Mika 6:8—‘Erirendera n’oMungu wawe nʼeriyikehya’

‘Uwe mundu, abirikukangya kihi kyo kibuya; Yehova akakusonda ko kihi kwehi, lye nʼerikola eribanza litunganene, nʼerianza obwenge, nʼerirendera n’oMungu wawe nʼeriyikehya!’—Mika 6:8, KB80.

Erisako rye Mika 6:8 likasonda eribugha litiki?

Hano omuminyereri Mika akakanganaya ngoko sikikalire oko bandu eritsemesya Yehovaa Mungu. (1 Yoane 5:3) Erisako eri rikatubwira omo kikuhi ebyo oMungu alindirire okw’itwe omo binywa bisatu by’omughaso. Ebibiri by’erimbere bilebirye ngoko tukakola haghuma n’abandi, n’eky’akasutu kilebirye obwira bwetu n’oMungu.

“Erikola eribanza litunganene.” oMungu akasaba abakamuramaya erikola ebitunganene n’ebyuwene. Ekyo ni bughambu erilengekania erikola erikwamana n’esyokanuni sy’ekibi n’ekibuya. (Eryibuka Ebihano 32:4) Ng’eky’erileberyako, abandu abakakwama esyokanuni sy’oMungu bakayikasa erikolera obuli mundu yo ndeke na butsira kasololo nomo angabya inyakasira hayi, ni w’omo kihugho kyahi kutse ni w’omo kihandaki.—Abalawi 19:15; Isaya 1:17; Abaebrania 13:18.

“Erianza obwenge.” Ekinywa eki kyanganataswabindulwa mo “eryanza olwanzo olutereghula.” (Mika 6:8, ebinywa by’ahikwa) Omo Kiebrania kya kera, ekinywa ky’“obwenge” kikamanisaya eribya mutaleghula oko mundu mulebe, aliwe kandi erimukangania obubuya n’obughanyiri, omwikola bingyi kulenga ebyo emighambo yikasaba. oMungu syalisaba lisa abandu abanzire erimutsemesya erikangania obubuya n’erighanyira, aliwe kandi akabasaba eryanza emibere eyo. Ekyo ni bughambu abakamuramaya litolere ibatsemera eriwatikya abandi, kutsibu-tsibu abandu abali omo bwagha. Obutseme bukasira omwihitya.—Emibiri 20:35.

“Rendera n’oMungu wawe nʼeriyikehya.” Omo Biblia, ekinywa “rendera na” kyanganamaanisya “erikwama enzira nyilebe y’emighendere.” Omundu akalendera n’oMungu omwibyaho omo nzira eyikatsemesaya oMungu. Noa ni ky’erileberyako kibuya. “Mwabya akalendera haguma n’oMungu” kundi abya atunganene omo meso w’oMungu kandi kundi “iniahikene omo syondengo siwe.” (Enzuko 6:9) Munabwire, ‘tukalendera n’oMungu’ omwikwama amakangirirya wiwe awakabanika omo Kinywa kiwe, eBiblia. Busana n’ekyo, litolere itwaligha omwiyikehya ngoko hane ebyo tute twangatoka kandi ngoko twangabana ebyosi erilabira oMungu.—Yoane 17:3; Emibiri 17:28; Eribisulirwa 4:11.

Erikania oko Mika 6:8

Mika abya muminyereri oyo wabyaho omo karne k’omunani E.M.W. Oko mughulu oyo omuyi abya oswiremo eriramya esyosanamu, oburahi n’obutsururu. (Mika 1:7; 3:1-3, 9-11; 6:10-12) Abaisraeli bangyi babya ibakapokaya ebyalayiro by’oMungu ebyabya omo Emigambo ya Musa. Oko mughulu mughumerera oyo, abandu balebe babya bakalengekania muhanda bati banganasimwa n’oMungu bamabikwama emitsye milebe y’ekisomo kutse bamabya bakateka obuhere.—Emisyo 21:3; Hosea 6:6; Mika 6:6, 7.

Emyaka mingyi enyuma, Yesu mwibukya abandu ngoko Tata wiwe azire abakakanganaya olwanzo, eritunganene, n’erighanyira, aliwe ngoko akapona abakamuramaya omo minywa misa. (Matayo 9:13; 22:37-39; 23:23) Ebinywa bya Yesu bikatuwatikaya eriminya ebyo oMungu alindirire oko baghombe biwe munabwire.

Lebaya evideo nguhi eno eyikakanaya omo kikuhi oko kitabu kya Mika.