OMWATSI W’ERIGHA 4
OLWIMBO 18 Tukasima busana n’embanulo
Embanulo yikatwighisayaki?
“OMungu mwakangania ngoko atwanzire.”—1 YOH. 4:9.
ENZUMWA NGULU
Ebyo oluholo lwa Yesu lukatwighisaya oko mibere mibuya eyo Yehova na Yesu babiritukangania.
1. Busanaki kyuwene eribya tukahika oko muhindano w’obuli mwaka ow’Eryibuka oluholo lwa Yesu?
YEHOVA mwatuha ekihembo ky’obughuli bunene akatuma Mughala wiwe asyatuholere. (2 Kor. 9:15) Kundi Yesu mwaherera engebe yiwe, wanganabya n’obwira obuwene haghuma na Yehova Mungu. Kandi wanganabya n’amaha aw’erisyabyaho kera na kera. Tuli n’ebingyi ebyangaleka itwasima Yehova oyo ateka embanulo kundi atwanzire kutsibu! (Rom. 5:8) Erituwatikya erilola embere erikangania erisima lyetu n’eritendibirirwa ebyo Yehova na Yesu batukolera, Yesu mwatusaba eribya tukahika oko muhindano w’Eryibuka oluholo lwiwe obuli mwaka.—Luka 22:19, 20.
2. Tukendikania okuki omo mwatsi ono?
2 Omo mwaka ono, Eryibuka oluholo lwa Yesu rikendibya omo Poso, ekiro 12 Omwisi 4, 2025. Oko kwenene obuli mughuma w’okw’itwe anemupanga erisyahika oko muhindano oyo. Omo mughulu w’Eryibuka oluho lwa Yesu, twamabiyikasa erighaniryaa oko ebyo Yehova na Mughala wiwe batukolera, itukendibana endundi nene. Omwatsi ono akendikania oko ebyo embanulo yikatukangiriraya oko Yehova na Mughala wiwe. N’omwatsi owakwamire akendisyatuwatikya eriminya ngoko twangabana endundi omo mbanulo, kandi ngoko twangakangania erisima lyetu busana n’embanulo.
EBYO EMBANULO YIKATUKANGIRIRAYA OKO YEHOVA
3. Oluholo lw’omundu mughuma mulwatoka luti erisabula amamilioni w’abandu? (Ulebaye n’epitsa.)
3 Embanulo yikatukangiriraya ngoko Yehova anzire eritunganene. (Ebih. 32:4) Yiti? Adamu abere abighana eryowa oMungu mwabya mundu w’amalolo n’oko ndulya mwahola. (Rom. 5:12) Neryo kundi netu tuli bana biwe, tuli bakoli b’amalolo, kandi tukahola. Eritulusya omo bukobe bw’erilolo n’oluholo Yehova mwatuma Yesu eriteka embanulo. Aliwe, oluholo lw’omundu mughuma musa oyuhika-hikene lwenditoka luti erilusya amamilioni w’abandu omo bukobe bw’erilolo n’oluholo? Paulo mwakania okw’ekyo ati: “Eritendyowa ry’omundu mughuma [Adamu] muryaleka abandu bosi ibabya bakoli b’amalolo. Kutya, eryowa ry’omundu mughuma [Yesu] rikendisyaleka abandu bangyi ibabya batunganene” (Rom. 5:19; 1 Tim. 2:6) Paulo abya akasonda eribugha ati, abandu bosi ni bakoli b’amalolo kandi bakahola kundi omundu mughuma oyuhika-hikene mwatowa oMungu. Neryo imutwatoka erilua omo bukobe bw’erilolo n’oluholo, kyabya kitolere oghundi mundu oyuhika-hikene owe oMungu.
Busana n’omundu mughuma, ye Adamu, itwe bosi twabirikosa kandi tukahola; aliwe kandi busana n’oghundi mundu mughuma, ye Yesu, twanganalusibwa omo bukobe bw’erilolo n’oluholo (Ulebaye enungu 3)
4. Busanaki Yehova mwataleka abana ba Adamu abamowa babyeho kera na kera?
4 Yehova anabya asabirwe erituma Yesu erisyatuholera? Busanaki Yehova mwatalighira abana ba Adamu abamowa balw’ibabyeho kera na kera? Twanganalengekania tuti eyo yendibya nzira nyolo ey’erisoha olubanza olo. Aliwe itwamabirirwa eritunganene lya Yehova erihika-hikene. Adamu mwayiririra akaghana eryowa oMungu, neryo Yehova syendilekerania erilolo eryo.
5. Busanaki twanganayiketera kundu ngoko mughulu wosi Yehova akendisyakola eritunganene?
5 Neryo byendibya biti Yehova nga mwasombola eritendiliha embanulo n’eritendikwama eritunganene liwe akalighira abana ba Adamu abatahika-hikene erilw’ibabyaho kera na kera? Abandu benditika-tikira eritunganene ry’oMungu n’omo yindi myatsi. Ng’eky’erileberyako, bendiyibulya ng’anemwendisyaberererya n’ebindi ebyo abirilagha. Situtolere erihangya-hangya tuti alinga ekyo kyanganahika. Busanaki? Kundi Yehova mwakola eritunganene, nibya nomo mukyamusaba eriherera Mughala wiwe mwanzwa. Busana n’ekyo, twanganayiketera kundu ngoko mughulu wosi akendisyakola eritunganene.
6. Ni ghundi mubere wahi owakuna Yehova erituma Mughala wiwe? (1 Yohana 4:9, 10)
6 Hane oghundi mubere w’omughaso owakuna Yehova atume Yesu erisyatuholera. Omubere oyo lo lwanzo olo Yehova ali nalo okw’itwe. (Yoh. 3:16; soma 1 Yohana 4:9, 10.) Yehova mwatuma Mughala wiwe erisyatuholera kundi anzire itwasyabyaho kera na kera, kandi itwabya b’oko kihanda kiwe. Adamu abere abikola erilolo, Yehova mwamutibitako omo kihanda kiwe. N’ekyo mukyaleka itwe bosi itwabutwa ehihya w’ekihanda ky’oMungu. Aliwe kundi embanulo muyalihwa, abandu bosi abali n’obwikirirya omo Mungu kandi abakamwowa bakendisyabya omo kihanda kiwe. Na munabwire, Yehova anganaghanyira amalolo wetu, twanganabya n’obwira haghuma naye, kandi haghuma n’abaghala n’abali betu. Oko kwenene, Yehova atwanzire kutsibu.—Rom. 5:10, 11.
7. Eryaghalwa rya Yesu likatuwatikaya liti eriminya ngoko Yehova atwanzire kutsibu?
7 Tukabya twabilengekania ngoko mukyakala kutsibu oko Yehova akalangira Mughala wiwe akaghalibwa, tukayilangirira ndeke-ndeke ngoko atwanzire. Sitani mwabugha ati sihali omughombe w’oMungu n’omughuma oyukendisyasighala mutaleghula amabyaghalibwa kutsibu. Erikangania ngoko Sitani mwabiha, Yehova mwalighira Yesu aghalawe embere ahole. (Yobu 2:1-5; 1 Pet. 2:21) Yehova mwalangira abandu bakasekererya Yesu, abasuda bakamuhunza, n’erimukongomerera oko muti. Yehova mwalangira Mughala wiwe mwanzwa akahola oluholo olukaluma. (Mat. 27:28-31, 39) Yehova abya n’akaghala ak’erikakirya emyatsi eyo. Ng’eky’erileberyako, omughulu esy’onzighu sya Yesu syabugha siti: “Ino oMungu amulamaye amabya inyanamwanzire!” Yehova endikola ekyo. (Mat. 27:42, 43) Aliwe, oMungu ng’akola atya, embanulo siyenditoka erilihwa, netu sitwendibya n’amaha. Neryo, Yehova mwaligha Mughala wiwe aghalibawe erihika okw’ihola.
8. Yehova mwanayowa muhanda akalangira Mughala wiwe akaghalwa? Kanaya. (Ulebaye n’epitsa.)
8 Silitolere tukalengekania tuti kundi oMungu ni Mutoki w’ebyosi, syawite eriyowa! Mwabumba abandu n’obutoki obw’eriyowa. Kandi kundi eBiblia ikabugha yiti mwatubumba omo kisosekanio kiwe, ekyo ni bugha ambu naye anawite eriyowa. Yikakania okw’iye, eBiblia ikabugha yiti “mubamwita obulige,” kandi yiti “mubamuhitania.” (Esy. 78:40, 41) Terilengekania oko mwatsi wa Abrahamu na Isaka. Ukendyibuka ngoko Yehova mwasaba Abrahamu eriherera mughala wiwe kyusa. (Enz. 22:9-12; Ebr. 11:17-19) Terilengekania Abrahamu ng’abya n’obulighe bungahi kandi nga mwahangya-hangya kungahi akasonda erikera mughala wiwe-wiwe. Terilengekania Yehova naye nga mwabya n’obulighe bungahi kandi nga mwahangya-hangya kungahi akalangira abandu bakaghalya Mughala wiwe n’erimwita!—Lebaya oko jw.org evideo Mwighe obwikirirya bwabo—Abrahamu, Ekitswe 2.
Yehova mwaghalwa kutsibu akalangira Mughala wiwe akaghalwa (Ulebaye enungu 8)
9. Erisako ly’Abanya Roma 8:32, 38, 39 rikakuwatikaya liti eriminya olulengo l’olwanzo lw’oMungu okw’iwe n’oko baramya balikyaghu?
9 Embanulo yikatukangiriraya ngoko sihali omundu oyutwanzire nga Yehova. Nibya n’omutunga wetu oyutwanzire kutse omwira wetu w’oko ndungu, sibangatwanza ngoko oMungu atwanzire. (Soma Abanya Roma 8:32, 38, 39.) Twanganayiketera kundu ngoko Yehova atwanzire kutsibu kulenga ngoko tuyanzire. Unanzire erisyabyaho kera na kera? Yehova akakusunzira ekyo kyo kutsibu kulenga ngoko ukalengekanaya. Unanzire iwaghanyirwa amalolo waghu? Yehova anzire erikughanyira kulenga ngoko ukalengekanaya. Ekyo Yehova akalindirira okw’itwe ry’erikangania erisima ryetu oko kihembo kiwe eky’embanulo, erimwikirirya n’erimowa. Embanulo ni kihembo ky’obughuli bunene ekikakanganaya ngoko Yehova atwanzire kutsibu. Kandi omo kihugho kihya-kihya tukendisigha n’eyindi myatsi mingyi oko lwanzo lwa Yehova.—Omug. 3:11.
EBYO EMBANULO YIKATUKANGIRIRAYA OKO YESU
10. (a) Busanaki oluholo lwa Yesu mulwamuhangya-hangya? (b) Yesu mwakangania ati ngoko ebyo Sitani abugha oko Yehova abya mabehi? (Ulebaye n’akasanduku “Obutaleghula bwa Yesu mubwakangania ngoko Yehova yusingene.”)
10 Yesu atsomene kutsibu ebyo abandu bakabugha oko rina rya Tata wiwe. (Yoh. 14:31) Yesu mwahangya-hangya kutsibu akalengekania ngoko abandu bakendibugha muhanda oko rina lya Tata wiwe, kundi akendihola ng’omukola nabi. Ekyo kyo kyaleka inyasaba ati: “Tata kyamabitokekana, unilusayeko ekikombe eki.” (Mat. 26:39) Yesu erisighala mutaleghula oko Yehova erihika oko luholo mwakangania ndeke-ndeke ngoko ebyo Sitani abugha oko Tata wiwe abya mabehi.
11. Yesu mwakangania ati olwanzo lunene oko bandu? (Yohana 13:1)
11 Kandi embanulo yikatukanganaya ngoko Yesu atsomene kutsibu abandu, kutsibu-tsibu abigha biwe. (Misyo 8:31; soma Yohana 13:1.) Ng’eky’erileberyako, Yesu abya asi ndeke ngoko emyatsi milebe eyo akendisabwa erikola oko kihugho mukendibya n’emyatsi eyikalire, ng’oluholo olukaluma olw’endimuhikira. Aliwe Yesu mwakola emyatsi yosi eyikalire eyo, si kundi Tata wiwe amusaba erikola atya lisa, aliwe kandi ni kundi naye abya anzire abandu. Yesu mwakangania ngoko anzire abandu bo kutsibu omw’itulirabo, omw’ikangiriryabo, n’omw’iwatikyabo. Nibya n’ekiro ky’oluholo lwiwe, Yesu mwabana akatambi ak’erinabya abigha biwe b’oko bisando, erikangiriryabo, eribasubya mutima n’erikiraniabo. (Yoh. 13:12-15) Nibya inyane oko muti w’amaghali, Yesu mwabana akatambi ak’eriha omukola nabi y’amaha kandi mwimya n’omupango w’eriteya koyo wiwe. (Luka 23:42, 43; Yoh. 19:26, 27) Yesu mwatakangania olwanzo lunene oko bandu omw’iholerabo lisa, aliwe kandi mwakanganialo n’omw’ikolerabo omo lwanzo.
12. Yesu anemutukoleraki lino?
12 Nomo Yesu mwahola “kaghuma kasa,” akinatukolera emyatsi mingyi. (Rom. 6:10) Nge yahi? Anemulola embere erikola akatuha ebindu bingyi ebikatokekana munabwire busana n’embanulo. Kwenene Yesu anemukola emibiiri mingyi. Ni Mwami wetu, ni Muhereri Mukulu, kandi ni Mukulu w’endeko. (1 Kor. 15:25; Efe. 5:23; Ebr. 2:17) Anemwimanira omubiiri ow’erikuma-kumira haghuma abahirirweko amaghuta n’ab’omo ndeko nene. Omubiiri oyo akendisyahwa embere eryaghalwa rinene rihwe.b (Mat. 25:32; Mar. 13:27) Kandi anemukolesya omughombe mutaleghula alole embere erituha ebyo tulaghireko tutoke erikolera Yehova butaleghula omo biro bino by’enduli. (Mat. 24:45) Kandi omo butabali bwiwe bw’emyaka elfu moya, Yesu akendisyalola embere eritukolera n’eyindi myatsi. Omughulu Yehova atuha Mughala wiwe, mwatatuhaye busana n’erituholera lisa, aliwe mwatuhaye atukolere n’eyindi myatsi mingyi!
ULOLE EMBERE ERIGHA EMYATSI MIHYA
13. Erilengekania kutsibu lyangakuwatikya liti erilola embere erigha oko lwanzo olo Mungu na Kristo babiritukangania?
13 Wanganalola embere erilengekania buli oko myatsi eyo Yehova na Yesu babirikukolera. Kwa muhwa, omo mughulu w’Eribyuka oluholo lwa Yesu omo mwaka ono, wanganasoma omw’iyiteghererya e Enjili nguma kutse silebe. Isiwasonda erisoma esyosura nyingyi kughumerera. Omo mwanya w’erikola utya, wanganasoma lyolo-lyolo ukalengekania oko bindi ebyo twanganakola tukakangania olwanzo lwetu oko Yehova na Yesu. N’akandi, ubwire abandi oko ebyo wamabana omo busomi bwaghu.
14. Ngoko kiri omo Esyonyimbo 119:97, erikwesa-kwesa emyatsi lyangatuwatikya liti erilola embere erigha emyatsi oko mbanulo n’oko wandi makangirirya? (Ulebaye n’epitsa.)
14 Wamabya iwabiribugha emyaka mingyi omo kwenene, wanganayibulya nga hakine myatsi mihya eyo wanganatasyigha oko eritunganene ly’oMungu, olwanzo, n’embanulo. Oko kwenene, hakendisyabya ihane emyatsi mihya obuli kiro ey’erigha oko myatsi eyo. Neryo, wangakolaki? Ubye ukasoma n’erigha emyatsi mibuya eyiseghemere eBiblia eyikabanika omo bitsapo byetu. Omughulu wamasoma omwatsi mulebe w’omo Biblia, neryo sighutowagho ndeke, kwesa-kwesa emyatsi. Neryo, omo musibo wosi, ubye ukalengekania oko myatsi yosi eyo uligha n’eyo wabirigha oko Yehova, oko Mughala wiwe, n’oko lwanzo lwabo okw’iwe.—Soma Esyonyimbo 119:97.
Nomo twabiribugha emyaka mingyi omo kwenene, twanganigha emyatsi mihya oko mbanulo eyangaleka itwatasyasima kutsibu Yehova na Yesu oko ebyo batukolera (Ulebaye enungu 14)
15. Busanaki ni ky’omughaso erilola embere erigha emyatsi mihya y’omo Biblia?
15 Isiwabunika mutima wamatendibana omwatsi mulebe muhya kutse owakakutsemesaya omughulu ukasoma eBiblia kutse ukakwesa-kwesa emyatsi. Oko kwenene, uli ng’omundu oyukasonda ehoro. Kangyi-kangyi, omundu oyukasonda ehoro, akalabaya esyosaha nibya n’ebiro isyalyatabana n’akayikoto. Aliwe, syalibunika mutima. Omw’iyiyinia, akalola embere erironda, kundi obuli katsanga k’ehoro, nomo ni kake okw’iye ni k’obughuli bunene. Kutya, n’obuli mwatsi muhya ogho tukigha omo Biblia ni w’obughuli bunene kwilaba ehoro! (Esy. 119:127; Misyo 8:10) Kwesi, ulole embere erisoma eBiblia, kandi ulole embere erikwesa-kwesa emyatsi mihya eyo wangigha.—Esy. 1:2.
16. Twangigha tuti Yehova na Yesu?
16 Ukigha, ulengekanaye ngoko wangakolesya ebyo ukigha. Ng’eky’erileberyako, wighe eritunganene lya Yehova omw’ibya ukakolera abandi butsira kasololo. Wighe olwanzo lwa Yesu oko Tata wiwe omw’ibya tayari erikola ebyo Yehova akakusaba n’eriwatikya abandi, nibya nomo erikola ekyo kyanganakalia engebe yaghu oko mughulu mulebe. Kandi wighe Yesu omw’itulira abandi batoke eribana akanya ak’eriminya emyatsi eyikaswekaya eyo Yehova abirikolera abandu n’erikangania obwikirirya omo mbanulo.
17. Tukendikania okuki omo mwatsi ow’akwamire?
17 Omughulu tukalola embere erigha oko mbanulo, ko tukanalola embere yo tutya eryanza Yehova na Yesu. Neryo kundi tubanzire kutsibu, nabo kutya bakalola embere eritwanza. (Yoh. 14:21; Yak. 4:8) Tulole embere erikolesya ndeke obuli mwatsi ogho Yehova akatuha tutoke erilola embere erigha oko mbanulo. Omo mwatsi ow’akwamire tukendigha emiyisa eyo tukabana kundi Yesu mwatuholera, kandi ngoko twangakangania erisima lyetu oko Yehova busana n’olwanzo lwiwe okw’itwe.
OLWIMBO 107 OMungu ni ky’erileberyako ky’olwanzo
a AMAANA W’EBINYWA: “Erighanirya” ry’erilengekania buli oko mwatsi mulebe n’eritsopolyagho kutsibu utoke eriminyagho ndeke.
b Erihindania “emyatsi eyiri elubula” eryo Paulo akanayako omo Abanya Efeso 1:10, risighene n’erihindania “lyabasombolwa” eryo Yesu akanayako omo Matayo 24:31 n’omo Mariko 13:27. Paulo abya akakania oko mughulu ogho Yehova asombola abakendisyatabala kughuma na Yesu omw’ibahirako amaghuta erilabira ekirimu kibuyirire. Yesu abya akakania oko mughulu ogho abahirirweko amaghuta abakendisyabya ibakine oko kihugho bakendisyahindanibwa omo lubula oko mughulu w’eryaghalwa rinene.