Ngoko wangawatikya enyuma sy’ekitsinduli

Munabwire ebitsinduli byabirikanyirira. Omughulu hamabya ekitsinduli, litolere emyatsi y’eriwatikya iyatondekwa ndeke kandi ihabya erikola omo bughuma. Busana n’ekyo Ekyaghanda Ekikasondola, kyabirihira omo buli beteli mw’Ebiro Eyikawatikaya Abalyahikirawa n’Obuhanya.

Omughulu baghala betu b’omo katunga ako bakowa ngoko omo kiharo kilebe mwabiribya ekitsinduli, bakalw’ibabirikira oko basyakulu ab’omo kiharo ekyo batoke eriminya ebyo batuliri bakendilaghako. Abatuliri bamabya isibangatoka erikokotya ebiryatsanda, ebeteli ikasombola baghala betu ab’erisondola omubiri w’eriwatikya abalyahikirawa n’obuhanya. Baghala betu banganasaba abandu b’eribawatikya kutse erisaba abandu eriteka bindu bilebe. Kutse banganaghula ebyo balikyetu balaghireko n’eribahabyo.

Erikwama emitondekere eyo liwite ndundi nene. Ekyo kikawatikaya eritendikola ekyo abandi babirikola, kikaleka abandu ibakwamana ndeke, kandi kikawatikaya erikolesya ndeke esyofranga n’ebindu.

Baghala betu abo abakasombolawa n’ebeteli, banganaminya nga bakendilagha oko syofranga singahi n’oko bandu bangahi bakawatikaya ahalyabya obuhanya. Kandi banganahikira abakulu b’eleta b’omo kiharo ekyo, kundi abakulu abo banganabawatikya erihikya luba obuwatikya b’oko babulaghireko. Busana n’ekyo siritolere abandu ibayitswa erikuma-kuma esyofranga, erituma obuwatikya, kutse erighenda eyiryabya ekitsindula ebeteli yamabya isiyitabahamulira.

Nomo bine, omughulu hamabya ekitsinduli tukanza eriwatikya. (Ebr 13:16) Twanzire balikyetu! Neryo twangawatikya tuti? Ekikulu kutsibu, ly’erisabira abalyahikirawa n’ekitsinduli n’abalikyetu abakabawatikaya. Kandi twanganateka esyofranga sy’eriwatikya oko mubiri w’ekihugho kyosi. Esyobeteli syo sikaminya aho esyofranga esyo syangawatikya kutsibu. Aliwe sikakwama obusondoli bw’Ekyaghanda Ekikasondola. Kandi wamabya iwanzire eriwatikya oko mibiri, wanganusulya efomu eya Demande d’admission comme volontaire local développement-construction (DC-50).

MUKWAME EVIDEO AMEGHETSE MWABWAGHA E BREZILE, NERYO MUSUBIRAYE OKO MABULYO ANO:

Wamatsemera mwatsi wahi oko ebyo Abimiri ba Yehova bakola omughulu amaghetse abwagha omo Brezile oko 2020?