Abalawi
23 Yehova mwasyabugha na Musa ati: 2 “Ubwire abana ba Israeli uti, ‘Ebiro bikulu bya Yehova ebyo mutolere imwateya, ni mihindano minene-minene eyibuyirire. Ebiro bikulu byaghe ebyo bya bino:
3 “‘Omo biro 6 omubiiri anganakolwa; aliwe ekiro kye 7, ni sabato y’eriluhuka kundu, ni muhindano owabuyirire. Isimwakola omubiiri wosi-wosi. Litolere ikyabya sabato busana na Yehova ahosi-hosi aho mwangabya imwikere.
4 “‘Ebiro bikulu bya Yehova, emihindano minene-minene eyibuyirire eyo mutolere imwakola oko mughulu wabyo owabirihirwaho, bya bino: 5 Ekiro kye 14 eky’omwisi w’erimbere, omo kagholo-gholo,* ni Pasaka* busana na Yehova.
6 “‘Ekiro kye 15 ky’omwisi oyo, ni Kiro Kikulu ky’Omukati Owatemo Levire* busana na Yehova. Mukendisyabya mukalya omukati owatemo levire omo biro 7. 7 Oko kiro ky’erimbere mukendisyabya mukakola omuhindano munene owabuyirire. Isimwakola omubiiri wosi-wosi owakalire. 8 Nikwa omo biro 7, litolere imwaherera Yehova obuhere obukahisibawa omo muliro. Oko kiro kye 7, hakendisyabya omuhindano munene owabuyirire. Siritolere mukakola omubiiri wosi-wosi owakalire.’”
9 Yehova mwasyabugha na Musa ati: 10 “Ubwire Abaisraeli uti, ‘Mukendisyabya mwabihika omo kihugho ekyo ngabaha, n’erighesa ebyo mulyeraya mukyo, mukendisyaletera omuhereri yo mughanda w’eby’erimbere ebyo mukatsuka eryerya. 11 N’omuhereri akendisyahungya-hungya omughanda oyo embere sya Yehova mutoke erisimwa. Akendisyahungya-hungyagho engyakya enyuma w’ekiro ky’Esabato. 12 Ekiro omughanda oyo akendisyahunga-hungibwa, litolere imwaherera embangale eyiteko obulema, ey’omwaka mughuma, mo buhere bw’eryokererya busana na Yehova. 13 Obuhere bwabo bw’eyisyano bukendisyabya ebibiri by’omw’ikumi bye efa* eby’eyisyano eyitulungene n’amaghuta mo buhere obukahisibawa omo muliro bw’ekikumbo ekikatsemesaya* busana na Yehova. N’obuhere bwabo bw’obwabu, bukendisyabya ekighuma ky’omw’ikumi kye hini* eky’edivai. 14 Erihika ekiro ekyo, isimwalya omukati wosi-wosi kutse esyonguma esikotsirye kutse esyonguma nyihya-nyihya mute mwaletera oMungu wenyu ebihembo byenyu. Ni mughambo w’ebiro byosi omo bizazi* byenyu byosi ehosi-hosi eyo mwangabya imwikere.
15 “‘Litolere imwaghanza esyosabato 7 eritsuka engyakya y’Esabato, eritsuka oko kiro ky’erileta omughanda w’obuhere bw’erihungya-hungya. Litolere iniabya mayenga awaghonere. 16 Erihika engyakya y’Esabato ye 7, mukendisyaghanza ebiro 50, neryo mukendisyaletera Yehova y’obuhere bw’eyisyano nyihya-nyihya. 17 Erilua eyo mwikere, mukendisyaleta emikati ibiri, iyabya buhere bw’erihungya-hungya. Ikendisyakokotibwa omo bibiri by’omw’ikumi bye efa* eby’eyisyano eyiswererere.* Ikendisyahirwamo elevire,* ni by’erimbere ebikatsuka erigheswa ebya Yehova. 18 Mukendisyaleta emikati eyo haghuma n’esyombangale 7 esiteko bulema. Obuli mbangale ey’omwaka mughuma; haghuma n’enume y’ende eyikine nyilere, n’esyombangale ibiri. Bukendisyabya buhere bw’eryokererya busana na Yehova, haghuma n’obuhere bwabo bw’eyisyano n’amahere w’obwabu, eribya mahere awakahisibawa omo muliro, aw’ekikumbo ekikatsemesaya* busana na Yehova. 19 Mukendisyaherera n’embene eyikine nyilere mo buhere bw’erilolo n’esyombangale ibiri; obuli mbangale y’omwaka mughuma mo buhere bw’obuholo.* 20 Omuhereri akendisyahungya-hungyabyo haghuma n’emikati y’eby’erimbere ebikatsuka eryera mo buhere bw’erihugya-hungya embere sya Yehova, haghuma n’esyombangale ibiri esikine nyilere. Bikendisyabya kindu ekibuyirire oko Yehova. Neryo bikendisyabya by’omuhereri. 21 Ekiro ekyo mukendisyatulagho ehosi-hosi ngoko hakendibya omuhindano munene busana nenyu. Isimwasyakola omubiiri wosi-wosi owakalire. Oyu ni mughambo w’omughulu wosi ehosi eyo mwikere omo bizazi* byenyu byosi.
22 “‘Omughulu mukaghesa ebyo mulyeraya omo kihugho kyenyu, siritolere mukaghesa ebyosi by’oko musike-musike w’amalima wenyu kandi isimwakuma-kuma ebiryasighalira oko bughese bwenyu. Litolere imwalekerabyo omwera n’omubunga. Ingye indi Yehova Mungu wenyu.’”
23 Yehova mwasyabugha na Musa ati: 24 “Ubwire Abaisraeli uti, ‘Oko kiro ky’erimbere ky’omwisi we 7, mukendisyabya n’eriluhuka kundu. Ekiro ekyo kikendisyabya kiro ky’eryibukwa. Mukendisyakola omuhindano munene owabuyirire mwabyowa omulenge w’engubi. 25 Isimwakola omubiiri wosi-wosi owakalire, kandi mukendisyaletera Yehova y’obuhere obukahisibawa omo muliro.’”
26 Kandi Yehova mwabugha na Musa ati: 27 “Nikwa ekiro kye 7 eky’omwisi oyo, ni Kiro ky’Embanulo. Mukendisyakola omuhindano munene owabuyirire n’eriyaghalya,* kandi mukendisyaherera Yehova y’obuhere obukahisibwa omo muliro. 28 Oko kiro eki, isimwakola omubiiri wosi-wosi kusangwa ni kiro ky’embanulo, eky’eribalihira embanulo embere sya Yehova oMungu wenyu. 29 Omundu wosi-wosi* oyutendisyayaghalya* oko kiro eki, akendisyalusibwa* omo kati-kati k’abandu biwe. 30 N’obuli mundu* omo kati-kati k’abandu biwe oyukakola omuhanda wosi-wosi w’omubiiri oko kiro ekyo, ngendisyamwita. 31 Isimwakola omuhanda wosi-wosi w’omubiiri. Oyu ni mughambo w’omughulu wosi omo bizazi* byenyu byosi ehosi-hosi eyo mwangabya imwikere. 32 Ni sabato y’eriluhuka kundu busana nenyu. N’oko kiro kye 9 eky’omwisi oyo, omw’igholo-gholo, mukendisyayaghalya.* Mukendisyakola esabato yenyu eritsuka erigholo ry’ekiro ekyo erihika oko righolo ry’engyakya.”
33 Yehova mwalola embere eribugha na Musa ati: 34 “Ubwire Abaisraeli uti, ‘Ekiro kye 15 ky’omwisi we 7 oyu, ni Kiro Kikulu ky’Ebibanda* busana na Yehova. Kikendisyabya kikabugha ebiro 7. 35 Omo kiro ky’erimbere, hakendisyabya omuhindano munene owabuyirire, kandi siritolere imwakola omubiiri wosi-wosi owakalire. 36 Omo biro 7 litolere imwabya mukaletera Yehova y’obuhere obukahisibawa omo muliro; n’oko kiro kye 8, imwakola omuhindano munene owabuyirire n’eriherera Yehova y’obuhere obukahisibawa omo muliro. Ni muhindano mukulu owabuyirire. Siritolere mukakola omubiiri wosi-wosi owakalire.
37 “‘Ebi bye biro bikulu bya Yehova ebyo mutolere imwatulaghania mo mihindano minene-minene eyibuyirire busana n’eriletera Yehova y’obuhere obukahisibwa omo muliro, n’obuhere bwabo bw’eyisyano, n’amahere w’obwabu, erikwamana n’endegheka y’obuli kiro. 38 Amahere aya akayitomeka oko ebikahererawa oko syosabato sya Yehova, n’oko bihembo byenyu, amahere wenyu w’eriyilagha, n’oko mahere wenyu w’olusunzo, ebyo mutolere eriha Yehova. 39 Nikwa oko kiro kye 15 eky’omwisi we 7, mwabihulula ebyo mulyeraya omo kihugho, litolere imwakolera Yehova y’ekiro kikulu omo biro 7. Ekiro ky’erimbere, ni luhuka kundu; n’ekiro kye 8 nakyo ni luhuka kundu. 40 Oko kiro ky’erimbere mukendisyimya amatunda w’emiti eyuwenenga, amatahi w’emiti y’etende,* ebisanza by’emiti eyikabyako ebiti binene, n’ebisanza by’emierebi ey’omo musya.* Neryo mukendisyatsema embere sya Yehova Mungu wenyu omo biro 7. 41 Obuli mwaka, oko mwisi we 7, mukendisyabya mukakolera Yehova y’ekiro kikulu eki, omo biro 7. Ni mughambo w’omughulu wosi omo bizazi* byenyu byosi. 42 Mukendisyabya mukikala omo bibanda omo biro 7. Obuli mbutirwa ye Israeli litolere iyikala omo bibanda, 43 neryo ebizazi* ebikendisyasa enyuma syenyu, ibyatoka eriminya ngoko munikalya Abaisraeli b’omo bibanda omughulu nabalusaya omo kihugho kye Misri. Ingye indi Yehova Mungu wenyu.’”
44 Neryo Musa mwakanirya Abaisraeli oko biro bikulu bya Yehova ebyo.