Amabulyo erilua oko basomi betu
Erisako rye 2 Abanya Tesalonika 3:14 rikahana Abakristo erihanda omunwe oko bandu balebe. Neryo abangakola omwatsi oyo b’abasyakulu kutse y’endeko?
Omukwenda Paulo mwahandikira Abakristo be Tesalonika ati: “Omundu atitasikya ebyo tukababwira omo baruha eno, mumuhandeko omunwe.” (2 Tes. 3:14) Kera, abasyakulu ibakalabaya omukania w’erihana endeko hamabya omundu inanemukolelera akaghana erikwama erihano rilebe erikalua omo Kinywa ky’oMungu. Neryo enyuma sy’omukania oyo, abandi batuliri isibangalabya endambi n’omundu oyulyahandawako omunwe, kite ini oko mihindano y’endeko kutse omwitulira.
Aliwe, litolere itwabindula emyatsi. Lino twabiriminya ngoko erihano lya Paulo lyabya lilebirye ebyo abandu omo ndeko babya batolere erikola erikwamana n’emibere milebe eyamabya omo ndeko. Kwesi sikikitolere abasyakulu eriteka omukania ow’erihana endeko. Busanaki twamabindula eryowa lyetu oko risako lye 2 Abanya Tesalonika 3:14? Tukanaye oko ebyo Paulo abya akabugha omughulu ateka erihano lino.
Paulo mwowa ngoko omo ndeko eyo “mune abandu abanemuyighendya kitya-kitya.” Mwabaha erihano erilua omo Kinywa ky’oMungu aliwe mubaghana erikolesyalyo. Abere abilendererabo embere, mwahanabo ati: “Omundu amabya isyanzire erikola omubiiri, siritolere akalya.” Aliwe abaghuma ba kubo babya ibakinaghana erikola omubiiri owangabaha ebyo balaghireko nomo banabya n’obutoki. Kandi, ibakayingiraya omo myatsi etitabalebirye. Neryo, Abakristo babya batolere erikolera bati abandu ababya bakayighendya kitya-kitya abo?—2 Tes. 3:6, 10-12.
Paulo mwabwirabo ati, “mumuhandeko omunwe.” Ekinywa ky’Ekigiriki ekikakolesibawa hano kikanasonda eribugha kiti eriminya omundu oyo n’eribya itunasi ngoko anganatutsandya. Paulo mwateka erihano eri oko ndeko yosi, butsira oko basyakulu basa. (2 Tes. 1:1; 3:6) Neryo, obuli Mukristo oyo endilangira mughala kutse mwali wabo oyukaghana erisikya erihano erikalua omo Kinywa ky’oMungu, endiyisogha erileka “erikola obwira haghuma naye.”
Ekyo kinasondire eribugha kiti omundu oyo inyakakolerawa ng’omundu oyulyalusibawa omo ndeko? Iyehe, kundi Paulo mwatomekako ati: “Aliwe mubye mukamukunga, kundi ni mughala wenyu.” Neryo obuli Mukristo endilola embere erilabya endambi n’omundu oywabirihandwako omunwe oko mihindano n’omw’itulira, aliwe inyanganayisombolera ngakendibya akalabya naye endambi omo mwatsi y’eriyitsemesya kutse omo yindi myatsi. Busanaki? Paulo mwabugha ati: “Ekyo kikendileka iniakwa esisoni.” Omughulu tukaleka eribya kulabya endambi haghuma naye omo nzira eyo, inyanganakwa esisoni busana n’ebyo akakola neryo inyanganayisubako.—2 Tes. 3:14, 15.
Abakristo bangakolesya bati erihano eri munabwire? Eky’erimbere, litolere eriminya kwenene-kwenene omundu oyo ng’anemuyighengya kitya-kitya ngoko Paulo anabugha. Paulo syabya akabugha oko mundu uyukakola emyatsi eyo obunya mutima bwetu bukatika-tikira nomo siyiribuna esyokanuni kutse omughambo wa Yehova. Kandi Paulo syabya akakania oko bandu abatetsemera emyatsi mighumerera netu. Kandi Paulo syabya akabugha oko bandu abatutwikalaya. Aliwe, Paulo abya akakania oko bandu ababirihabwa erihano erilua omo Kinywa ky’oMungu aliwe ibayisogha eritendikwamalyo.
Munabwire twamabilangira mughala kutse mwali wetu akalola embere eritendisikya amahano erilua omo Kinywa ky’oMungu,a tukendiyisogha eritendibya tukasiba naye omo myatsi eyite y’obunya-kirimu. Aliwe, kundi eryo ni yisogha ly’obuli mundu, kitolere itwakania oko mwatsi oyo n’abandu abo twikere nabo omo nyumba nguma basa. Kandi, tukendilola embere eribya tukasiba na mughala kutse mwali wetu oyo oko mihindano n’omwitulira. Omundu oyo amabibinduka, itwanganasyatsuka eribya tukasiba naye.
a Ng’eky’erileberyako, mughala wetu oyuwite obutoki anganaghana erikola omubiiri owangamuwatikya eribana eby’alaghireko, kutse anganalola embere n’obwira bw’endwa n’omundu uyute Mwimiri wa Yehova, kandi kutse anganabya akabugha muhanda oko busondoli obo tukabana omo ndeko kutse inyabya akabugha oko bandi kw’emyatsi eyituwene. (1 Kor. 7:39; 2 Kor. 6:14; 2 Tes. 3:11, 12; 1 Tim. 5:13) Abakalola embere erikola emyatsi eyiri ng’eyo b’abandu abakayighendaya “kitya-kitya.”