Abatsweri
2 Neryo omumalaika wa Yehova mwalua e Gilgali, amerukira e Bokimu. Mwabugha ati: “Munabalusya omo kihugho kye Misri n’eribingirya omo kihugho ekyo nalapa eriha abotata-kulu wenyu. Kandi munabugha niti, ‘Sinendisyabula erisikya endaghane eyo nakola haghuma nenyu. 2 Nenyu isimwakola endaghane n’abandu b’omo kihugho kino kandi litolere imwahimbula ebiherero byabo.’ Aliwe mumutakwama ebyo nabugha. Mumwakola ekyo kyo busanaki? 3 Kandi ekyo kyo kiryaleka inabugha niti, ‘Sinenditibita kubo balue embere syenyu, kandi bakendibingirya omo kitegho imwatebibwa n’emiungu yabo.’”
4 Omumalaika wa Yehova mwabya abibwira Abaisraeli bosi b’ebinywa ebyo, abandu mubalira kutsibu. 5 Neryo mubahula omwanya oyo mo Bokimu,* bamaherera Yehova y’obuhere omo mwanya oyo.
6 Yosua mwabya abibwira abandu ati baghende, obuli Mwisraeli mwaya omo kiharo ekyo bamuha mo mwandu, atoke erimyakyo. 7 Abandu mubataleka erikolera Yehova oko mughulu wosi wa Yosua n’oko mughulu w’abasyakulu b’oko mughulu wa Yosua ababya ibakineho Yosua abihola. Abasyakulu abo mubalangira emyatsi mikulu yosi eyo Yehova akolera Abaisraeli. 8 Neryo omughombe wa Yehova, ye Yosua, mughala wa Nuni, mwahola iniawite emyaka 110. 9 Mubamuta e Timnati-heresi, omo kiharo ekyabya mwandu wiwe, ekiri omo kiharo ky’ebitwa kye Efraimu, oko luhande lw’endata lw’Ekitwa kye Gaashi. 10 Ekizazi* kyosi ekyo mukyahindanibwa n’abotata-kulu wabo.* Muhasa ekindi kizazi ekyataminya Yehova, kandi ekyataminya ebyo akolera Abaisraeli.
11 Neryo Abaisraeli mubakola emyatsi eyituwene embere sya Yehova, mubakolera* Esyobaali. 12 Abaisraeli ko baleka batya erikolera Yehova oMungu w’abotata-kulu wabo, oyo wabalusaya omo kihugho kye Misri. Mubaramya eyindi miungu, emiungu y’abandu ababya babatimbireko, mubakukamirayo n’erihitania Yehova. 13 Mubaleka Yehova, bamakolera Baali n’esyosanamu sya Ashtoreti. 14 Yehova mwahitana oko Baisraeli, neryo mwaleka abibi bapure ebindu byabo. Mwahirabo omo byala by’esyonzighu syabo esyabya sitimbire kubo, neryo babya isibangasyatoka erisinga esyonzighu syabo. 15 Ahosi-hosi aho babya bakaya, ebyala bya Yehova byabya bikalwa nabo n’eribaletera obuhanya, ngoko Yehova anabugha, kandi ngoko Yehova alapirabo. Mubaghalwa kutsibu. 16 Neryo Yehova mwahiraho abatsweri abakendibya bakasabulabo omo byala by’abandu abakapura ebindu byabo.
17 Aliwe mubaghana nibya n’erihulikirira abatsweri, kandi mubakola obumbalaka n’eyindi miungu n’erikukamirayo. Mubalw’ibalua omo nzira eyo abotata-kulu wabo babya bakakwama, abasikaya emighambo ya Yehova. Ibo mubatakola ng’abotata-kulu wabo. 18 Omughulu Yehova abya akabaha omutsweri, Yehova iniakabya haghuma n’omutsweri oyo, kandi iniakabasabula omo byala by’esyonzighu syabo omo mughulu wosi ogho mutsweri akendibughaho, kundi Yehova iniakabakwira obulighe* abyowa bakasimba busana n’ababya bakanubyabo n’eryaghalyabo.
19 Aliwe omutsweri iniakabya abihola, ibakasubira emibere yabo eyituwene. Ibakayighendaya muhanda kulenga nibya n’abobaba wabo omw’iramya eyindi miungu, omw’ikolerayo n’erikukamirayo. Mubataleka ebyo babya bakakola kandi mubataleka erighundu. 20 Oko mwiso, Yehova mwahitana oko Baisraeli ko kutsibu n’eribugha ati: “Kundi ekihanda eki sikyetasikya endaghane eyo nabwira abotata-kulu wabo niti basikaye, kandi kundi sibetanisikya, 21 neryo naghe sinenditibita oko kihanda n’ekighuma ky’oko bihanda ebyo Yosua asigha omughulu ahola. 22 Ngendikola nitya nitoke erilebya Abaisraeli nga banemwendilola embere erikwama enzira ya Yehova ngoko abobaba wabo bakola.” 23 Neryo Yehova mwalekaho ebihanda ebyo. Mwatatibita kubyo ko luba-luba, kandi mwatahirabyo omo byala bya Yosua.