Eribulirwa esyofranga linemwendisyahwa?

Omo bihugho bingyi, abandu bakayitsatsanga omo syombalo bakakangania erikapikira lyabo busana n’eribulirwa esyofranga. Ubukoni bwe KORONA mubwalekire emyatsi iyatasyatsanda kutsibu n’erileta olukanda omo biharo mbiriri-mbiriri, kundi abandu erikingirwa omo manyumba, amaisa erikala n’abandu balebe eritendibya n’obutoki bw’erighula edawa mubyakanganirye ndeke ngoko abera banemukanyirira kutsibu kulenga abateke.

Abandu eryaghalwa busana n’eribulirwa esyofranga linemwendisyahwa. EBiblia ikakanganaya ngoko oMungu akendisyabugha amaligho agho tukalabamo.

Esyombanza esy’oMungu asyabughaho

Olubanza: Amatabali w’abandu abiritaluka eribughaho obwera.

Ngoko oMungu akendisyasohalo: OMungu akasyalusayaho amami w’abandu inyahiraho obwami bwiwe, obukahulawa mo Bwami bw’oMungu. Bukasyatabala ekihugho kyosi ibune elubula.—Danieli 2:44; Matayo 6:10.

Ebikendisyaluiramo: Kundi oBwami b’oMungu bwasyatabala ekihugho kyosi, bukendisyasoha emyatsi y’ekihugho yo ndeke. Abandu sibendisyasyabya bera kutse eryubaha ng’abanemwendibana esyofranga esyangabawatikya eribana ebyo balaghireko. (Esyonyimbo 9:7-9, 18) Omo mwanya w’ekyo, bakasyatsemera ebighuma by’omubírí wabo n’eribya n’ebihanda ebyuwene ebirimo obutseme. EBiblia ikalagha yiti: “Basyahimba amanyumba n’eriikala mugo. Sibendisyahimba, n’ogundi akikala muyo. Sibendisyabiba n’ogundi akalyabyo.”—Isaya 65:21, 22.

Olubanza: Abandu sibangatoka eriyihighula oko bikaleka ibaghalwa n’eribulirwa.

Ngoko oMungu akendisyasohalo: Erilabira oBwami bwiwe, oMungu akasyabughaho ebyosi ebikubahaya abandu n’erileka ibatabya omo butekane.

Ebikendisyaluiramo: Kundi abandu bakendisyateghibwa n’oMungu, sibendisyasyahikirwa n’emyatsi eyangaleka ibo kutse ab’omo bihanda byabo ibaherya ebindu ebyo balaghireko batoke eribyaho. Eky’erileberyako, amalwa, akalyo eribula, n’ebihunzo sibyendisyasyowika. (Esyonyimbo 46:9; 72:16; Isaya 33:24) OMungu akabugha ati: “Abandu bage basyikala omo mwanya w’obuholo, n’omo h’eriikala ahawatire, n’ah’eriluhukira ahatulere.”—Isaya 32:18.

Olubanza: Abandu b’omururu n’abayitsomene ibo basa bakakolera abandi bo muhanda.

Ngoko oMungu akendisyasohalo: Abandu abakasyabya omo Bwami b’oMungu bakasyigha eryanza abandi kulenga ngoko bayanzire.—Matayo 22:37-39.

Ebyasyaluiramo: Omo Bwami b’oMungu, obuli mundu asyabya akakangania olwanzo olukalua oko Mungu, ‘oluteyirondera endundi ololwene-lwene.’(1 Abanya Korinto 13:4, 5) EBiblia ikabugha yiti: “Sibendisyagalya kutse eriherya omo kitwa kyage kibuyirire kyosi, kusangwa ekihugo kyasyusula n’eriminya lya Yehovaa ngoko amagetsi akabwaga omo ngetsi.”—Isaya 11:9.

EBiblia ikakanganaya ngoko tuli oko nduli y’ekihugho ngoko hakisiya hake oMungu inyabughaho esyombanza syosi esy’eribulirwa esyofranga.b (Esyonyimbo 12:5) Tukalindirira ekyo, esyokanuni sy’eBiblia syanganakuwatikya erilwa n’esyombanza esikakuhikira munabwire. Wanganasoma omwatsi “Ngoko twangabyaho n’esyofranga nge” n’omwatsi “Eribya n’amalengekania awatolere oko syofranga.”

Amalengekania w’amabehi oko Biblia n’oko syofranga

Amalengekania w’amabehi: Obwera sibwendisyahwa, kundi Yesu mwabugha ati: “Muli n’abera ebiro byosi.”—Matayo 26:11.

Ekwenene: Yesu abya akakangania ngoko ekihugho ekirimo eritatunganene kino kite kyahwaho, hakasyabya ihane abera. Aliwe, omulaghe wa Yesu abya “ngulu yowene oko bera.” Eky’erileberyako, inyakakanganaya ngoko oBwami bw’oMungu bukendisyabughaho obwera kera na kera.—Luka 4:18, 43.

Amalengekania w’amabehi: Abandu batolere eribya bera imo bakenditsemesya oMungu, kundi Yesu mwabugha ati: “Ugende, ugulaye ebindu byawe, uhe by’oko bera.”—Matayo 19:21.

Ekwenene: Eribugha atya, Yesu syabya akaha abigha biwe b’ekyalayiro eky’erikwama. Abya akahana omulwana oyutabya atekene busana n’obuteke buwe. Yesu mwamubwira ati anguhaye engebe yiwe n’eriligha eribya mwigha wiwe.

Amalengekania w’amabehi: OMungu akatsumula abandu omwibaha obuteke, kundi eBiblia ikabugha yiti: “Omuyisa wa Yehova akaleta obuteke.”—Emisyo 10:22.

Ekwenene: Omo Biblia, ekinywa “omuyisa wa Yehova” kibeghere erikolesibwa erikania oko buteke bw’obunya-kirimu, ng’engebe eyiwite omughaso, obwira obuwene haghuma n’oMungu n’amaha awuwene w’ebiro ebikasa. (Esyonyimbo 25:14; Yoane 17:3) OMungu mwatsumula abaghombe biwe balebe omwibaha obuteke, aliwe abandu bangyi ababya Bakristo si babya bateke. (Enzuko 24:34, 35; Yakobo 2:5) Nibya Yesu Kristo iyuwene-wene syabya n’ebindu bingyi by’ekinya-mubiri.—Matayo 8:20.

Amalengekania w’amabehi: EBiblia ikakangiriraya abandu erihira ebindu byabyo byo haghuma, kundi ikabugha oko Bakristo b’erimbere yiti: “Mobagulya esyombibi syabo n’ebindu byabo, ibakasangira ebindu byosi ebyo n’abandi bosi.”—Emibírí 2:44, 45.

Ekwenene: Amasako aya akakanaya oko ndegheka eyahirawaho oko mughulu mulebe busana n’eriwatikya Abakristo bahya-bahya balebe eribana ebyo babya balaghireko. Abandu aba mubasa eYerusalema oko kiro kikulu ky’Abayahudi ekyʼePentekote. (Emibírí 2:5) Aliwe, babere babya Bakristo, mubasighala eYerusalema yo biro bingyi kulenga ebyo babya ibaripanga, batoke erigha bingyi oko myatsi mihya-mihya eyo bikiriraya. Busana n’ekyo, Abakristo balikyabo mobateka omwanza lyabo ebyo babya bawiteko eribawatikya eribana akalyo n’ebindi ebyo babya balaghireko.—Emibírí 2:41, 42, 46, 47.

a Yehova ry’erina ly’oMungu ngoko kikanganibwe omo Biblia.—Esyonyimbo 83:18.

b Eriminya ekyangaleka iwayiketera eBiblia, ulebaye omwatsi “EBiblia ni kitabu ekikabugha ekwenene.”