Ni byahi ebikakolawa oko Biro Nge?

Abanya Beteli bakakola emibiri mingyi, okwimanira omubiri w’erihubiria omo kihugho kighuma kutse bihugho bingyi. Hane abakahindula ebitabu omo yindi mibughe, abakatsapisaya esyogazeti n’ebitabu, abakakolera ahakabikawa ebitabu, abakakola emyatsi ye video, n’eyindi mibiri.

Ekyaghanda ky’eBeteli kikimanira emibiri. Ekyaghanda Kikulu kikaha ekyaghanda ky’eBeteli omubiri w’erimanira ebiro nge kutse eBeteli. Ekyaghanda ky’eBeteli kikabya mw’abasyakulu basatu kutse kwilabaho, abatolere. Kikabya ikinemutumira Ekyaghanda Kikulu eraporo ngoko omubiri akaghenda, n’oko bitsibu byosi-byosi ebikabya. Esyoraporo esyo sikawatikaya Ekyaghanda Kikulu eriminya nga ni myatsi yahi eyangahirwa omo bitabu byetu ebikahandikawa, n’ebyangakanibwako oko mihindano mike-mike n’eminene-minene. Abatumwa b’ebiro ngulu bakatumawa n’Ekyaghanda Kikulu batoke erilenderera esyo Beteli n’eriha Ekyaganda ky’eBeteli obusondoli ngoko bangakola emibiri yabo. (Emisyo 11:14) Hakabya n’endegheka ey’embaghane eyo omutumwa w’ebiro ngulu akalabayako ehotuba eyikahimba abandu abali omo muyi owalimo eBeteli.

Eriwatikya esyondeko esiri omo kihugho ekyo ebiro nge ikimanira. Baghala betu abali omo Kyaghanda ky’eBeteli bakaligha eritsuka ly’esyondeko sihya-sihya. Kandi bakasondola omubiri ow’abapainia, abamisionere, n’abalebererya b’omutimbo abali omo kihugho ekyo eBeteli ikimanira. Bakateghekanaya emihindano minene minene, obuhimbe bw’Ebisenge by’Obwami, n’erikola ekyosi ebitabu n’amagazeti ahike omo syondeko. Ebyosi ebikakolawa oko Beteli bikaleka omubiri ow’erihubiria iniakolwa omo butondeke.​—1 Abanya Korinto 14:33, 40.

• Ekyaghanda ky’eBeteli kikawatikaya kiti Ekyaghanda Kikulu?

• Ekyaghanda ky’eBeteli kikakola mibiri yahi?