Yeremia mwataleka erikania oko Yehova

Hakanabya akatambi abandu ibatusekererya n’erituhitanako omughulu tukakanirayabo oko Yehova. Eki kyanganaleka itwasonda erileka erikania oko Yehova. Unewatayowa wutya?— EBiblia ikakanaya oko mulwana mughuma oyo aby’anzire Yehova, aliwe mwataka erileka erimukaniako. Erina riwe lyaba Yeremia. Leka tumw’igheko buli.

Omughulu Yeremia abya mulwana, Yehova mwamubwira ati abwire abandu baleke erikola ebibi. Eki mukyakala kutsibu oko Yeremia n’erimwita obuba. Mwabwira Yehova ati: ‘Sinasi ebyo nangabugha. Niri mulwana mulere.’ Aliwe Yehova mwamubwira ati: ‘siukwe obuba. Ngandikuwatikya.’

Neryo Yeremia mwatsuka eribwira abandu ati batitayisubako inyakendiswirya bo. Ukalengekanaya uti abandu mobanakola ekyo Yeremia abwirabo?— Iyehe. Mubamusekererya n’erimuhitanako. Abandi nibya mubataka erimwita! Ukalengekanaya Yeremia mwayowati?— Mwakwa obuba n’eribugha ati: ‘Sinangasyakania oko Yehova ko n’ahake.’ Kwenene kwenene mwanaleka?— Iyehe, mwataleka. Aby’anzire Yehova yo kutsibu neryo mwatatoka erileka erimukaniako. Yehova mwateya Yeremia kundi mwataleka erimukaniako.

Ekyerileberyako, kiro kighuma abandu babi mubaghusa Yeremia omo kyuna kiri kutsibu ekirimo ebyondo. Syaby’awite eky’erirya n’eky’erinywa. Abandu abo babya b’anzire iniaholeramo. Aliwe Yehova mwamusabula!

Omwatsi wa Yeremia akakw’ighisayaki?— N’omo hanabya hakabya akatambi iniakwa obuba, mwataleka erikania oko Yehova. Omughulu ukakanaya oko Yehova, abandu bangana kusekererya n’erikuhitanako. Wanganayowa nga wabirihemuka kutse iwubaha. Aliwe sighuleke erikania oko Yehova. Ngoko awatikaya Yeremia, naghu akandikuwatikya.