Abalawi

8 Kandi Yehova mwabugha na Musa ati: 2 “Ughende haghuma na Haruni n’abaghala biwe, wimaye n’esyongyimba, amaghuta awabuyirire,* enume y’ende y’obuhere bw’erilolo, esyombangale ibiri, n’ekibo ky’emikati eyitemo elevire.* 3 Neryo uhindanaye endeko yosi yo haghuma, oko lukyo lw’ehema y’erihindanamo.”

4 Neryo Musa mwakola ngoko Yehova anamulayira. N’endeko yosi muyahindana haghuma oko lukyo lw’ehema y’erihindanamo. 5 Musa mwabwira endeko ati: “Ebi byo Yehova abirilayira ati tukole.” 6 Neryo Musa mwaleta Haruni n’abaghala biwe. Mwanabyabo omo maghetse. 7 Enyuma w’aho, mwamwambalya ekanzu, amamuboha omukaba w’omo kanzu, n’erimwambalya erikoti eriteko amaboko. Mwamuhirako ne efodi, n’erikundikayo omo mukaba we efodi owalukire, amamuwatirya y’oko ndeke-ndeke. 8 Neryo mwamwambalya ekindu ky’eryambala oko kikuba n’erihira mukyo mwe Urimu ne Tumimu. 9 Neryo mwamwambalya esapu y’ekilemba n’erihira embere w’esapu eyo akuma k’ehoro akakangabasenie, ekiminyikalo kibuyirire ky’erihighulwa,* ngoko Yehova analayira Musa.

10 Enyuma w’aho, Musa mwimya amaghuta awabuyirire* n’erihakabya etabernakulo n’ebyosi ebirimo n’eriyirabyo mo bibuyirire. 11 Enyuma w’aho, mwimya oko maghuta ayo n’eritsatsangagho ngendo 7 oko kiherero n’erihakabya ekiherero n’ebindu byakyo byosi, n’ekibeseni n’ekindu kyakyo ky’erikalirako, eriyirabyo mo bibuyirire. 12 Oko nduli, mwimya oko maghuta awabuyirire* ayo amutagho oko mutwe wa Haruni amamuhakabya busana n’erimuhighula.*

13 Neryo Musa mwaleta abaghala ba Haruni amambalyabo esyokanzu n’eryambalyabo emikaba y’omo syokanzu n’erihira kubo* kw’esyosapu sy’ekilemba, ngoko Yehova anabya iniabirilayira Musa.

14 Enyuma sy’aho, mwaleta enume y’ende y’obuhere bw’erilolo. Na Haruni n’abaghala biwe mubahira ebyala byabo oko mutwe w’enume y’ende eyo ey’obuhere bw’erilolo. 15 Musa mwakerayo amimya omusasi omo munwe wiwe, amahiragho oko mahembe w’ekiherero oko mbande syosi, n’eryerya* ekiherero busana n’erilolo. Nikwa omusasi owasaka, mutagho omo ndina y’ekiherero. Omw’ikola atya, mwayirakyo mo kibuyirire kitoke eribya kikahererwako amahere w’embanulo. 16 Enyuma sy’aho mwimya ebisabu ebikaswika eby’omo nda n’ehisabu hy’oko makindi* n’esyombiko ibiri n’ebisabu byasyo. Musa mwahisiriryabyo oko kiherero bitoke erilusya omuki. 17 Ebyasaka oko nume y’ende eyo, engobi yayo, eminyoku yayo, n’amase wayo, mwahisiryabyo ehihya w’ekambi, ngoko Yehova anabya iniabirilayira Musa.

18 Neryo mwaleta embangale y’obuhere bw’eryokererya. Na Haruni n’abaghala biwe mubahira ebyala byabo oko mutwe w’embangale eyo. 19 Musa mwakerayo n’eritsatsanga omusasi wayo oko mbande syosi sy’ekiherero. 20 Musa mwatsutsanga embangale eyo mo bitswe-bitswe. Neryo omutwe wayo, n’ebitswe-bitswe ebyo, n’ebisabu by’oko syombiko, mwahisiriryabyo bilusaye omuki. 21 Mwerya amala n’emilenge omo maghetse. Musa mwahisirirya embangale yosi oko kiherero busana n’erilusya omuki. Yabya buhere bw’eryokererya busana n’ekikumbo ekikatsemesaya.* Yabya buhere obukahisibawa omo muliro busana na Yehova, ngoko Yehova anabya iniabirilayira Musa.

22 Enyuma sy’aho mwaleta embangale y’akabiri, embangale y’erisingya. Haruni n’abaghala biwe mubahira ebyala byabo oko mutwe w’embangale eyo. 23 Musa mwakerayo, amimya oko musasi wayo n’erihiragho oko luhande lw’eyikwa l’okutu kw’amali kwa Haruni, oko kikumo ky’oko byala biwe by’amali, n’oko rinono ly’obulume ly’oko kisando kiwe ky’amali. 24 Enyuma sy’aho, Musa mwaleta abaghala ba Haruni, amimya oko musasi n’erihiragho oko luhande lw’eyikwa lw’amatwi wabo w’amali, n’oko bikumo by’oko byala byabo by’amali, n’oko manono w’obulume w’oko bisando byabo by’amali. Nikwa omusasi owasaka, Musa mwatsatsangagho oko mbande syosi sy’ekiherero.

25 Neryo mwimya ebisabu, omukira owalimo ebisabu, ebisabu byosi ebyabya oko by’omo nda, ehisabu hy’oko makindi,* esyombiko ibiri n’ebisabu byasyo, n’ekihinga ky’amali. 26 Mwimya omo kibo ky’emikati eyitemo elevire* ekyabya embere sya Yehova, mw’omukati mughuma w’omuviringo owalimo ekyuna owatemo elevire, n’omukati mughuma w’omuviringo owalimo ekyuna owaliko amaghuta, n’omukati mughuma owali ng’ekitunza. Mwahirayo endata oko bisabu n’oko kihinga ky’amali. 27 Mwahirabyo omo byala bya Haruni n’omo byala by’abaghala biwe. Nabo mubatsuka erihungya-hungyabyo mo buhere bw’erihungya-hungya embere sya Yehova. 28 Musa mwalusyabyo omo byala byabo, amahisiriryabyo oko kiherero endata oko buhere bw’eryokererya busana n’erilusya omuki. Byabya buhere bw’erisingya obw’ekikumbo ekikatsemesaya.* Ni buhere obukahisibawa omo muliro busana na Yehova.

29 Neryo Musa mwimya ekikuba, amahungya-hungyakyo mo buhere bw’erihungya-hungya embere sya Yehova. Oko mbangale y’obuhere bw’erisingya, ekikuba ekyo kyo kyabya righabo rya Musa, ngoko Yehova anabya iniabirilayira Musa.

30 Neryo Musa mwimya oko maghuta awabuyirire* n’oko musasi owabya oko kiherero. Mwatsatsangabyo oko Haruni n’oko syongyimba siwe, n’oko baghala biwe n’oko syongyimba sy’abaghala biwe ababya haghuma naye. Omw’ikola atya, mwahighula* Haruni n’eriyira esyongyimba siwe n’esy’abaghala biwe mo sibuyirire.

31 Musa mwabwira Haruni n’abaghala biwe ati: “Muhukire esiswi oko lukyo lw’ehema y’erihindanamo. Mukendilirasyo aho, haghuma n’emikati eyiri omo kibo ekikakolesibawa omughulu w’erisingya; ngoko nalayirawa, ‘Haruni n’abaghala biwe bakendiryabyo.’ 32 Eyiswi n’emikati eyikendisaka, mukenditimyabyo omo muliro. 33 Omo biro 7, isimwahulukira ehihya w’olukyo lw’ehema y’erihindanamo erihika aho ebiro by’erisingibwa lyenyu bikendisyahwera; kusangwa erisingibwa* lyenyu mo bahereri rikendibugha biro 7. 34 Yehova mwalayira ati tukole ebyo twamakola munabwire busana n’eribalihira embanulo. 35 Isimwalua oko lukyo lw’ehema y’erihindanamo omo biro 7, omo musibo n’omo kiro. Kandi mukenditeya ekyalayiro kya Yehova mukasyahola; kusangwa ko nalayirawa nitya.”

36 Haruni n’abaghala biwe mubakola ebyosi ebyo Yehova alayira Musa.