Amabulyo erilua oko basomi betu

Erisako ly’ Omugambuli 5:8 likabughira oko batabali b’ekihugho, kutse oko Yehova?

Erisako elyo likasomawa litya: “Wamalangira erinuba lyʼabera, nʼerigana eribanza nʼeritunganene omo kihugo, suswekere omwatsi oyo; kusangwa omukulu muguma akategaya ogundi mukulu; kandi hali bandu bakulu kwilababo.”​—Omug. 5:8.

Wamalusya oko mwatsi oyu kw’amalengekania w’oMungu; wanganabugha uti alinga omulondo oyu akakaniraya oko batabali b’ekihugho. Aliwe wamabilengekania oko mulondo oyu ko kutsibu, iwukendilangira ngoko omulondo oyu ahiriremo na Yehova kundi yukatutuleraya.

Erisako ly’ Omugambuli 5:8 likakanaya oko mutabali oyukanubaya omwera n’erimughanira eritunganene. Omutabali oyo akabirirawa ngoko hanganabya oghundi mukulu oyunemulangira ebyo akola, oyuwite ekitumbi eky’endata okwiye kutse ehamuli nene kumulaba omo butabali. Kandi hanganabya n’abandi abawite ehamuli y’endata. Eky’obulighe abatabali bosi abo banganakolera abandu bo muhanda; neryo abandu ibaghalwa busana n’obutabali obutuwene.

Nomo kyanganalangirika nga sihakiri eriyiketera lyosi-lyosi, tukasubibawa mutima eriminya ngoko Yehova ‘anemulangira abakulu’ b’amatabali w’abandu ayo. Twanganasaba oMungu y’obuwatikya n’erimughusira amalighe wetu. (Esy. 55:22; Flp. 4:6, 7) Tunasi ngoko “ameso wa Yehova akalaba-laba omo kihugo kyosi, eriyikangya mo w’amaka busana n’ab’omutima ahikene okwiye.”​—2 Emy. 16:9.

Kwesi, erisako ly’ Omugambuli 5:8 likatwibukaya ngoko omo kihugho ekyo tulimo; hakabya ihane oyuwite ehamuli ey’endata oko ghundi. Eky’omughaso munene, Erisako lino likatwibukaya ngoko Yehova yuli endata oko bosi, inga, iye yo w’ehamuli yosi. Anemutabala lino erilabira mughala wiwe Yesu Kristo oMwami w’Obwami. Ow’Obutoki bosi oyukalangira abandu bosi n’ebindu byosi atunganene na Mughala wiwe kutya.