Erighanyira amalolo agho twakola kera

Ekindu kighuma kisa ekyangaleka itwaghanyirwa amalolo wetu y’embanulo eyo Yesu ateka akuta omusasi wiwe. (Efe. 1:7) Aliwe, eBiblia ikabugha yiti: “OMungu akahanda omutima omwitughanyira amalolo agho twakola kera,” ni bugha ambu, amalolo agho twakola embere, Yesu isyalyaliha embanulo. (Rom. 3:25) Yehova mwasighala oMungu w’eritunganene nomo mwaghanyira amalolo embanulo isiyiriyatekwa. Ekyo mukyatokekana kiti?

Yehova mwalagha ati hakendisyabya “ekihanda [olubuto]” olukendisyasabula abosi abakendisyamwikirirya n’erikirirya emilaghe yiwe. Omwilagha ekyo, embanulo muyaluyabya nga yamabilihwa. (Enz. 3:15; 22:18) OMungu abya ayiketere ngoko Mughala wiwe akendisyateka embanulo omwanza liwe oko mughulu owatolere. (Gal. 4:4; Ebr. 10:7-10) N’omughulu Yesu abya oko kihugho ko hano, Yehova mwamuha obutoki bw’erighanyira amalolo nibya embanulo isiyiriyatekwa. Yesu mwatoka erighanyira amalolo w’abandu abakanganaya obwikirirya kundi inyanasi ngoko embanulo eyo akenditeka yikesyaliha amalolo wabo.​—Mat. 9:2-6.