Esomo 4

Diabolo nindi?

Sitani Diabolo​—alwahi? (1, 2)

Sitani akalendaya abandu b’athi? (3-7)

Busanaki litholere ithwahanganira Diabolo? (7)

1. Ekinywa “diabolo” n’ibúgha kithi oyukathúla amabehi mabi w’oko ghundi mundu. “Sitani” y’enzighu kutse omulwi. Ebinywa ebyo bikanganirye enzighu nene y’oMungu. Oko nzuko, abya mughuma w’oko bamalaika ababererere omo lubula haghuma n’oMungu. Neryo, enyuma okw’aho mw’ayihahamisya kutsibu kw’asonda athya eriramibwa eritholere ilyahabwa oMungu musa.​—Matayo 4:8-10.

2. Omumalaika oyo, yo Sitani, mw’akania na Eva omo nzoka. Mw’amubwira amabehi, kw’ahika athya okw’ithendisyowa oMungu. Eryo Sitani mwahira h’obuhaka oko kikahulawa m’“obuthabale buwe bw’ebyosi,” kutse obukama obw’endatha oko byosi. Mw’ahiraho erithikathika okw’iminya erithabala ly’oMungu nga linatholere n’akandi nga lyanganalethera abandu abakathabalako b’omughaso ow’ekwenene. Sitani mwahira h’obundi buhaka okw’abikirirye oMungu athi sibangamala omw’ithunganana. Amathegheko ayo mw’aleka Sitani iniayiyira mo nzighu y’oMungu. Ekyalekire kyekyo iniahulwa mo Sitani Diabolo.​—Enzuko 3:1-5; Yobu 1:8-11; Eribisulirwa 12:9.

3. Sitani akakuna abandu bamuramaye. (2 Abanya Korinto 11:3, 14) Enzira nguma eyakathebaya mw’abandu y’edini y’amabehi. Edini yamabya iyikakangiriraya amabehi ok’oMungu, iyikakola erisonda lya Sitani. (Yoane 8:44) Abandu abali omo dini y’amabehi banganabya bakalengakania bathi bakaramaya oMungu w’ekwenene. Alibo, oyo bakakolera kwenene ni Sitani. Iye y‘[oMungu] w’ekihugho kino.’​—2 Abanya Korinto 4:4.

4. Erikania n’esyombinga y’eyindi nzira eyo Sitani ikakura mw’abandu babye omo kathi k’obuthoki bwayo. Bakalakira abalimu bathoke eribatsunga, eryaghalya abandi, erilaghula emyatsi y’ebiro bikasa, kutse erikola ebithikothiko. Sitani yo kaghala kabi akabisamire emwisi w’emibírí eyo. Okw’itsemesya oMungu, litholere ithwaghana erikania n’esyombinga.​—Eryibuka ebihano 18:10-12; Emibírí 19:18, 19.

5. Nakandi Sitani akathebaya abandu omw’iyihahamisya kutsibu busana n’erangi y’ekihanda n’omw’iramya ebithunga eby’epolitike. Abandi bakalengekanaya bathi ekithunga kyabo kutse ekihanda kyabo kilengire ebindi. Aliyo, si kwenene n’ahake. (Emibírí 10:34, 35) N’abandi nabo bikirirye bathi esyondeghekerere sy’epolitike syo sikasyabugha ho ebikaghalaya abandu. Erikola bathya, ly’erighana obwami bw’oMungu. Ibo busa bobukasyabugha ho ebikathwaghalaya.​—Daniele 2:44.

6. Eyindi nzira eyo Sitani akathebaya mw’abandu sy’esyongumbu nyibi. Yehova akathubwira athi thuleke erikola amalolo kusangwa iye anasi amalolo kw’akathwaghalaya. (Abanya abagalatia 6:7, 8) Hanganabya abakakukura bathi ukole emibírí mibi eyo. Aliwe, isiwibirirawa, sitani yukaronda kwenene athi ukole emibírí mibi eyo.​—1 Abanya Korinto 6:9, 10; 15:33.

7. Sitani anganalabira omo lwendereryo kutse erihanganirwako athoke erikuluhya uleke erikolera Yehova. Abaghuma bw’oko bathunga baghu bangana kuhithanako kutsibu kusangwa ukigha eBiblia. N’abandi bangana kusekererya. Uliwe, oyo wakuha engebe nindi? Sitani akaronda erikubahisya uhike okw’ileka erigha eBiblia. Isiwaleka Sitani akusinge! (Matayo 10:34-39; 1 Petero 5:8, 9) Wamahanganira Sitani, iwukanditsemesya Yehova n’akandi iwamakangania ko uhambire obuthabale buwe bw’ebyosi.​—Emisyo 27:11.

[Esyofoto oko bukurasa 9]

Edini y’amabehi, erikania n’esyombinga, n’eriyihahamisya busana n’ekihanda bikaheraya abandu

[Esyofoto oko bukurasa 9]

Uhanganire Sitani ulolaye emuliro eriminya Yehova