Ebaruha Erilua oko Kyaghanda Ekikasondola

Baghala na bali betu banzwa:

Eryanza oMungu n’eryanza abandu bikatukuna ‘erighenda, n’eriyayira abigha oko bihanda byosi n’eribatisyabo.’ (Mat. 28:19, 20; Mar. 12:28-31) Twamabya n’olwanzo ng’olo, itukendiwatikya abawite omutima “owanzire eryangirira ekwenene eyikaha omundu engebe ya kera na kera.”​—Emib. 13:48.

Kera, itukahira omuwato w’oko binywa by’eribugha, n’eriha abandu b’ebitsapo. Aliwe lino litolere itwayikasa eryuwania enzira yetu y’erikania n’abandu. Tukakanganaya ngoko twanzire abandu omughulu tukakanaya nabo oko myatsi eyikabatsemesaya. Ekyo kikasaba, eribya bandu abakabinduka erikwamana n’emibere eyamabyaho n’erilebya ndeke emyatsi eyikahanga-hangaya obuli mundu n’eyikamutsemesaya. Ebroshua eno ikendituwatikya yiti erikola ekyo?

Ebroshua eno, yirimo esyosomo 12 esikakanganaya emibere eyo litolere itwabya nayo eyangatuwatikya eryanza abandu n’eriyira abigha. Obuli somo yiseghemere oko mwatsi we Bibilia owakakanaya oko mubere mulebe ogho Yesu kutse oghundi Mukristo w’oko karne k’erimbere akanganaya omw’itulira. Enzumwa ngulu si ry’erihamba omo mutwe eby’eribugha, aliwe ly’erilebya nga twangakangania tuti ngoko twanzire abandu. Ni kwenene obuli mubere ni w’endundi omo mubiiri wetu w’eritulira. Nomo bine, tukendilangira ngoko emibere milebe ni y’endundi kutsibu-tsibu omughulu tukatsukisaya omukania n’omundu, tukasubira abo twakanaya nabo, kutse tukigha e Biblia n’abandu.

Ukalebya obuli somo, ulengekanaye ndeke nga wangakolesya uti omubere oyo ukakania n’abandu b’eyo wikere. Uyikase eryanza Yehova yo kutsibu, n’abandu kutya. Olwanzo olo, kwilaba amenge wosi-wosi, ilukendikuwatikya eriyira abigha; nagho wo mwatsi mukulu ogho ukalandamirira.

Tukatsemera kutsibu olusunzo olo tuwite olw’erikola haghuma nenyu. (Zef. 3:9) Yehova abatsumule mukalola embere erikangania olwanzo kandi mukayira abigha.