Daudi syabya muba

Ukakolaki omughulu wamakwa obuba?— Alinga ukatibita eyiri koyo kutse eyiri tata waghu atoke erikuwatikya. Aliwe hane oghundi mundu oyo angakuwatikya. Awite akaghala kanene kulenga obuli mundu wosi. Unasi nga nindi?— Kwenene, ni Yehova Mungu. Tuterikania oko mulwana mughuma omo Biblia, yo Daudi. Abya isyalisagha kusangwa mwaminya ngoko Yehova akamuwatikaya.

Ababuti ba Daudi mubamukangirirya erianza Yehova eritsuka omo bwana bwiwe. Eki mukyawatikya Daudi eritendisagha n’omo hangabere ekyangamwita obuba. Mwaminya ngoko Yehova ni Mwira wiwe kandi ngoko angamuwatikya. Kiro kighuma abere anemulisya esyombuli siwe, esimba nene muyasa n’erisyaheka embuli y’omo buno bwayo! Unasi ekyo Daudi akola? Mwatibita oko simba eyo, alinga mwitayo isyawite oko kindu! Kandi n’edubu y’abere y’asira esyombuli siwe, nayo mwitayo! Ukalengekanaya oyo awatikaya Daudi nindi?— Abya ini Yehova.

Oghundi mughulu owo Daudi akanganaya ngoko syalyubaha mwahika. Abaisraeli babya ibanemulwa n’abandu abakahulawamo Abafilistini, omughuma w’oko basuda Abafilistini abya kilume kirikiri kandi kinene kutsibu, kikakambwe! Abya aniakahulawamo Goliata. Ekilume eki ikikasekereraya Abaisraeli na Yehova. Goliata mwabwira abasuda Abaisraeli ati ibanata pima erilwa naye. Aliwe Abaisraeli bosi mubasagha erilwa naye. Daudi abere owa omwatsi oyo mwabwira Goliata ati: ‘Ngandilwa naghu! Yehova akandingwatikya kandi ngandikukinda!’ Ukalengekanaya Daudi mwanubaha?— Iyehe, mwatubaha na hake. Unanzire iwaminya nga mubyasyaghenda biti?

Daudi mwimya omujeledi wiwe na mabwe atano awakomire ndeke, n’eryo mwayalwa n’ekikakambwe ekyo. Goliata abere atalangira Daudi ngoko ali, mwamusekererya. Aliwe Daudi mwabwira Goliata ati: ‘Wamasyalwa naye omo muyali, nikwa inje ngakwasira omo rina lya Yehova!’ Neryo mwahira eribwe ry’omo mujeledi, n’erimughusa ryoko. Eribweryo mulyabongola embumo ya Goliata! Neryo ekikakambwe ekyo mukyawa ahisi, n’erihola! Abafilistini mubakwa obuba bunene kutsibu bamatibita. Omulwana mulere nga Daudi mwatoka ati erikinda ekikakambwe eki?— Yehova mwamuwatikya, kandi Yehova aby’awite akaghala kanene kulenga ekikakambwe ekyo!

Omwatsi wa Daudi akakw’ighisayaki?— Yeho;va awite akaghala kanene kulenga omundu wosi wosi. Kandi ni mwira waghu. Neryo wamatasyasunga ekikakwita obuba, w’ibuke ngoko Yehova anganakuwatikya iwatubaha!