Obupainia

Tukakolesaya ndeke akaghala ketu omughulu tukayihiriraho eby’erilandamirira omo mubírí wa Yehova. (1Kor 9:26) Hakisiya akatambi kake ekihugho kino ikyahika oko nduli. Okw’ekyo eriyihiriraho eby’erikola kikatuwatikaya erikolesya n’amange akatambi ketu. (Efe 5:15, 16) Omwiramya lyenyu ly’eka mwanganakania oko myatsi eyo mwanganayihiriraho erikola omo mwaka muhya w’omubírí ono? Erituwatikya, omwatsi ono alimo eby’erikola omo mubírí wa Yehova ebyo twanganalengekaniako n’erisaba busana nabyo.​—Yak 1:5.

Ng’eky’erileberyako, inywe bosi omo kihanda mwanganawatikya omundu mughuma owo kw’inywe eribya mupainia w’omughulu wosi? Wamalengekania ghuti siwangatoka erihikira esyosaha esisabirwe, kanaya n’abapainia balebe abali omo mibere eyisosire eyo ghulimo. (Emi 15:22) Kyamatokekana, mwanganabirikira omupainia okw’iramya lyenyu ly’eka neryo imwamubulya amabulyo. Yihirireho eprograme eyo wangakwama. Wamabya imuwanabya mupainia kera, wanganalengekania nga kyanganatasyatokekana erisubira obupainia.

Omo kihanda kyenyu mwanganasungika abangabya bapainia bawatikya oko mwisi mughuma kutse mingyi kwaho? Wamabya isighuwite akaghala kanene, wanganatoka eribya mupainia muwatikya omwibya ukatulira omo katambi kake obuli kiro. Wamabya isighuwite akatambi ak’eritulira omo katikati k’eyenga kundi ukakola omo yenga yosi kutse kundi ukinaya oko kalasi, wanganasombola eribya mupainia oko mwisi owawite biro bingyi ebyo bandu batekola omubírí kutse owawite amayenga itano. Uhandike oko kalendari ekiro ekyo wamasombola eritsuka obupainia, kandi uhandike eprograme yaghu.​—Emi 21:5.

MULEBAYE EVIDEO UBYE MUTUBAHA . . . IWE MUPAINIA, NERYO MUSUBIRAYE OKO RIBULYO LINO:

• Ebyo mwali wetu Aamand alabamo bikakanganaya biti ngoko Yehova anzire kandi akawatikaya abakayiherera oko mubírí w’obupainia?