Esomo 11

Esyonyikiriryo n’amakinga athetsemesaya oMungu

Ni nyikiriryo na makinga muhandaki wathetsemesaya oMungu? (1)

Linatholere abakrsistu ibikirirya bathi oMungu ni Busathu? (2)

Ekikaleka abakristu b’ekwenene ibathasikya eNwili, ePasika, kutse ebiro by’eributhwa niki? (3, 4)

Abaholi banganaghalya abaliho? (5)

Yesu mw’anakwira oko musalaba? (6)

Eritsemesya oMungu line na mughaso kundu? (7)

1. Esyonyikiriryo n’amakinga wosi si nyibi. Aliye, oMungu syikirirye amaghuma wakugho awalwire omo dini y’amabehi kutse awathahambene n’erikangirirya ly’eBiblia.​—Matayo 15:6.

2. Obusathu: Yehova nina Busathu—abandu basathu omo Mungu mughuma kwehi? Nahake! Yehova, yo Thatha, ni “[Mungu] mughuma w’ekwenene.” (Yoane 17:3; Marko 12:29) Yesu ni mughala Mumbere Wuwe, kandi akamowa. (1 Abanya Korinto 11:3) Yo Thatha ni mukulu kulenga oMwana. (Yoane 14:28) Ekirimu kibuyirire si mundu; ni kaghala k’oMungu akakakola emibírí.​—Enzuko 1:2; Emibírí 2:18.

3. ENwili n’ePasika: Yesu syabuthawa oko mwisi w’erikumi n’eyibiri ebiro 25. Abuthawa hakuhi n’ekiro 1 oko mwisi w’erikumi, omughulu abalisya bakalisaya amahyo wabo w’omo kisuki omo kiro. (Luka 2:8-12) Yesu mw’athahamulira abakristu erisikya ekiro abuthawa. Naho, mwabwira abigha biwe athi basyabya bakibuka, kutse erilengekania, erihola liwe. (Luka 22:19, 20) Enwili n’amakinga wayo byasirire omo syodini sy’akera esy’amabehi. Kobine bithya n’oko makinga w’ePasika, ng’erikolesya amayi n’esyondakuthu. Abakristu b’erimbere sibabya bakasikya eNwili n’ePasika, n’abakristu b’ekwenene ba lino kuthya.

4. Ebiro by’eributhwa: Erisikya ebiro by’eributhwa likanibwe ko ngendo ibiri nyisa omo Biblia, n’esyosi ni sy’abandu babya isibaliramaya Yehova. (Enzuko 40:20-22; Marko 6:21, 22, 24-27) Abakristu b’erimbere sibabya bakasikya ebiro by’eributhwa. Amakinga w’erisikya ebiro by’eributhwa alwire omo syodini sy’akera esy’amabehi. Abakristu b’ekwenene bakahemba abandi n’eriyitsemesya haghuma oko yindi mighulu y’ekirimo.

5. Erisagha abaholi: Abaholi sibangathakola kutse eryowa n’ekindu n’ekighuma. Sithwangabawathikya, kandi nabo sibangathuhuthalya. (Esyonyimbo 146:4; mugambuli 9:5, 10) Enafsi ikahola; siyebya n’engebe enyuma w’oluholo. (Ezekieli 18:4) Alibo, abamalaika babi esindi ngendo, abakahulawa mw’esyombinga, bakayahula mo balimu b’abaholi. Amakinga wosi w’erisagha kutse eriramya abaholi ni mabi.​—Isaya 8:19.

6. Omusalaba: Yesu mw’athaholera oko musalaba. Mw’aholera oko muthi, kutse enduhi. Ekinywa ky’ekigiriki ekikabindulawa mo “musalaba” omo Biblia nyingi kikanganirye omuthi mughuma musa. Ekisosekanio ky’omusalaba kilwire omo syodini sya kera esy’amebehi. Abakristu b’erimbere sibabya bakakolesya omusalaba kutse eriramya gho. Neryo, ukalengekanaya wuthi linatholere erikolesya omusalaba w’omw’iramya kwehi?​—Eryibuka Ebihano 7:26; 1 Abanya Korinto 10:14.

7. Erisighania amakinga kutse esyonyikiriryo esithahambeme n’Amasako ni mwatsi akalire. Abathunga n’abanwani banganahirika erikutsotserera bathi siwubindule esyonyikiriryo syaghu. Eritsemesya oMungu liri n’omughaso ow’alengire kutsibu eritsemesya abandu.​—Emisyo 29:25; Matayo 10:36, 37.

[Efoto oko bukurasa 22]

OMungu si Busathu

[Efoto oko bukurasa 23]

Enwili n’epasika Byasirire omo syodini sy’akera sy’amebehi

[Efoto oko bukurasa 23]

Sihali n’enzumwa n’enguma ey’eriramya abaholi kutse eribasagha