Omuhwa wa Paulo abya isyaliubaha

Tutigha oko mulwana mughuma oyo waleka ibatita muyomba wiwe. Muyomba w’omulwana oyu abya mukwenda Paulo. Sitwasi erina ry’omulwana oyu aliwe tunasi ngoko mwanakola ekindu ekikakanganaya ngoko isyaliubaha. Unanzire eriminya ekyo akola?—

Paulo abya omo muliki e Yerusalemu. Mwahambwa kundi aby’akahubirya oko Yesu. Abandi balume babi mubapona Paulo, neryo mubamusohera muhanda. Mubabugha bati: ‘Tusabe omukulu wa basuda tuti abwire abasuda biwe batwale Paulo y’oko tribunali. Tukendilambabo omo nzira, bakendibya bakaleta Paulo, itwamwita!’

Omuhwa wa Paulo (omwana wa mwali wabo Paulo) m’owa abalume abo bakasoha omwatsi oyo. Angakolireki? Mwaya eyo Paulo aboherwe, amamutulirawo. Aho naho, Paulo mwabwira omuhwa wiwe ati abwire omukulu wa basuda oko mwatsi oyo. Ukalengekanaya uti kyanabya kyolobire oko muhwa wa Paulo eriya bwira omukulu wa basuda?— Iyehe, kusangwa mukulu oyo abya mulume w’olukengerwa lunene. Aliwe omuhwa wa Paulo mwatubaha neryo mwaya bwira omukulu oyo.

Omukulu wa basuda mwaminya eky’erikola. Mwimya abasuda nga 500 batoke eriteya Paulo oko balume babi. Mwalayirabo ati batwalwe Paulo ye Kaisaria omo kiro ekyo. Paulo mwanahika buholo?— Inga, abalume babi abo mubatasyatoka erimwita! Ekyo babya banzire erikola mokyatasyabya.

Omwatsi oyu akakwighisayaki?— Naghu wanganabya n’obutubaha ng’omuhwa wa Paulo. Siritolere itubaha eribwira abandi oko Yehova. Unemwendibwira abandi oko Yehova butsiriubaha?— Wamabikola utya, iwanganasabula engebe y’abandi.