Esomo 3

Yesu Kristu nindi?

Yesu akahulawa m’omughala “Akambere” k’oMungu busanaki? (1)

N’akandi akahulawa mo “Ekinywa” busanaki? (1)

Busanaki mw’asa oko kihugho m’omundu w’omubìrì? (2-4)

Ekyaleka iniakola ebithikothiko niki? (5)

Yesu akasyakolaki omo mighulu eyikasa? (6)

1. Embere ase omo kihugho, Yesu abya ikere omo lubula mo mundu-mulimu. Abya kihangwa ky’oMungu eky’erimbere, kilekire iniahulwa mo mughala “akambere” k’oMungu. (Abanya Kolosai 1:15; Eribisulirwa 3:14) Yesu ni mughala kyusa oyo Mungu ahangika iyowenewene. Emuliro w’eribya mundu, Yehova, mw’amuyira m’“omukoli mukulu” omw’ihangikwa ly’ebindi bindu byosi omo lubula n’oko kihugho. (Emisyo 8:22-31; Abanya Kolosai 1:16, 17) N’akandi, oMungu mw’amuyira mo mbuyi nkulu yiwe. Ekyo kyoyaleka Yesu iniahulwa mo “Ekinywa.”​—Yoane 1:1-3; Eribisulirwa 19:13.

2. OMungu mw’alebeka mughala wuwe y’oko kihugho. Mw’ahumirya engebe yiwe y’omo nda ya Marya. Yesu kw’athawithe athya thatha mundu y’omo kihugho. Kyokyaleka iniabuthwa butsira erilolo kutse erithendibererera. OMungu mw’athuma Yesu y’oko kihugho busana n’esyonzumwa isatu: (1) Erithukangirirya ekwenene y’oMungu (Yoane 18:37), (2) eritsunga erithunganana eribererere, athoke erithusighira olughobe olw’erikwama (1 Petero 2:21), kandi (3) eriherera obuyingo buwe athoke erithulusya omo bukobe bw’erilolo n’oluholo. Eriyiherera ly’abya n’omughaso busanaki?​—Matayo 20:28.

3. Omulume w’erimbere yo Adamu abere aghana erisikya ebyalaghira by’oMungu, mw’akola eky’eBiblia ikahula mw’“erilolo.” Kw’oMungu amuthwira athya eribanza ly’oluholo. (Enzuko 3:17-19) Mw’abya isyakihekene oko lulengo ol’oMungu abya asondire, neryo mw’aherya eribererera. Kw’atsuka athya erikekeluha n’erihika ok’oluholo. Adamu mw’asighalirya abana biwe b’erilolo. Ekyo kilekire n’ethu ithwakekeluha, ithwahika kw’esyondwala, n’oluholo. Neryo thwangalamire thuthi?​—Abanya Roma 3:23; 5:12.

4. Yesu abya mundu oyubererere ngoko Adamu abya. Aliye, erisighana na Adamu, Yesu mw’akangania eryowa elibererere ok’oMungu n’omw’ilengwako ly’akatsibu. Kyo kyamuha obuthoki bw’eriherera engebe yiwe eyibererere, eriliha erilolo lya Adamu. Ekyo ky’eBiblia ikahula mw’“embanulo.” Olubutho lwa Adamu kolwathoka lutya eriboholwa omo nzwere y’oluholo. N’abosi abakikiriraya Yesu erighanyirwa amalolo wabo n’eribana engebe y’erikotha.​—1 Timoteo 2:5, 6; Yoane 3:16; Abanya Roma 5:18, 19.

5. Omughulu Yesu abya omo Kihugho, mw’ughuthya abakwire enzala, n’eribonderya ekihunga. Neryo mw’ahika n’okwilubukya abaholi. Akola ebithikothiko ebyo busanaki? (1) Abya akakwira abandu abakaghalawa bw’obulighe, iniakasonda eribawathikya. (2) Ebithikothiko biwe mobyakangania kwenene kwali mughala w’oMungu. (3) N’akandi mobyakangania ebyakandisyakolera abandu abakowa omughulu akasyathabala ekihugho kyosi.​—Matayo 14:14; Marko 2:10-12; Yoane 5:28, 29.

6. Yesu mwahola kandi oMungu mw’amulubukya mo kihangwa mulimu, neryo mw’asuba elubula. (1 Petero 3:18) Erilwa aho, oMungu abirimusingya mw’omwami. Hakisiya hake, Yesu iniakalusaya omo kihugho mw’amakoni n’amaghali awosi.​—Esyonyimbo 37:9-11; Emisyo 2:21, 22.

[Esyofoto oko bukurasa 7]

Emibírí ya Yesu yabya erikangirirya, erikola ebithikothiko, n’eriherera engebe yiwe busana n’ethu