Ulindirire enduli eye kihugho kino butsira buba

Hakisiya hake Yehova inyatsandia ekihugho kibi kino. Ebisomo by’amabehi bikenditsandibwa, ebihanda bikendikola omo mughuma busana n’erilwa n’abandu b’oMungu, na Yehova akendibughaho abandu babi bosi b’oko Harmagedoni. Abakristo banemulindirira n’omuhwa emyatsi yosi eyo.

Oko kwenene, sitwasi emyatsi yosi eyilebirye obulighe bunene. Ng’eky’erileberyako, sitwasi obulighe bunene nga bukendisyatsuka kiroki. Sitwasi abakulu be politike nga bakendisyabugha nga niki kyo kikaleka ibalwa n’ebisomo. Sitwasi ebihanda ebikendisyalwa n’abandu b’oMungu nga bikendisyakola bitya oko mughulu mungahi n’akandi amalwa ayo ng’ahiriremoki. N’akandi, sitwasi kwenene-kwenene Yehova ng’akendisyakolesyaki eribughaho abandu babi oko Harmagedoni.

Aliwe, Amasako akatuha ebyosi ebyo tulaghireko tutoke erilindirira omughulu ow’akasa butsira buba. Ng’eky’erileberyako, tunasi ngoko tuli oko nduli eye “biro by’enyuma-nyuma.” (2Tim 3:1) Tunasi ngoko endambi ey’ebihanda erilwa n’ebisomo ‘y’ikendisyakehibwa’ busana n’erisabula ekisomo ky’ekwenene. (Mt 24:22) Tunasi ngoko Yehova akendisyasabula abandu biwe. (2Pe 2:9) N’akandi tunasi ngoko omundu oyo Yehova abirisombola eribughaho abandu babi bosi n’eriteya endeko nene, ni mundu oy’utunganene kandi ow’akaghala kanene.​—Erib 19:11, 15, 16.

Oko kwenene, emyatsi ey’omughulu owakasa yikendisyaleka abandu ibalekula “busana n’eriubaha.” Aliwe, omughulu tukasoma n’erilengekania oko ebyo Yehova akola kera erisabula abandu biwe n’oko ebyo abiritubisulira oko mughulu ow’akasa, ‘twanganahangana, n’erisumba emitwe yetu,’ itunasi ngoko erisabuka lyetu line hakuhi.​—Lk 21:26, 28.