye Kanana.

Abalingyi bakalwa omwa Rahabu, mubamulaghanira ngoko iye n’abomo kihanda kiwe bakasyasabuka e Yeriko ikatsandibwa. Unasi ekyo bamubwira bati akole?— Mubamubwira bati: ‘W’imaye ekikoba kino ekyengula (erangi y’omusasi), uhanikekyo oko dirisa. Wamabikola utya, abosi abali omo nyumba yaghu ibakesyasabuka.’ Rahabu mwakola ngoko anabwirawa. Unasi ekyakoleka enyuma syaho?—

Habere hahwa biro bilebe, Abaisraeli mubatsuka eritimba oko muyi bukutu-kutu. Omo biro 6, mubatimba oko muyi ngendo nguma obuli kiro. Aliwe omo kiro kye 7, mubatimba oko muyi ngendo 7. Neryo mubalaka kutsibu, na Yehova mwaterya oluhimbo olwabya lutimbire oko muyi. Aliwe enyumba eyabya yihanikirweko ekikoba muyatatera! Wanamalangirayo oko foto?— Rahabu n’ekihanda kiwe mubasabuka!

Wang’ighaki oko Rahabu?— Rahabu mwigha emyatsi mibuya oko Yehova kyo kyaleka iniamwikirirya. Naghu unemwigha emyatsi mibuya oko Yehova. Naghu unikirirye Yehova nga Rahabu?— Tunasi ngoko unikirirye!