Busanaki oMungu akalekerera h’obubi n’eriaghalwa?

1. Obubi bwatsuka buti?

Obubi bwatsuka oko kihugho mughulu Sitani abugha amabehi w’erimbere-mbere. Okwitsuka, Sitani abya malaika oyuhikene, aliwe mwaghana ‘ekwenene.’ (Yoane 8:44) Mwatsuka eribya n’engumbu y’eriramibwa eryo oMungu musa yutolere. Sitani mwateba omukali w’erimbere, yo Eva, kandi mwaleka Eva amukenge omo mwanya w’erikenga oMungu. Adamu mwakwama Eva omwitendiowa oMungu. Adamu erikola eki, lyo lyaleta amalighe n’oluholo.​—Usome Enzuko 3:1-6, 19.

Omughulu Sitani abwira Eva ati syowe oMungu, mwabya iniakatsukisaya omulele oko butabali bukulu b’oMungu. Abandu bangyi babirikwama Sitani bakaghana oMungu ng’Omutabali wabo. Neryo, Sitani abiribya ‘mutabali w’ekihugho.’​—Usome Yoane 14:30; 1 Yoane 5:19.

2. Twanganabugha tuti obuhangiki b’oMungu bwabya ibutsandire?

Emibiri yosi y’oMungu yihikene. Abandu n’abamalaika ab’oMungu ahangika babya ibanganatoka erikenga oMungu yo ndeke-ndeke. (Eryibuka Ebihano 32:4, 5) OMungu mwatuhangika, neryo mwatuha obwiranda bw’erikola ekibuya kutse ekibi. Obwiranda obu bukatuha akanya ak’erikangania nga tunanzire oMungu.​—Usome Yakobo 1:13-15; 1 Yoane 5:3.

3. Busanaki oMungu abirilekerera h’eriaghalwa erihika lino?

Yehova abirilekerera omulele oko butabali bwiwe bukulu omo biro bilebe. Busanaki? Erikangania ngoko sihali obundi butabali obwangawatikya abandu. (Omugambuli 7:29; 8:9) Emyaka 6 000 eyamatalaba, yikakanganaya eki kyo ndeke-ndeke. Abatabali b’ekihugho babirilemwa eribughaho amalwa, obubi, erighonerwa, kutse asyondwala.​—Usome Yeremia 10:23; Abanya Roma 9:17.

Obwami b’oMungu sibuli ng’obwami bw’abandu, kundi ibo bukawatikaya abandu abakabuliga. (Isaya 48:17,18) Yehova akisiya iniabughaho amatabali wosi w’abandu. Abakasombola obutabali b’oMungu nibo basa bakendisyikala oko kihugho.—Isaiya 11:9.​—Usome Danieli 2:44.

Lebaya evideo Busanaki oMungu akalekereraho eryaghalwa?

4. Erilindirira ry’oMungu likatuha omwanya w’erikola ki?

Sitani mwabugha ati sihali n’omughuma oyo wangakolera oMungu busana n’erimwanza. Unanzire erikangania ngoko eki ni mabehi? Siwangataluka! Erilindirira ry’oMungu likatuha omwanya w’erikangania nga twanzire obutabali b’oMungu kutse obw’abandu. Ebyo tukakola byo bikakanganaya ekyo twanzire.​—Usome Yobu 1:8-12; Emisyo 27:11.

5. Twamanza oMungu abye mutabali wetu, litolere itwakola ki?

Erianza oMungu abye mutabali wetu, litolere itwasondekania eriramya ly’ekwenene erihambene n’eBiblia n’erikwamaryo. (Yoane 4:23) Litolere itwaghana obutabali bwa Sitani omwiyiteya oko myatsi ye politike nga Yesu.​—Usome Yoane 17:14.

Sitani akakolesaya obutoki bwiwe erikanyisya obutswatswa n’emibere mibi. Twamaghana ebindu ng’ebi, abanwani n’abomo kihanda kyetu banganatusekererya kutse eritupona. (1 Petero 4:3, 4) Oko ndambi eyo, litolere itwasombola ekyo tukendikola. Tunemwendibya bughuma n’abandu abanzire oMungu? Tunemwendikenga emighambo yiwe ey’amenge n’ey’olwanzo? Twamakola ebi, itukendikangania kwenene ngoko Sitani mwabiha akabugha ati sihali omundu n’omughuma oyo wang’owa oMungu amalengwako.​—Usome 1 Abanya Korinto 6:9, 10; 15:33.

Olwanzo lw’oMungu oko bandu lukaleka itwaligha ngoko obubi n’eriaghalwa bikendisyahwa. Abakakanganaya ngoko bikirirye eki bakendisyikala oko kihugho kera na kera.​—Usome Yoane 3:16.