‘Mukwame ndeke omwatsi w’ekwenene’

1. Tukabana ndundi yahi omw’ikanirania nga twaminya “ekwenene” yo tuti?

“WAHIKIRA eriminya ekwenene yo wuti?” Ahate eritika-tika, wabiribulibwa eribulyo eryo lyo ngendo nyingyi. Eryo ni righuma ry’oko mabulyo agho tukabulaya oMukristo mulikyetu omughulu tukanza erimuminya ndeke. Tukanza eryowa ngoko abaghala n’abali betu bahikira eriminya n’eryanza Yehova. Kandi tukanza eribabwira ekikaleka itwatsemera eribya Bimiri ba Yehova. (Rom. 1:11) Erikanirania eryo, rikaleka itwatasy’ibuka ngoko ekwenene ni y’obughuli bunene. Kandi rikaleka itwayisogha kundu ‘erikwama ndeke omwatsi w’ekwenene,’ nibughambu eribya n’emibere eyangaleka itwaliwa na Yehova n’eribana emiyisa yiwe.​—3 Yoa. 4.

2. Tukendikania okuki omo mwatsi ono?

² Omo mwatsi ono, tukendikania oko myatsi milebe y’oko yikaleka itwanza ekwenene. Kandi tukendilangira ngoko twangalola embere erikangania ngoko twanzire ekihembo ky’obughuli eki. Er’igha omwatsi ono likendileka itwabya n’erisima linene oko Yehova busana n’erituleta omo kwenene. (Yoa. 6:44) Kandi likendileka itwabya n’engumbu nene y’erikangirirya abandi b’ekwenene y’eBiblia.

EBIKALEKA ITWANZA “EKWENENE”

3. Ni mwatsi wahi mukulu w’akaleka itwanza ekwenene?

³ Hane myatsi mingyi eyikaleka itwanza ekwenene. Omwatsi mukulu oko yosi, twanzire Yehova Mungu, enzuko y’ekwenene. Erilabira eKinywa kiwe eBiblia, twabirihikira eriminya ngoko yo Muhangyiki ow’ekihugho n’olubula ow’obutoki bunene kutsibu, aliwe kandi ngoko ni Tata w’olwanzo, oyukatutsomana ndeke. (1 Pet. 5:7) Tunasi ngoko oMungu wetu ‘oswire n’erighanyira n’olukogo, sianguhire, okw’ihitana, oswire n’obwenge bw’olwanzo n’omwatsi w’ekwenene.’ (Eri. 34:6) Yehova anzire eritunganene. (Isa. 61:8) Akapona akalangira tukaghalwa, anayiteghekire kandi anzire kutsibu eribughaho amaligho wosi oko ndambi ey’abirihiraho. (Yer. 29:11) Kikatsemesaya kutsibu! Oyo ni mughuma w’oko myatsi eyikaleka itwanza Yehova yo kutsibu!

4-5. Busanaki omukwenda Paulo mwasosekania amaha wetu n’engomo y’obwato?

⁴ Ni ghundi mwatsi wahi w’akaleka itwanza ekwenene? Ekwenene ikatuletera endundi nene. Tulebaye eky’erileberyako. Omo kwenene y’eBiblia muli amaha wetu aw’ebiro ebikasa. Erikangania endundi y’amaha ayo, omukwenda Paulo mwahandika ati: “Tuwite amaha aya awakasikaya emitima [ng’engomo eyikasikaya obwato]. Amaha aya ni w’ekwenene, asikire.” (Ebr. 6:19) Ngoko engomo yikasikaya obwato, eriyiketera lyetu erihulikirirene n’eBiblia nalyo lyanganatuwatikya eribya itunatekene omughulu tukalaba omo maligho.

⁵ Hano omukwenda Paulo abya akakania oko maha w’elubula agho aBakristo abahirirwe kw’amaghuta bawite. Aliwe kandi ebinywa ebi bilebirye n’aBakristo abali n’amaha w’erisyikala oko kihugho paradiso. (Yoa. 3:16) Ahate eritika-tika, eriminya amaha w’engebe y’erikota, lyabirileka engebe yetu iyabya n’omughaso.

6-7. Yvonne abiribana ndundi yahi omw’igha ekwenene y’eBiblia eyilebirye ebiro ebikasa?

⁶ Tulebaye ekyalolawako kya mwali wetu oyukahulawa mo Yvonne. Mwatakulira omo kwenene kandi iniasaghire oluholo. Akibuka omughulu asoma ebinywa ebyo ate angibirirwa bino: “Kiro kighuma ukendisyahola.” Neryo akabugha ati: “Ebinywa ebyo mobyaleka inabula otughotseri ngalengekania oko biro ebikasa.” Ingalengekanaya nyiti ‘engbe siyitolere eribya nyikuhi yitya.’ Yvonne iniakayibulaya ati, ‘Nyiriho busanaki?’ Kandi iniakabugha ati ‘sinyanzire erisyahola.’

⁷ Enyuma syaho, Yvonne iniabiryusuka, mwahindana n’aBimiri ba Yehova. Akabugha ati: “Monatsuka erikirirya ngoko nanganabya n’amaha w’erisyabyaho kera na kera omo Paradiso, oko kihugho.” Er’igha ekwenene lyabiriletera mwali wetu oyu y’endundi liti? Akatasyabugha ati: “Sindisyabula otughotseri busana n’erisagha oluholo kutse busana n’ebiro ebikasa.” Kilangirikire ndeke-ndeke ngoko Yvonne anzire ekwenene y’eBiblia, kandi akatsema kutsibu eribwira abandi b’oko maha wiwe w’ebiro ebikasa.​—1 Tim. 4:16.

8-9. (a) Omo musyo mughuma wa Yesu, omulume mughuma mwakangania ati ngoko akalangira ebindu ebyo abana mo by’obughuli? (b) Naghu takanaya ng’ukalangira ekwenene mo y’obughuli oko lulengo lwahi.

⁸ Ekindi ekiri omo kwenene y’eBiblia y’engulu mbuya eyilebirye oBwami bw’oMungu. Yesu mwasosekania ekwenene eyilebirye oBwami n’ebindu by’obughuli ebibisamire omo kitaka. Omo Matayo 13:44, Yesu mwabugha ati: “Obwami bw’elubula bulingene n’ebindu ebibisamire omw’irima. Omundu mwabana ebindu ebyo neryo mwabisabyo. Busana n’obutseme, omundu oyo akayagulaya ebyosi ebyo awite, neryo akagula eririma eryo.” Omulume oyo syabya akasondya ebindu by’obughuli. Aliwe omughulu abanabyo, mwayikasa kutsibu eribya nabyo. Neryo, mwaghulya ebyosi eby’abya awiteko atoke eribya nabyo. Busanaki? Kundi abya asi ngoko ebindu eby’alyabana ni by’obughuli bunene. Byabya bilengire kutsibu ekindu kyosi-kyosi eky’angasighania busana n’eribanabyo.

⁹ Naghu ko ukanalangira ekwenene yo utya? Ahate eritika-tika, k’ukanalangirayo utya! Tunasi ngoko sihali ekyosi-kyosi ekyo ekihugho kino kyangatuha ekyo twangasosekania n’obutseme obo tuli nabo lino busana n’erikolera Yehova. Itwe tuli n’amaha w’erisyabyaho kera na kera omo biro ebikasa omo Bwami bw’oMungu. Olusunzo olo tuwite lw’eribya n’obwira obuwene haghuma na Yehova, lulengire ekyosi-kyosi ekyo twangaherya. Ekikatutsemesaya kutsibu ly’“erikola ebiro byosi ebikamutsemesaya.”​—Kol. 1:10.

10-11. Niki kyo kyakuna Michael eribindula engebe yiwe?

¹⁰ Abangyi b’okw’itwe mobasighania emyatsi mingyi batoke eriliwa na Yehova. Abaghuma mobaleka emibírí yabo eyuwene omo kihugho. Abandi babirileka erikwamirira eribya bateke. Nibya n’abandi, mobabindula emibere yabo y’eribyaho omughulu baminya Yehova. Ekyo kyo Michael akola. Mwatakulira omo kwenene. Omughulu abya mulwana, mw’igha akarate. Akabugha ati: “Okw’ingye ini ky’omughaso munene eribya ininakalire okw’ikalya-kalya omubiri. Esindi ndambi ingayowa nga sihali oyo wanganyikinda.” Aliwe abere abitsuka er’igha eBiblia, mw’igha amalengekania wa Yehova nga niki oko malwa. (Esy. 11:5) Michael mwakania oko mulume mughuma n’omukali wiwe ababya bakamukangirirya eBiblia, ati: “Omughulu babya bakanyikangirirya ekwenene y’eBiblia mobatambwira bati nyileke akarate.”

¹¹ Michael mwalola embere eriminya Yehova, n’olwanzo lwiwe okw’iye molwalola embere erikula. Mwatsemera kutsibu omubere wa Yehova ow’erikangania abaramya biwe b’obughanyiri. Oko mughulu oyo, Michael mwalangira ngoko atolere inyayisogha eribindula engebe yiwe. Akabugha ati: “Monaminya ngoko erileka akarate w’akendibya mwatsi owakalire kutsibu ogho nyite natakola. Aliwe kandi, nabya inyinasi ngoko kikenditsemesya Yehova, kandi nabya nyikirirye ngoko erimukolera lilengire ebyosi ebyo nangasighania.” Michael mwalangira ngoko ekwenene eyo ak’igha ni y’obughuli, n’ekyo mokyaleka iniabindula engebe yiwe.​—Yak. 1:25.

12-13. Ekwenene y’eBiblia moyawatikya Mayli yo yiti?

¹² Erikangania ngoko ekwenene ni y’obughuli, eBiblia yikasosekanayayo n’ekyakakala ekikakoleraya omo mwirimya. (Esy. 119:105; Efe. 5:8) Mayli oyo wikere eAzerbaijan, akasima kutsibu busana n’obuwatikya obw’abiribana erilabira eKinywa ky’oMungu. Mwakulira omo kihanda ekighabene omo myatsi y’ekisomo. Baba wiwe abya Muislamu na mama wiwe ini w’omo kisomo ky’aBayahudi. Akabugha ati: “Nomo nyitabya ngatika-tika ngoko oMungu ane, habya ihane amabulyo mangyi aw’abya akangenderya. Nabya ingayibulaya nyiti, ‘Niki kyo kyaleka oMungu inyahangyika abandu, kandi busanaki omundu oyo wabiryaghalwa omo ngebe yiwe yosi akabya abihola iniatasyayaghalibwa omo muliro wa kera na kera?’ Kundi abandu bakabugha bati obuli kindu ekikahika n’isonda ly’oMungu, ingayibulaya nyiti, ‘Ni bughambu oMungu akasondola abandu kandi inyasyatsema akalangira bakaghalwa?’”

¹³ Mayli mwataluha erisondya ebisubiryo by’oko mabulyo wiwe. Endambi moyahika amaligha er’igha eBiblia, n’enyuma sy’aho amasa omo kwenene. Akabugha ati: “Amenge w’eriyiketera awali omo Biblia mwaleka inabya n’obutseme bunene omo ngebe. EBiblia erikania oko myatsi omo nzira eyowikire, molyaleka inatulera.” Itwe bosi tukapipa Yehova nga Mayli, “oyo watubirikira erilua omo mwirimya n’eringira omo kyakakala kiwe ky’eriswekera.”​—1 Pet. 2:9.

14. Niki kyo kyangatuwatikya eryanza ekwenene yo kutsibu? (Ulebaye akasanduku “Eyindi myatsi eyo twangasosekania n’ekwenene y’eBiblia.”)

¹⁴ Ebi ni by’erileberyako birebe ebikakanganaya ngoko ekwenene ni y’obughuli. Ahate eritika-tika wanganalengekania n’oko bindi bingyi okw’aho. Omo ndegheka yaghu y’eriyighisya eBiblia, wanganasondekania eyindi myatsi eyangaleka itwanza ekwenene. Omughulu tuk’anza ekwenene yo kutsibu, tukasunga n’esyonzira nyingyi sy’erikanganiryamo ngoko twanzireyo.

TWANGAKANGANIA TUTI NGOKO TWANZIRE EKWENENE?

15. Ni nzira yahi eyo twangakanganiryamo ngoko twanzire ekwenene?

¹⁵ Twanganakangania ngoko twanzire ekwenene omw’igha eBiblia but’umbya n’ebitsapo byetu ebihulikirirene nayo. Nomo twangabya itwabiribugha omo kwenene mw’ebiro bingyi, mughulu wosi hakabya ihane bingyi ebyo litolere itw’igha. Egazeti y’erimbere-mbere ey’Akaleberyo moyabugha yiti: “Ngoko eriwa eryowene eriri omoli likatimbawako n’ebiti ebituwene, ekwenene yitimbirweko n’amabehi mangyi w’omo kihugho kino awangaleka ikyakala erisungayo. Wamanza erisunga eriwa eryo, utolere iwasondya ndeke. . . . Wamanza eribana ekwenene eyo litolere iwayikasa. Isiwatoseka n’eriwa lighuma lisa ly’ekwenene. . . . Mughulu wosi, uyikase eribana esyokwenene sy’eBiblia.” Eriyighisya ni mubírí owakasaba eriyikasa, aliwe eriyikasa lyaghu siririkwa busa.

16. Ni nzira yahi y’eryigha yo yikakuletera endundi? (Emisyo 2:4-6)

¹⁶ Si y’obuli mundu omw’itwe yukatsemera erisoma n’eryigha. Aliwe Yehova akatusaba “erisonda n’erisonda-sonda” tutoke eryowa ekwenene yo ndeke. (Soma Emisyo 2:4-6.) Omughulu tukayikasa erisondekaniayo kutsibu, tukabana endundi. Corey akabugha ati omughulu akayighisaya eBiblia, akayiteghereraya omulondo mughuma-mughuma. Akabugha ati: “Ngasoma ebinywa ebiri oko hihalama, n’erisoma amasako awali oko hilufabe, n’erikwesa-kwesa eyindi myatsi. . . . Erikola nyitya, likangwatikaya er’igha myatsi mingyi!” Twamabya iko tuk’igha tutya kutse itukakolesaya eyindi nzira, tukakanganaya ko twanzire ekwenene omughulu tukayihiriraho endambi, n’omughulu tukayikasa eryighayo.​—Esy. 1:1-3.

17. Eribyaho erikwamana n’ekwenene ni bughambuki? (Yakobo 1:25)

¹⁷ Aliwe, tunasi ngoko er’igha ekwenene lisa siritosire. Eritoka eribana endundi yo ndeke, litolere engebe yetu iyakangania ngoko tuli omo kwenene, ni bughambu erikolesya ebyo tuk’igha omw’ibyaho lyetu. Ekyo kisa kyo kyangaleka ekwenene iyatuletera obutseme bunene. (Soma Yakobo 1:25.) Twangakolaki tutoke erikolesya ekwenene y’omw’ibyaho lyetu? Mughala wetu mughuma akabugha ati omundu atolere iniayilebya erilangira ah’akakola ndeke n’ahatolere eryuwania. Omukwenda Paulo mwabugha ati: “Aho twabirihika, tusike erikwamirira[ho] tutya.”​—Flp. 3:16.

18. Busanaki tukayikasa “erikwama ndeke omwatsi w’ekwenene”?

¹⁸ Terilengekania oko ndundi eyo tukabana omughulu tukayikasa “erikwama ndeke omwatsi w’ekwenene”! Engebe yetu ikuwana kandi tukatsemesaya Yehova n’abalikyetu. (Emi. 27:11; 3 Yoa. 4) Kwenene, eyi ni myatsi mibuyanga eyangaleka itwanza ekwenene n’eribyaho erikwamana nayo!