Samweli w’Akabiri
22 Yehova mwabya abisabula Daudi omo byala by’esyonzighu siwe syosi n’omo byala bya Sauli, Daudi mwimbira Yehova y’olwimbo luno:
2 “Yehova ni lubwe* lwaghe, ni busaghiro bwaghe n’omusabuli waghe.
3 OMungu waghe yo ribwe ryaghe, y’obusaghiro bwaghe,
Yo ngabo yaghe n’erihembe ryaghe* erikanisabula
Ni busaghiro bwaghe* obutebwangahikamo enzighu
Kandi ni mwanya ogho nangatibitiramo, ni musabuli waghe, oyukanilusaya omo byala by’abatsururu.
4 Ngasaba Yehova, oyutolere eripipwa,
Akendinisabula oko syonzighu syaghe.
5 Ebisunda by’oluholo mubyanitimbako,
Ebiwere-were ebiri ng’olusi olwabiritura mubyanisaghisya.
6 Ebikoba by’Eyisinda* mubyanitimbako,
Ebitegho by’oluholo byabya embere syaghe.
7 Omughulu nabya ngaghalwa, munasaba Yehova,
Mondaleka erilakira oMungu waghe.
Neryo mwowa omulenge waghe iniane omo hekalu yiwe,
N’ebinywa byaghe by’erimusaba obuwatikya mubyahika omo matwi wiwe.
8 Ekihugho mukyatsuka erisuka-sukana n’erititimana;
Esyofondasyo sy’olubula musyatitimana,
Musyasuka-sukanibwa kundi babya ibabirimuhitania.
9 Omuki mwalua omo mihuli yiwe,
N’omuliro owakatimaya mwalua omo buno bwiwe,
N’amakala awakire mwamuluamo.
10 Mwabya abindaghala, mwalinga olubula,
Omwirimya munene abya eyikwa w’ebisando biwe.
11 Mwasa akaghuluka iniane oko mumakerubi.
Mubamulangira iniane oko bipupa by’ekirimu.*
12 Neryo mwayibisa omo mwirimya,
N’omo maghetse awalimo mwirimya n’ebitu binene.
13 Amakala awakire mwalua omo kyakakala ekyabya embere siwe.
14 Neryo Yehova mwatsuka eribugha ng’omulumo w’obutuku iniane elubula,
Ow’endata Kutsibu mwowisya abandu b’omulenge wiwe.
15 Mwaghusa emisali yiwe, yamapanza-panza esyonzighu syaghe;
Mwaghusa ehirabyo hiwe, hyamabulungania esyonzighu syaghe.
16 Ekitaka ky’emiswi sy’engetse mukyalangirika,
Erihaya rya Yehova n’omuka owakalua omo mihuli yiwe
Mubyaleka esyofondasyo sy’ekitaka isyalangirika.
17 Mwakakya ebyala biwe iniane endata;
Amanihamba n’erinilusya omo mutobero w’amaghetse.
18 Mwanisabula omo byala by’enzighu yaghe y’amaka,
Omo byala by’ababya baniponire, ababya n’akaghala kunilenga.
19 Mubalwa naghe omughulu nabya ngaghalwa.
Aliwe Yehova mwaniwatikya.
20 Mwanitwala ahali obuholo,*
Mwanisabula kundi abya inyanianzire.
21 Yehova akanihemba kundi ngakola ebitunganene,
Akanihemba kundi siniri na kosa.*
22 Kundi omughulu wosi ngakwama esyonzira sya Yehova,
Sindinatakola erilolo ry’erileka oMungu waghe.
23 Siniribirirawa ebyalayiro biwe byosi,
Sinendisyaleka erikwama emighambo yiwe.
24 Mughulu wosi ngendisyayighendya butsira kosa embere siwe,
Ngendisyayikasa eritendimukosera.
25 Neryo Yehova anihembe kundi ngakola ebitunganene;
Kandi kundi siniri n’ekosa embere siwe.
26 Sighulileghula oko mundu oyuteleghula;
N’omundu oyute n’ekosa, ukamukolera ndeke.
27 Ukakolera ndeke omundu oyo werire
Aliwe omubandi-bandi, naghu ukamuminyira amayele.*
28 Kundi ukasabula abakayikehaya,
Aliwe ameso waghu syalyanza abakayiheka,
Ukabakanganaya ko ni bana.
29 Kundi iwe Yehova, uli tala yaghe,
Yehova yukabindula omwirimya owanitimbireko mo kyakakala.
30 Busana n’obuwatikya bwaghu, nanganalwa n’ababandi abakaheka ebindu,
Busana n’akaghala ako Mungu akamba, nanganasamba oko luhimbo.
31 Obuli mwatsi ogho oMungu w’ekwenene akakola ahika-hikene,
Ekinywa kya Yehova kyerire.
Ni ngabo y’abosi abakatibitira ey’ali.
32 Hane oMungu ate ini Yehova?
Hane Olubwe* ate iyo Mungu wetu?
33 OMungu w’ekwenene ni busaghiro bwaghe obo nzighu iteyangahikamo bweghu-bweghu,
Akendisyalungula enzira yaghe.
34 Akanguhaya ebisando byaghe ng’eby’engabi,
Akanimanaya omo myanya y’endata.
35 Akakangiriraya ebyala byaghe by’erilwa;
Ebyala byaghe byasi erilinga obuta* bw’ekwivre,*
36 Ukaniha engabo yaghu itoke eriniteya,
N’eriyikehya ryaghu rikaniyira mo mukulu.
37 Ukayira enzira eyo ngendilabamo mo nene,
Ebisando* byaghe sibyenditendera.
38 Ngendikwamirira esyonzighu syaghe n’eribugha sy’oho,
Sinendisubula nitenabugha sy’oho.
39 Ngendibugha sy’oho n’eriponda-pondasyo, neryo sisyendisyasyahangana;
Sikendiwa ahisi, neryo inalyatangirasyo.
40 Ukendimba akaghala k’erilwa nako;
Ukenditoya esyonzighu syaghe, neryo inalyatangiryasyo.
42 Bakasaba obuwatikya, aliwe sihali oyo wangabasabula;
Nibya bakasaba Yehova bati abawatikaye, aliwe syalibasubiraya.
43 Ngendiponda-pondabo ibabya ng’olututu,
Ngendiponda-pondabo n’eribalyatangira ng’ebyondo by’omo syondaki.
44 Ukendinimira omughulu abandu bakanibugha-bughako muhanda,
Ukendiniteya nitoke eribya mukulu w’ebihanda,
N’abandu abo natabyanasi bakendinikolera.
45 Abandu b’omo bindi bihugho bakendisyunama embere syaghe ibanemusagha;
Ebyo bakowa okw’ingye bikendisyaleka ibanikenga.*
46 Abandu b’omo bindi bihugho bakendisagha,*
Bakendisyalua omo myanya yabo eyo omundu ateangahikamo bweghu-bweghu ibanemutitimana.
47 Yehova ni Mungu oyuliho! Olubwe* lwaghe lupipawe!
OMungu, Olubwe olukanisabula, lupipawe.
48 OMungu w’ekwenene y’ukanituhuliraya,
Akaleka abandu ibanikolera;
49 Akanisabula omo byala by’esyonzighu syaghe
Akanihira endata oko bosi abakalwa naghe;
Ukanisabula omo byala by’omutsururu,
50 Ekyo kyo kikaleka inakusima, iwe Yehova, omo kati-kati k’ebihanda,
Kandi ngendipipa erina ryaghu.*
51 Akakola emyatsi mikulu-mikulu busana n’erisabula omwami wiwe;
Akakanganaya omundu wiwe oyuhirirweko amaghuta olwanzo oluteleghula
Akakanganayalo Daudi n’abana biwe kera na kera.”