Abalawi

27 Kandi Yehova mwabugha na Musa ati: 2 “Ukanaye n’Abaisraeli ubwirebo uti, ‘Omundu amabiyilagha ery’embaghane busana n’eriha Yehova y’obughuli bw’omundu,* 3 amabya ini mulume w’emyaka 20 erihika oko myaka 60, litolere iniatswerwa esyoshekeli 50 sy’efeza,* erikwamana n’eshekeli y’ahabuyirire.* 4 Nikwa amabya ini mukali, imukenditswera esyosekeli 30. 5 Amabya w’emyaka itano erihika oko 20, omulume, imwatswera esyoshekeli 20, n’omukali, imwatswera esyoshekeli 10. 6 Amabya w’emisi itano erihika oko myaka itano, omulume, imwatswera esyoshekeli itano sy’efeza,* n’omukali, imwatswera esyoshekeli isatu sy’efeza.

7 “‘Amabya w’emyaka 60 erilola endata, omulume, imwatswera esyoshekeli 15, n’omukali, imwatswera esyoshekeli 10. 8 Aliwe amabya ini mwera isyangatoka eriliha esyo alyatswerawa, omundu oyo akendisyimana embere sy’omuhereri, n’omuhereri akendisyamuhirako ebeyi. Omuhereri akendisyatswera ebeyi erikwamana n’ebyo oyulyayilagha angabana.

9 “‘Amabya imwakalagha eriteka enguma y’oko syonyama esikahererawa Yehova, ekyosi-kyosi ekyangahabwa Yehova, kikendisyabya kindu ekibuyirire. 10 Syangabindulakyo kutse erihinganiakyo; ekibuya mo kituwene kutse n’ekituwene mo kibuya. Nikwa mwamahingania enyama n’eyindi, eyo alyahinganaya, n’eyiryahinganibawa nayo, esyosi sikendisyabya esibuyirire. 11 Yamabya ini nyama eyiterire eyiteyangaleterwa Yehova mo buhere, iniakendisyaleta enyama eyo embere sy’omuhereri. 12 Neryo omuhereri akendisyatswera ebeyi yayo, erikwamana n’eryuwana lyayo kutse eritendyuwana lyayo. Ebeyi eyo omuhereri akendisyatswera ikendisyabya iy’eyo. 13 Aliwe amabya anzire erighulayo atoke erisubana nayo, akendisyatomeka ekighuma ky’okw’itano oko beyi yayo.

14 “‘Neryo omundu amahighula enyumba yiwe, eribya kindu kibuyirire oko Yehova, omuhereri akendisyatswera ebeyi yayo. Ibye nyibuya kutse nyibi, enyumba eyo ikendisyaghula ebeyi eyo omuhereri akendisyahirako. 15 Nikwa oyulyahighula enyumba yiwe, amanza erighulayo n’eritasyasubana nayo, oko syofranga esyo, litolere inyongerako ekighuma ky’okw’itano n’enyumba eyo iyabya yiwe.

16 “‘Omundu amabihighula ekihande ky’oko ririma riwe busana na Yehova, ebeyi yakyo ikendisyatswerwa erikwamana n’embuto eyangaherwa omo kihande ekyo; e omeri* nguma y’embuto y’ekisusu ikendisyabya esyoshekeli 50 sy’efeza.* 17 Amahighula eririma riwe eritsuka oko mwaka w’Eyubile, ebeyi eyiryatswerawa, ikendisyabya iy’eyo. 18 Nikwa amabihighula eririma riwe enyuma w’Eyubile, omuhereri akendisyamughanzira ebeyi yalyo erikwamana n’emyaka eyikisiya erihika oko mwaka w’Eyubile; n’ebeyi eyiryatswerawa ikendisyakehibwa. 19 Aliwe oyo wahighula eririma eryo amatasyaghulalyo busana n’erisubana nalyo, akendisyatomeka oko beyi yalyo ekighuma ky’okw’itano; neryo rikendisyasighala riwe. 20 Aliwe atitaghulalyo, n’eririma eryo iryaghulibwa oghundi mundu, siryangasyakombolwa. 21 Omughulu eririma eryo rikabya bwiranda oko Yubile, likendisyabya kindu ekibuyirire embere sya Yehova. Eririma eryo abirihabwa rikendisyabya ry’omuhereri.

22 “‘Omundu amahighulira Yehova y’eririma eryo aghula, n’eririma eryo isiriri omo mwandu wiwe, 23 omuhereri akendisyamughanzira ebeyi y’eririma eryo erihika oko mwaka w’Eyubile, neryo ekiro ekyo akendisyaleta ekiryatswerawa. Ni kindu ekibuyirire oko Yehova. 24 Oko mwaka w’Eyubile, eririma rikendisyasuba oko mwenyeryo oyo aghula ly’oko.

25 “‘Ebeyi yosi-yosi ikendisyatswerwa erikwamana n’eshekeli y’ahabuyirire. Eshekeli nguma litolere iyabya gera* 20.

26 “‘Nikwa isihabya oyukahighula ekyana ky’erimbere ky’esyonyama, kusangwa ni kyana ky’erimbere busana na Yehova, yangabya nume y’ende kutse embuli, kusangwa bikabutawa ini bya Yehova. 27 Kyamabya ini ky’oko syonyama esiterire, neryo iniakombolakyo erikwamana n’ebeyi yakyo eyiryatswerawa, atolere inyatomekako ekighuma ky’oko bitano ky’ebeyi eyo. Nikwa kyamatendikombolwa, kikendisyaghulibwa erikwamana n’ebeyi eyiryatswerawa kukyo.

28 “‘Aliwe ekindu kyosi-kyosi ekyo omundu akaha Yehova erilua omo bindu biwe butsira erikunwa,* abye mundu kutse nyama, kutse oko malima wiwe, sikyangaghulibwa kutse erikombolwa. Ekindu kyosi-kyosi ekikahererawa oko Mungu ni kindu ekibuyirire kutsibu oko Yehova. 29 Kandi omundu oyuliko olubanza* oyo wabirihighulwa busana n’eriitwa syangakombolwa. Atolere iniakwa butsira buhaka.

30 “‘Obuli kighuma ky’omw’ikumi eky’omo kihugho, bibye ebikera omo malima kutse amatunda w’oko muti, ni kya Yehova. Ni kindu ekibuyirire oko Yehova. 31 Omundu amasonda erikombola ekighuma kiwe ky’omw’ikumi, litolere iniatomeka kukyo kw’ekighuma ky’okw’itano kyakyo. 32 Nikwa ekighuma ky’omw’ikumi ky’ebihyo n’ebihangulo, ekindu kyosi-kyosi ekikalaba emwisi w’omutso w’omulisya, enyama ye 10 litolere iyabya kindu ekibuyirire oko Yehova. 33 Isyayiteghererayayo nga yuwene kutse iyehe kandi isyahinganayayo n’eyindi. Nikwa amahinganiayo n’eyindi, eyo alyahinganaya n’eyiryahinganibawa nayo, esyosi sikendisyabya sibuyirire. Siyangakombolwa.’”

34 Ebyo bye byalayiro ebyo Yehova aha Musa busana n’Abaisraeli oko Kitwa kye Sinai.