Obungyi bw’ebindu bukawatikaya ahali obwagha

Abimiri ba Yehova bakakola omubiri wabo n’eriwatikya abaghala n’abali babo omo bihugho binene oko 200. Aliwe omo byosi, ebyo ebihugho 35 bisa byo bikabana ebihembo ebyo bandu bakateka ebitosire eriberererya ebyo biyitayire. Nikwa n’omo bihugho ebiteyitoka, bikabya biti?

Akatunga Akakasondola kakalebaya abaghala betu omo kihugho kyosi nga balaghire okuki batoke eriramya Yehova omo nzira eyitolere. Esyofranga sikapangawa ndeke sitoke erikolesibwa omo nzira eyuwene. Ebihembo ebyo beteli nguma yiryabana byamabya bingyi oko biyitawa byayo, esindi beteli isikendikolesya ebiryasaka. Omubere oyo abya akakolwa n’abakristo b’erimbere, ababya bakawatikania “omwilingirirania omubiri.” (2 Abanya Korinto 8:14) Babya ibakakolesya ebyabya bikasaka eriwatikya abandi bakristo ababya omo bwagha.

Abaghala n’abali betu abakabana endundi erilabira ebihembo ebyo bakayowa bati? Ng’omo kihugho ky’eTanzania, abandu banene bakakolesaya esyofranga nge oko dolare mbili eriberererya ebiyitawa byabo. Omupango oyo abiriwatikya eritasyakotya Ekisenge ky’Obwami kighuma ekikakolesibawa n’endeko ye Mafinga. Endeko muyahandika yiti: “Eritsuka ekiro ekyo Ekisenge kyetu ky’Obwami kyasubibawa mo kihya-kihya, abandu bangyi babiribya bakahika oko mihindano! Tukasima kutsibu endondeko ya Yehova haghuma n’ekihanda kyosi ky’abaghala betu n’abali betu oko mubere w’erihitya owo bawite owakaleka itwatsema eribya n’aheriramirya Yehova ahuwene.”

Busana n’obukoni bw’ekorona, abaghuma b’oko baghala betu b’omo kihugho kye Sri Lanka mubabula akalyo. Imara Fernando n’omughala wiwe mulere ye Enosh, ni baghuma ba kubo. Erilabira ebihembo ebikatekawa omo bindi bihugho, mubabana obuwatikya obutolere. Mubahandika bati: “Tukasima abaghala n’abali betu busana n’olwanzo olo balyatukanganaya omo mughulu ono owakalire. Oko kwenene tutsemire eribya omo kihanda kino, kandi tunemulola embere erisaba Yehova awatikaye abaghala betu bosi omo biro bino by’enduli.”

Nomo abaghala n’abali betu bangabya ibikere hayi, omutima wabo akabakuna erihitya oko bindu ebyo bawite. Ekyerileberyako, ye Enosh abiriyikokoterya akasanduku kake akakahiramo esyofranga, naye atoke eriwatikya ebihanda ebiri omo bwagha. Guadalupe Alvarez naye ni mwenge. Ikere omo kiharo kye Mexiko, eyo abandu banene sibalibana omusahara munene kandi abandu sibabeghere eribana esyofranga. Aliwe iye akateka ebihembo ngoko angatoka. Akahandika atya: “Ngasima Yehova busana n’omubere wiwe w’obubuya n’owo lwanzo oluteleghula. Ninasi ngoko ebihembo ebyo ngateka bikahirawa oko by’abandi kandi bikendiwatikya abaghala n’abali betu n’obwagha.”

Amabeteli awakahitaya oko bindu ebyo bawite bali n’obutseme erikola batya. Anthony Carvalho oyukakolera omo katunga k’ebeteli ye Brazil akabugha ati: “Omo miaka mingyi twabya itulaghire oko buwatikya erilua omo bindi bihugho,”. “Busana n’obuwatikya obo, habiribya amabinduli makulu omo mubiri wetu. Lino netu tuwite olusunzo lw’eriwatikya abandi. Abaghala betu banzire omubiri w’erihubirya iniakolwa omo kihugho kyosi, nekyo kikaleka ibaminya ekyo bangakola eriwatikya abaghala n’abali babo.”

Ni nzira yahi eyuwene eyo twangakola eriwatikya abaghala n’abali betu abali omo bwagha? Enzira eyuwene y’erikola ekyo si ry’erituma esyofranga oko mabeteli awali omo bindi bihugho, aliwe omwiteka ebihembo busana n’eriwatikya omubiri w’omo kihugho kyosi. Twanganakola ekyo omwihira esyofranga omo kisanduku ekihandikireko “Omubiri owakakolawa omo kihugho kyosi” kutse donate.jw.org. Tukabasima oko bihembo byosi ebyo mukateka.