EBYO ABALWANA N’ABAMBESA BAKAYIBULAYA
Busanaki nibye ngakola obuholo n’abaghala n’abali betu?
“Abaghuma sibendana”
Bakanasimako bati “abaghuma sibendana.” Wanzire abaghala n’abali benyu, nabo bwakwanzire—aliwe hakanabya endambi imwatahulikirirana. Helena ow’emyaka 18 akabugha ati: “Mughala wetu oyo nisubireko akananihitanaya. Akabya abyanza erinihitania syalitaluka!”
Kangyi-kangyi abana b’omo nyumba nguma bakanatoka eribugha eritendihulikirirana lyabo omwikanirania. Ng’eky’erileberyako:
Abaghala babiri abakaghotsera omo kyumba kighuma banganabula erihulikirirana busana n’erisonda eribya n’akanya k’omundu eribya iyuwene. Bangayira bati erisoha omwatsi oyo? Banganayikasa erikolesya erihano erikabanika omo Luka 6:31, neryo ibahulikirirana obuli mundu abye akasighira oghundi y’akatambi ak’eribya iyuwene.
Bali babo babiri “bakambalirana” esyongyimba butsiribulania. Bangayira bati erisoha omwatsi oyo? Banganakolesya erihano erikabanika omo 2 Timoteo 2:24, neryo ibakania oko mwatsi oyo n’erihulikirirana oko ebyo bate bangambalirana.
Aliwe hakanabya omughulu eritendihulikirirana omo kati-kati k’abana b’omo nyumba nguma iryakala kutsibu n’erilwira mw’emyatsi eyituwene. Tulangire eby’erileberyako bibiri eby’omo Biblia:
Miriamu na Haruni mubatsura Musa, mughala wabo, n’ekyo mukyakolya oko lubanza. Soma Emiganzo 12:1-15. Neryo yibulaye kino: ‘Nangayira niti eritenditsura abaghala n’abali betu?’
Ekinigha kya Kaina mukyabya kingyi erihika oko kika amita mughala wabo ye Abele. Soma omwatsi owakabanika omo Enzuko 4:1-12. Neryo uyibulaye kino: ‘Nangayira niti nitoke eribya ngakakirya ekinigha kyaghe namahitana oko mughala kutse mwali wetu?’
Emyatsi ibiri eyikaleka ikyuwana erikola obuholo
N’omo kyanganatukalako erikola obuholo, hane emyatsi ng’ibiri eyikaleka itwayikasa erihulikirirana n’abaghala n’abali betu.
Erikola obuholo kikakanganaya ngoko tukulire. Omulwana mughuma oyukahulawamo Alex akabugha ati “Kera, inibeghere eribya ngahitana oko bali betu babiri abanisubireko. Lino nabiritulera n’erikulya omutima w’erilindirira. Nanganabugha niti nabirikula.”
EBiblia ikabugha yiti: “Oyuyibombekire okwʼihitana ni wʼamenge manene; Nikwa owʼekirimu kyʼoluba-luba akapipa obukiru.”—Emisyo 14:29.
Erikola obuholo kikatuteghekanaya busana n’ebiro ebikasa. Wamataluka erikola obuholo n’abaghala n’abali benyu, iwanganasyatoka eribya omo buholo n’ow’omwaghu, n’omukulu waghu w’omubírí kutse n’abandi bandu?
Ekwenene yeno: Obutoki bwaghu bw’erikanirania n’abandi n’erihulikirirana nabo bwasyakuwatikya eritamba ndeke n’abandi. Busana n’ekyo utolere eritsuka erikulya obutoki obo ighukine eka wenyu.
EBiblia ikabugha yiti: “Kyamatokekana, oko luhande lwenyu, mubye nʼobuholo oko bandu bosi.”—Abanya Roma 12:18.
Unalaghire oko buwatikya utoke erikola obuholo kughuma na mughala kutse mwali wenyu? Soma “Amalengekania w’abandi balwana n’abambesa,” n’erighusa eriso oko kapapura, “Erihulikirirana ndeke n’abaghala n’abali betu.”